Corpus of Electronic Texts Edition
The Metrical Dindshenchas (Author: Unknown)

poem 69

Mag Mucrime

  1. Mag Mucrime molas cách,
    mag ir-ragam cor-rognáth,
    mag na tige is na trebthach
    rosgab fine find-Echdach.
  2. 5] Ferann réid amréid ria ar,
    fota rolethan roglan,
    clár itát claidib cressa,
    lán do dairib dair-messa.
  3. "Diamair" ar cach sluág sona"
    10] senchas maige Mucroma:
    ní furáil sái no ollam"
    ar cach ái "dia fhursonnad."
  4. A húaim Chrúachan, roclechta,
    tánic dub-thrét drúidechta,
    15] cor' brost demun in seilb seing
    co Meidb ocus co Ailill.
  5. D'ingantaib ind albín mucc
    cet 'ca n-árim in óen-chnucc:
    dia mbette co bráth 'ca rím,
    20] nísfuigbed cách fo chomlín.
  6. Rochoillset torad is tlacht
    i cóiciud chlíarach Connacht,
    coná bíd acht meiss is cheiss
    in cach thúaith i taidlitis.

  7. p.384

  8. 25] Tánic Ailill ocus Medb
    dia seilg dia rím co roderb,
    co frítha ar in gainmig glain
    ina failgib i Froéch-maig.
  9. Rofúaprad a selg 'masech
    30] is a rím co rofheithmech:
    co Meidb hi mBelach na Fert
    tuctha ar enach in oén-fhecht.
  10. Roling mucc díb co ndaith oiss,
    co rogab Medb a mór-choiss,
    35] co fargaib fri hethad n-áig
    a lethar ina leth-láim.
  11. Ón ló rorímthe thiar thair
    na mucca fíata i Fróech-maig,
    ní scar fri scélaib fíra,
    40] in mag is Mag Mucríma. M. M.

  12. p.386