Corpus of Electronic Texts Edition
The Metrical Dindshenchas (Author: Unknown)

poem 57

Ath Cliath Medraige

  1. Diambad mé nochinged ind
    i n-áth na find-fher fíal-grind,
    bam-sa heól, fri fecht fátha,
    do sceól chert in chlíath-átha.
  2. 5] Rop adba scíath ocus scen,
    co n-ilur chlíath is coibden:
    ropsat bróenaig a daig-fhir
    i róenaib ria ríg-Mainib.
  3. Áth moa mbi fuil dar feraib
    10] iarna nhguin do gnáth-beraib:
    dia rotróeta co trúaige,
    fir rogóeta glan-grúaide.
  4. Áth moa tucsat debaid ndeirg
    clanna Dedaid fo díbeirg
    15] do secht Mainib, sét rosern,
    cona trichait cét cethern.
  5. Olc in t-adbar diambói sin,
    ciarb adbal ind imgletin,
    im tháin bó Dartada dil
    20] trias' romachtada mór-fhir.
  6. Eochu bec mac Cairpre chain,
    rí Clíach cen airdde ágmair,
    ó Chuillind, fri fáth fessa,
    doroacht áth in arm-thressa.

  7. p.316

  8. 25] Fri homun tairir na tríath
    clíatha draigin is derg-scíach
    gníset moa n-áth dia aire
    ríg na ráth na ro-Maine.
  9. Ó na clíathaib-sin amne
    i n-íathaib Elga áine
    is Áth Clíath co tresse threb,
    mar bad messe nochinged. D.

  10. p.318