Corpus of Electronic Texts Edition
The Metrical Dindshenchas (Author: Unknown)

poem 68

Mag nAi

  1. A fir, dia téis i mag n-Ái,
    sloind-siu dúinn in séis roshúa,
    ocus glindig dóib in gairm
    ó fuil cen dailb a ainm núa.
  2. 5] Ái mac Allguba na n-ág,
    lúath a lám ac letrad chrand,
    is é cét-fher diarbo thoisc:
    raloisc etir bun is barr.
  3. Ruc leis methil mogda móir,
    10] mór a tóir fri cobra cain:
    cethri seisir curad crúaid
    ba mod slúaig a slaide sain.
  4. Cethri húaire ar fichit dóib,
    mar is dóig, co tairnic leo:
    15] cía bái rempu slúag ba saidbre
    ní ba gairbe a ngním nó a ngleó.
  5. Ái rosgáid iar scur a n-oipre
    báig co n-oipne tria blaid mbil,
    combad móide a bríg's a búaid,
    20] combad úaid a ainm, a fhir. A F.
  6. Mise fort greis, a rí ríchid,
    cen nach ndíchil corbam dil;
    a rí dianad mór cach maithius
    bécc it fhlaithius flaith cach fhir. A F.

  7. p.382