Corpus of Electronic Texts Edition

The Metrical Dindshenchas (Author: Unknown)

poem 55

Sliab n-Echtga I

1. Senchas Echtga áine,
   tria nert-bla co ndéine,
   táthum cona dálaib
   do dámaib fer Féine.
2. 5] Rongab duine delb-glan,
   mac Ruide co roblad:
   's é fúair in tír tul-glan
   ó cach ríg dia fognad.
3. O ríg Crúachan cloth-chóir
   10] fúair núachar co nert-máin;
   ba leis, daig cen dédail,
   feib fégair cech cert-láid.
4. Lusca beist a lenmus
   ainm d'Fhergus mac Ruide,
   15] roalt i Síd Nenta:
   ann rogellta a guide:
5. Ba cuchtaire ar chúanaib
   co mbruthmaire brígaig
   mac Ruide rúaid, rélaid
   20] fégaid ocus fíraid.
6. Rogab gnímu dálim,
   doárim a dag-dáin,
   dia fúair deg-raind dind-móir
   i crích Sengaind sam-náir.

---

p.300

7. 25] Robói i ngrádaib roríg
   tria dánaib co n-il-áeb;
   acht cen gái dia glan-fhír
   ní fhúair mnái ronirfháem.
8. Rothecht Fergus filte,
   30] do sherb-lus a shainte,
   ó Móen na treb tuilte
   cosin róen ic fairge.
9. Targaid uile i n-óen-ló
   mac Ruide co róen-gái
   35] a thír cona thoirthe
   ina coibche d'óen-mnái.
10. Hi crích Echtair airig,
    ic fertaib fer fuinid,
    roalt in gein grádmar
    40] Echtga ágmar fuirid.
11. Deir co núachraib núa,
    do thúathaib dil Déa,
    Aurscothaig maic Thinne,
    gein co ngrinne gnéa.
12. 45] Cach máin bói for talmain
    bói lasin sáir sobraig,
    acht foirb dáer ar dílse:
    nírb ísle dia roblaid.

---

p.302

13. Dorat airle ndúalais
    50] ara dailbe dílis
    dia daltu, gním góach,
    Dóach Móel-chend mímis
14. Feis la Fergus frithir
    ar ergnus a fhuithir,
    55] ar a fúair do deg-raind
    í crích Sengaind sruith-fhir.
15. Dorat uile i slabraid
    mac Ruide co rind-blaid
    in slíab, cosa saigid,
    60] co ndairib, co ndindgnaib.
16. O fhuair slíab cen chísu
    in ben dían fri dúasu,
    ó shain, gairm fri gnásu,
    dofail a hainm úasu.
17. 65] Is desin asberar
    Echtga, trebar tel-glas;
    sluind fiad chách cen trom-glas,
    dianid somblas senchas. S.

---

p.304