Corpus of Electronic Texts Edition
The Metrical Dindshenchas (Author: Unknown)

poem 48

Srúb Brain

  1. Matan do Choin na Cerdda
    for múr dron dúne Delga,
    fri sechem slúag 'na saige,
    ic fethem úar irgaile.
  2. 5] Co facca in muir n-uár n-altach
    co slúag adbal ingantach,
    fer co fáthaib rafhollaig,
    ria ráthaib ria rodrongaib.
  3. Línsat triáth-mag a téite,
    10] in slúag scíath-glan scíth-méite:
    rochansat ceól cen chobra
    for a seól co sír-solma.
  4. Ba lór do brón in betha
    a nglór is a ngarb-gretha:
    15] lór do déstin co dergnaid
    déscin for a ndub-delbaib.
  5. Tri cóicait 'sind éill fo thrí;
    lór ba léir al-línmairi:
    duibithir funchi fedil
    20] culchi cach eóin imthemin.

    6. p.258

  6. Remra a cuirp is a cossa:
    mosnáitis muir dia mbossa:
    sithithir seóil for sessaib
    scéith cach eóin cen imresain.
  7. 25] Secht n-artim fo thri tadbain
    gulban cach óen-eóin angbaid:
    secht cubait riged ránac
    i tacmung a mun-brágat.
  8. Imsói fothu, feochar ngal,
    30] Cú na cath is na comram:
    rosoirg dia thábaill in daig
    co rámaind is co redgaig.
  9. Desin roort uile n-óg
    in énlaith olc ecal-mór,
    35] tar cach ngaibél col-lín bla
    cossin mbrainén ba tiugba.
  10. Rotheip a méide assa muin,
    indlais a láma 'n-a fhuil,
    roúaig cach rúin in callait,
    40] tuc srúib forsin sen-charraic.
  11. Desin asberar Srúb Brain:
    fégar cech rún tria rogail,
    do gním in Chon, nár chatail,
    sír in mod, cach moch-matain. M.

    12. p.260