Corpus of Electronic Texts Edition
The Metrical Dindshenchas (Author: Unknown)

poem 71

Mag Luirg

  1. Is eól dam im threbthas tó
    in senchas súairc, nach sóeb-ró,
    dia n-abar, cuird co caisse,
    Mag Luirg cosin lór-maisse.
  2. 5] Dia mbói Conall, úath-bla áig,
    ic ríg Crúachna in chét-gáid
    ar brú deróil a derce
    ina shenóir dímelte,
  3. Tuc brón hi Crúachain Chera
    10] Conall túachail trén-bera,
    mar rothairind túaid 'ca thaig
    Ailill mac Rúaid cor-roblaid.
  4. Rongab gairbe risin scél,
    rotheich, ba hairde étrén,
    15] dar Mag Luirg cen écht mbréithre
    co Mag Slécht na sen-Bréifne.
  5. Fríth a lenmain assa lurg
    do shlúag dedgair fo donn-chulg,
    co torchair leó in brianda bil
    20] ic Áth na Mianna ic Magin.
  6. Na tri Rúad-choin Martín mir
    báidsit balc-bríg in blaid-fhir;
    tallsat a chend, cía búi de,
    bi cin Chonrúi maic Dáire.

  7. p.398

  8. 25] Rucsat leó fo glére a ngell
    hi Crích Bérre in mbúan-chend,29
    co fail tíar fo thalmain tall
    in cend cíar robái ar Chonall.
  9. Is don gním-sin ic cuain Chairn
    30] fofhúair in mag a mór-ainm:
    gaire Conaill na cét ceól
    dam cen dodaing is dag-éol. Is.
  10. Ni raib mo chend, a Chríst cháid,
    trell fo thríst is fo thiug-báig:
    35] m'anam mo chorp is mo cheól
    rop sáer ar olc ar aneól. Is.

  11. p.400