Corpus of Electronic Texts Edition
The Metrical Dindshenchas (Author: Unknown)

poem 72

Loch Cé

  1. Loch Cé, cid imar' mebaid,
    dia mbái 'na maig mín-shlemain?
    Int usce idan, a fhir,
    cá hinad asa rérig?
  2. 5] Fiarfaigim díb cúich in Cé
    ó sloindid cach uile hé?
    Cía 'ca mbái ar Banba co mblaid
    in drái amra imar' forbair?
  3. Crét hé int adbar imar' fhás
    10] in loch úaine cen úathbás?
    Int usce fáilid glan glas,
    ráidid dam a dind-senchas!
  4. Drái Núadat, nonertad báig,
    maic Echtaig maic Etarláim,
    15] is óa fhert ainm in lacha
    iar techt ó maidm mór-chatha.
  5. Tánic ó Maig Tured te,
    ó rogáetsat gái nime,
    iarna guin d'arm co ngéire,
    20] cor' shuid i carn chuirr-shléibe.
  6. Iarsin éirgis Cé don charn:
    robo súail nárbo secc-marb:
    tánic roime asa thám thais
    co lár in maige mín-glais.

  7. p.402

  8. 25] Carraic atchondarc 'sin maig'
    is ann tugad fo thalmain:
    ó rolád isin carn cloch
    atracht fon marb in mór-loch. L.
  9. Is desin atá loch Cé,
    30] atberim cen immargáe,
    ó drái Núadat, níamda a gail,
    atá loch ós na lochaib. L.

  10. p.404