Corpus of Electronic Texts Edition
The Metrical Dindshenchas (Author: Unknown)
poem 74
Loch Con
- Loch Con, cía ná fitir,
ac' ná bía in son socair,
in gním talchair tiachair
rochriathair rochocain?
- 5] A hinsib Mod muirech,
co ngibsib gol nginach,
tucsat a rith robalc
in chonart dia n-ilach.
- Conart Mod cen meirbe,
10] tomalt im thor Tuirbe,
engsat in muicc maigne
dar cach ndairbre nduilge.
- Luid rempu 'sin loch-sa,
tuc tenntu don tur-sa:
15] lasin muicc, mó áirmit,
robáidit fon mbrug-sa.
- Luid i n-indsi in locha,
feib rochind-si a catha:
rosgab i sód seilbe:
20] ba nód feidle in fatha.
- Is dia roimsib retha,
iar toirgsin a trocha,
iarna mairn co mucha,
dofil ainm in locha. L.
p.410