Corpus of Electronic Texts Edition
The Metrical Dindshenchas (Author: Unknown)

poem 66

Turloch Shilinde

  1. Turloch Silinde seo indé,
    indiu is loch dianid lán lind:
    is sí Blonac ingen Túi
    ic sádud a crúi rosmill.
  2. 5] Cid hí Silend rodaselb,
    is gním derb, is cobra gnáth,
    atá Silend cen a seilb
    dáig cech meirb is mettu, ar cách.
  3. Cesfaid Silend, sáethar sír,
    10] is é a fhír, is cían in cur:
    biaid ic Blonaic loch na láech:
    bid hí Silend táeth don tur. T.
  4. Sirfid Silend sair is síar
    dar cach slíab co roa a bun:
    15] tetha Silend, ná ba samda,
    adba ná ba tairsech tur. T.
  5. Dar na mnáib fo roblai raith,
    cen gním daith, fo dóer-ban dul,
    cía rolensat lindi láech-ban,
    20] ropo sáethar troch dia tur. T.

  6. p.378