Corpus of Electronic Texts Edition
The Metrical Dindshenchas (Author: Unknown)
poem 44
Temair Lúachra
- In Lúachair dano, in Lúachair,
diamsad cuman, a búachail,
robo mag find-lethan fóen
co n-imat róen is rúathair.
- 5] In Lúachair dano, in Lúachair,
ba treb glan toga tuachail;
ind inbaid rochlóechlói gné
ba cáime tír tarngire.
- In Lúachair dano, in Lúachair,
10] ba hadba niad is núachair;
robo mag scothach fo scí
co remes mac nUgaini.
- In Lúachair dano, in Lúachair,
ba himda sleg 'na slúag-thaig;
15] i n-aimsir Dedaid maic Sin,
nosfuilngtis a scoth-shemair.
- Rob áibind do chlainn Dedaid
dia raibe a tech i Temair;
ba háibind Temair 'moa tig
20] i n-aimsir Dedaid maic Sin.
- Tucad d'ingin Lugdach luind,
ar thóchim do thír fo thuind,
cach forba togad ar thlus,
ar brogad forsin turus.
p.238
- 25] Oc Eremón robói in ben;
is sí robói i Temair Breg,
ocus a mbói sundana:
is di atá Temair Lúachra.
- In aidche rogénair Conn,
30] ba fáilid riss Ériu oll;
innti rochinsetar tra
Siuir, ocus Eóir, is Berba.
- In aidche rogénair Conn,
asracht cech flaith co foroll;
35] innti rofessa, búan bla,
Bile Tortan, Eó Rossa.
- In aidche rogénair Conn
ronassa Ériu óen-glonn;
Loch Riach, is ann rochin sin
40] ocus Loch Léin ós Lúachair.
- Is mé Fintan; am fer sen;
rochlóechlói mo ré is m'ed;
tánac i nInis Fáil find
cethri tráth déc ria ndílind.
- 45] O rodoirt díliu for bith,
rochuir m'aes ní gúach in grith:
nomfil oc Dún Tulcha tra,
i n-iarthur thúaiscirt Lúachra.
p.240