Part 32 of The Metrical Dindshenchas

Loch Garman

Eochaid Eólach Úa Ceirín cecinit.

Rí na loch in loch-sa thess,
Loch Garman na nglan-écess,
cúan cróebach lethan nal-long,
óenach na n-ethar n-étromm.
5] Inad as ruidles do ríg,
i comraic muir is mór-thír,
dún iar ndíchur ídal as,
súairc roshílad a shenchas.
Cía díb ropo thúsciu threll,
10] iarfaigther d'eólchaib Erend,
loch na slúag ria thadall tair,
nó ind aband úar ronindsaig.
Imchían etarru moalle,
mad-dia-fégthar fírinne,
15] ó maidm na haband cen ail,
co maidm in locha lind-glain.
Ind aband atracht ar tús,
am eólach ina n-imthús,
ní rabi in loch mór-glan mall,
20] co cían dar éis na haband.
Fri ré Catháir na cath crúaid
maidm Locha Garman glan-úair;
fri ré Fer mBolg cen báne
maidm sunna na sen-Sláne.

25] Tri fodla for Feraib Bolg,
cid a n-imlúad, ní hanord,
gabsat Érinn iar n-edaib

co trén a tri hinberaib.
Oén trían dib áirmither and
30] i n-inbiur dóinech Domnann;
in dara trían cen taisse
i n-inbiur dían Dubglaisse.
In tres trían tánic ille
co hinber slúagach Sláne,
35] im Sláne cen gairra bad gand,
ó fuil a hainm na haband.
Is ed tancatar i tír,
longes Fer mBolg mbríathar-mín,
co port Cóelrenna, ná ceil,
40] úair ba hé a ainm ind úair-sin.
Is and tancatar na slóig
i purt Chóelrenna in chomóil;
ó na rámaib rucsat and,
is úadib ráitir Ramand.
45] Senchas anma in locha láin,
dia tucam a thuarascháil,
ria aisnéis, cid mór in mod,
is é a maith, a mínigod.
Feis Temra cech tres blíadna,
50] do chomull recht is ríagla,
dogníthi in tan-sin co tend
ic rígaib allib hErend.

Dorigne Catháir clemnach
feis racháim na ríg Temrach;

55]
tancatar 'mon feis, ferr de,
fir hÉrenn co hóen-baile.
Tri láa re Samain, búan bés,
tri laá na diaid, ba deg-bés,
don t-shlúag, rias' ba dímór daig,
60] ic sír-ól frissin sechtmain.
Cen gait is cen guin duine
occu ind airet-sin uile,
cen imbert n-airm ná hálad

cen écraite d' imrádad.
65] Cipé doneth ní díb-sein
ba bidba troch co trom-neim;
ní gabtha ór arand úaid
acht a anam fri hóen-úair.
Robái trén-fher 'sin taig thall
70] for cúl Chatháir, ní chelam,
Garman mac Bomma Licce

di shlúag Berba barr-bricce,
Dia tarla dó 'sin taig the,
diambái in mór-shlúag ar mesce,
75] mind óir na rígna do gait,
nirbo gním cóir do charait.
Élaid immach le mind n-óir
otá Temraig in trom-shlóig
co ruacht inber Sláne seng
80] i n-airthiur descirt Érenn.

Tecait atúaid 'na degaid
munter Chatháir chorr-beraig:
nafairthet 'con tiprait tall,
robái i n-inbiur na haband.
85] Tan rogabsat Garman ngarg,
maidid in tipra trén-ard,
otá carraic co muir mass;
ó shain is loch lethan-glass.
Báitir Garman 'sin loch lán;
90] na heólaig aca imrád;
cúan na scen is na scíath nglan
is úad rolen Loch Garman.
Is é sin senchas cert cóir
ind locha roglain romóir,
95] is na haband, óebda al-lí,
ica n-anann cach ardrí.
Fecht robái Catháir cíall-glan
i tossuch búan a bethad,
co tarfas dó físs, rofess,
100] tuc slúag Érenn i n-ard-chess:
Ingen briugad cétaig cáim
co ndeilb luchair co lán-áib
do thócháil chind, nirbo chol,
don churaid ina chotlod.
105] Cach dath cóem atchí duine,
do gurm do bricc do buide
is do chorcair, ba súairc sin,
ina hétgud 'mon n-ingin.

