Corpus of Electronic Texts Edition
The Metrical Dindshenchas (Author: Unknown)

poem 13

Áth Cliath Cúalann

  1. Ath Clíath fégaid lib colléic:
    a thuir imthéit Góedel gnáth,
    cía lóech cía lóiches rodmbrat,
    dorat a ainm forsin n-áth?
  2. 5] Cin mná Adaim dorat forn
    am-míl cen chond cluiche-drenn:
    cían ó dorairngert in drúi
    in béist robúi for Licc Benn.
  3. In béist robúi for Licc Benn,
    10] secht fichit coss, ceithri chend:
    rosiacht a colpa, a dóït:
    roslíg Bóind corbo glend.
  4. In béist dia roás in sceól,
    diamsat eól i míli bóc,
    15] am-míl n-ingnad, rogab tass,
    roslass for bruig maic ind Óc.
  5. Cíä sóer rofích in cléith?
    inna méit dosfuc 'sin n-áth:
    cade in chlíath, is ingnad linn:
    20] méraid hi lind co tí bráth.

  6. p.102

  7. Curach a chléib rolá cor
    im hÉrind, or finnad cách,
    conusforlúaid in muir mer:
    iarum doscer isin n-áth.
  8. 25] Rí na ndúile, forum n-án,
    coimsid rúine do cach óen,
    flaith na folad, mac mo Dé
    is é adchomad cach cóel.
  9. Innis dam, a Mongáin maiss,
    30] úair at eólach cech ernmaiss,
    cíä lín dorochair, is glé,
    hi tulaig na segainne.
  10. A búaid hÉrenn dar dá ler,
    a mind gel rofitir cách,
    35] memor latt, a breó dond Í,
    aní dosfuc isin n-áth.

  11. p.104