Corpus of Electronic Texts Edition
The Metrical Dindshenchas (Author: Unknown)

poem 33

Loch Dacháech

  1. Tancatar sund
    óigid do chéin
    co féin ramóir,
    Cicul mac Guill,
    5] maic Túathmair thruim,'
    ó Sléib Amóir.
  2. Ba sed al-lín
    muintire in ríg
    ir-róen-chossair,
    10] trí cétaib fer
    fri crannu sleg
    for óen-chossaib.
  3. Luid lasin ríg
    a máthair mín
    15] co mbríg deóraid:
    in deilm dúanach
    in Loth lúamnach
    co lúas leómain.
  4. Tucastair leis
    20] a mnái fri feis
    do deis dírma,
    Fuata bé Fáil,
    cechaing 'sin báig
    i ndáil dígla.

    5. p.186

  5. 25] Amlaid doluid
    torrach tar muir
    co sóer-inbir
    Dacháech co clú,
    corothoí a brú
    30] in n-oen-ingin.
  6. Lochtach in chland
    in droch-der dall
    co ndínirte:
    Dacháech a hainm
    35] cach amm, cach airm,
    gairm glífite.
  7. Feib rosuacht lár
    ba sí in bág
    co mbán-gábud:
    40] rethis co moch
    musling 'sin loch
    dia lán-bádud.
  8. Desin atá
    ó ainm na mná
    45] in comainm-se
    for Loch Dacháech;
    fuair adbur sáeth
    in sogairm-se.
  9. Rob é a fatha
    50] do chlód catha
    for chlaind Míled;
    toirsech bass de,
    rotoimsed fé,
    fri cnes ríg-fher.

    10. p.188

  10. 55] Cach fer ba díb,
    cach ben co mbríg,
    ní rancatar:
    dom chubus úad
    ba turus trúag
    60] dia tancatar. T.

    11. p.190