Is amlaid robói in ben bán,
110] torrach, is a brú bith-lán,
co cend ocht cét mblíadna mbil,
cid ingnad fria innisin:
Co ruc mac, ba maith a mét,
rochuir mór láech i lúath-éc:
115] in lá rucad, ba sóeb sin,
tressiu in mac indá a máthir.
Triallaid in máthir ós mnáib
techt úaid ara imgabáil;
ní fhuair conair, cuirit gleic,
120] acht tre medón a mór-maic.
Cnocc áibind ósa cind chóem

na mná is a maic maróen;
léir dia mullach in bith búan;
nirbo menic cen mór-shlúag.
125] Bile óir 'sin chnucc cen chath,
ricced a barr nem nélach;
airfitiud fer ndomain de
atchloss do baurr in bile.
In tráth nobenad gáeth gúr

130]
frissin mbile mbocc mbarr-úr,
nobíd lán adbal, a fhir,
ar lár talman dia thorthib.
Cach torad nothogtais slúaig
anair anes is atúaid
135] immar thuile mara maill
ticced d'uachtur ind óen-chraind.

Is í sin físs fir ind áig
'moandéntais Lagin lúthgáir,
Catháir maic Feidlimthe fhind
140] ardríg Érenn a hAlind.
Iarsin dúscid in flaith fíal
asa rochotlud rochían,
cend slúaig Lagen immalle,
d'innisin a aislinge.
145] Garthir chucci in drúi dámach
ocon ríg ba rográdach,
dó co roeirned dia ailt
na huile cesta atchondairc.
"Ernifetsa" ar in drúi daith,
150] "dianamraib lúag bas lán-maith,
lat chátaid it chrí chena"

atbert Brí mac Baircheda.
Tecait cura daingne dó
fri lúag d'fagáil in cach ló,
155] is fri cátaid thall 'na thig,
fri séta mar rochuinnig.
Iarsin berid in drúi dóib
breith na físsi co fír-chóir;
feib ruc riam in mbreith co mblaid
160] dia éis cid cían comailtair.

"Is í ind ingen adbal ard
atchondarc-su a rí rogarg,
ind aband fail it tír the,
dianid ainm sír-búan Sláne."
165] "Is iat na datha atbere
i n-étgud na hingine,
áes cach dána núi fo nim
cen inandus 'na n-aistib."
"ís é in briugu cétach cind,
170] rop athair don ingin fhind,
talam," ar in drúi dia deóin,
"triasatá cét cech ceneóil."
"Is é mac robái 'na broind
ocht cét bliadna, mar bágaim,
175] loch geínfes uaidi ar gurt glas,
ocus frit lind-siu lethfas."
"In lá geinfes cona gáir,
báidfid in n-abaind n-imsláin:
cách 'ca hól-si dara hor,
180] acht cid mór-si bid mó-som."
"Is é in cnocc mór, mó cach dind,
atchonnarcais ósa cind,
do nert-su ós chách, is mochen,
cen tráethad is cen tairnem."

185] "Is é in bile óir ainbthech
gécach, lethan, lán-toirthech,
tussu it ríg for Banba bind
is for cach adba in hErind."
"'s é in t-airfitiud co n-úaill
190] robái i mbaurr in bile búain,
th' aurlabra fíal, óebdu de,
ic sídugad sochaide."
"Is í in gáeth cobsaid cen chrúas
rothascair na toirthe anúas,
195] th'enech, a déit-gil dúanaich,
ic dáil chruid do chóem-shlúagaib."
"Is duit atá a breth bunaid
na físsi ar cach prím-thulaig;
ní fhail do chreitim it chrí
200] ar hÉrinn corbat óen-rí."
Eochaid eólach, diarb assa,
fofuair súithi senchassa
do Loch Garman tall na thír
ic adnad rand do roríg. R.
205] Cuintgim itge ar Día dam,
co rob maith imthús m'anman,
ná roslena cin i crí,
'con fiur ac'nárba haithri.²¹