Corpus of Electronic Texts Edition
The Metrical Dindshenchas (Author: Unknown)

poem 10

Bairend Chermain

  1. Bairend Chermain cid diatá,
    fri degblaid fri dian-garta?
    nirbo therman robái threll,
    diambúi Cerman cethar-chend.
  2. 5] Dorat tochmarc ar tharba
    Cerman calad-chnes calma;
    ingen Etarbai na cath,
    ba sí Digais5 diupartach.
  3. Digais ba dedgair ba dron,
    10] ruc claind cendmair do Chermon;
    bert dó secht maccu mera
    ocus a cóic ingena.
  4. Anmand nam-mac, monor n-án,
    Fulach, Liath, ocus Cassán,
    15] Fledach, Dímain, is Dormna
    ocus in Scál scíath-brogda.6
  5. Cóic ingena ind láich, nár liúin,
    bátar fer-gnímaig fortriúin,
    Cappa, Cliath, Bernsa na mbend,
    20] Malu maith, ocus Bairend.

  6. p.90

  7. Dlomais Digais, daltait raind,
    dia daltaib is dia derb-chlaind;
    atbert Cerman, mar cham cas,
    "Fognad dúib ág is ernbas."
  8. 25] Rogab cách a chonair díb,
    scáilset ó threib is ó thír,
    coragbatar a sosta
    bátar ainble anfhosta.
  9. Cechaing Scál co Scairb ind Eóin;
    30] dessid Dímain for Drobeóil;7
    dessid Dornmar, dúr a graimm,
    ic Ath modmar Mónadmaill.8
  10. Dolluid Cassán co Glend Cuill;
    dolluid Fer Líath co Líathdruimm;
    35] dolluid Fulach co Glend Smóil;
    dolluid Fledach co Dergmóin.
  11. Dessid Cappa i nGlind Dá nGrúad,9
    dessid Bairend for Bablúan,10
    rogab Cliath sencharn fria lá;
    40] it iatsin derb-chland Digsa.11
  12. Digais 'na sléib mar atchlos;
    fail and iar céin a tothchos;
    ic Bablúan ba slúagda sell
    ind arm-rúad búada Bairend. B.

  13. p.92


    p.94