Corpus of Electronic Texts Edition
The Metrical Dindshenchas (Author: Unknown)

poem 1


p.2

Carmun

Fulartach cecinit.
  1. Eistid, a Laigniu nal-lecht,
    a shlúaig ós Raigniu rath-chert,
    co fagbaid uaim as cech aird
    cáem-shenchas Carmain chloth-aird.
  2. 5] Carmun céte óenaig fhéil,
    co faithchi róenaig roréid,
    in t-shluaig tictís dia thaichmi,
    arfigtís a glan-graifni.
  3. Is railecc ríg a rúam rán,
    10] cid sain-sherc slúag co sóer-grád;
    fail mór fo dumaib dála
    dia shlóg bunaid bith-gráda.
  4. Do cháiniud rígan is ríg,
    d'fháidiud dígal is dígním,
    15] ba mence find-shlúag fagmair
    dar slim-grúad sóer Sen-Charmain.
  5. In fir nó in fer co mét gal,
    nó in ben co n-ét anbal,
    ruc gairm cen mímes marggaid,
    20] tuc ainm díles deg-Carmain?

  6. p.4

  7. Ní fir is ní fer fergach,
    acht óen-ben dían díbergach,
    glúair a tarmun is a tairm,
    ó fúair Carmun a cét-ainm.
  8. 25] Carmun ben maic Díbaid déin
    maic Doirche dírmaig dag-fhéil
    maic Aincgeis co méit ratha,
    ba cend airdmeis ilchatha.
  9. Nistailged tairecc tarba
    30] fri sain-sheirc na sóer-Banba,
    dáig ba snímaig cech amm thair
    cland maic Díbaid 's am-máthair.
  10. Cengsat siar dind ara chur
    Dían ocus Dub is Dothur,
    35] ond Athaín aidben anair,
    ocus Cairmen am-máthair.
  11. Nomiltís im Thúathaib Dé
    in t-áes núachair náimtide
    torad cach thalman co tráig:
    40] ba fogal adbal écáir.
  12. Cairmen as cach bricht co mblaid
    aidcgled cach mhblicht mborr-thoraid,
    iar ngleicc as cach dán nar dlecht,
    na meicc tria ág tria anrecht.
  13. 45] Iarum rosrathaig Túath Dé,
    rosbrathaig úath is amgné,
    ar cach n-om-gním gníset so
    sníset a comlín chucco.

  14. p.6

  15. Crichinbel, ni sáibad sin,
    50] is Lug Láibach mac Cachir,
    Bé Chuilli ós cach rái 'na rag,
    ocus Ái mac Ollaman,
  16. Roráidset riu ar rochtain
    in cethrur crúaid comfhortail:
    55] "Ben sund i cend for máthar,
    triar fer don triur derbráthar."
  17. "Bás dúib, ní rogain roga,
    ní soraid, ní sóer-thoga,
    nó fácbaid co glé-grind giall;
    60] ércid a hÉrind óentriar."
  18. Na fir-sin dochúatar úain,
    fríth a rúacad co rochrúaid,
    ciarb aidben leó fácbat sund
    Cairmen beó 'n-a crú chumung.
  19. 65] Cach fír dar' ná tecar slán
    muir míl, nem, talam tond-bán,
    na tístais tess na tuir thind
    céin nobeth muir im hÉrind.
  20. Cairmen ruc bás is báide,
    70] nosaidledás as écáine;
    fuair a aidid, mar rodlecht,
    eter dairib na ndron-fert.

  21. p.8

  22. Tancas sund tria gáine ngnó,
    dia cáine dia cét-gubo,
    75] la Túaith Dé dar sóer-mag sair,
    cétna óenach cóir Carmain.
  23. Fertán Carmain cía rochlaid,
    in fagbaid nó in fetabair?
    Iar mes cech deg-athar dil
    80] Bres mac Eladan, éistid. E.
  24. Cethri fichit cóic cét cain
    fail úad (ní bréc) do bliadnaib,
    ó Charmein fo chísu cacht
    co salm-gein Ísu iar ndóennacht.
  25. 85] A dó trichat ceithri cét
    ó gein Críst, ní sóeb in sét,
    co Crimthann ós Charmun cacht
    co Pátric n-adbul n-étracht.
  26. Cóic ríg trichat cen tríst tair
    do Lagnib ria Críst creitim:
    90] a núall ós hÉrind roshaich
    dít chúan chél-bind, a Charmain:
  27. Cóic ríg cóicat, sáethraig se,
    do láechraid na Cristaide
    95] ó Chrimthunn comdas na cned
    co Diarmait dron-mas dúir-gen:

  28. p.10

  29. Ocht maic Galaim, lín a slóg,
    Dond, Hír, Eber, Herimón,
    Amairgin, Colptha cen chrád,
    100] Herech, Febria, is Erennán:
  30. Rop iatsin rátha ind óenaig
    cech trátha fri trén-móidim,
    oc tocht ind, oc tuidecht ass,
    cen nach n-écraitius n-amnass.
  31. 105] Ó Thúaith Dé co claind Míled
    ba dín roban is rígfher;
    ó chlaind Míled, ba gním nglé,
    ba dín co Pátric Machae.
  32. Nem, talam, grían, esca, is muir,
    110] toirthe tíre ocus turscuir,
    beóil, clúasa, súli, selbtha,
    cossa, láma, láech-thengtha,
  33. Eich, claidib, carpait cáine,
    gái, scéith is drecha dáine,
    115] drucht, mess, daithen la duile,
    lá 's adaig, tráig, trom-thuile.
  34. Doratsat sin uile n-óg
    buidne Banba cen bith-brón
    co ná beth fo chiabair chest
    120] cech tress bliadain ar tairmesc.
  35. Doringset genti Góidel
    ar menci fri mór-móidem
    óenach cen cháin, cen chinaid,
    cen gním áig ná essidain.

  36. p.12

  37. 125] Lucht baistid Críst, ná celid,
    caistid ris, dáig is demin
    is mó dlegait tríst ar techt
    ó Chríst is a Crístaidecht.
  38. Ríg ocus náim hÉrend and
    130] im Phátric is im Chrimthand,
    iat rothennfhastsat cach cath;
    robennachsat in óenach.
  39. A nói re Túathaib Dé daith
    ós brúachaib Carmuin chloth-maith,
    135] cóica n-a trén-medón trait
    ó Hérimón co Pátraic.
  40. A cóic cethri deich data
    ar sreith óenaig allata,
    ó Bresal bróenach cen brath
    140] cosin n-óenach ndédenach.
  41. Ó Chrimthund in chrotha cain
    co cath ard Ocha anbail
    a nói raglana cen raind
    la síl Labrada láech-maill.
  42. 145] Sé ríg déc, roderbaig dam
    cech súi cech senchaid solam,
    ó Charmun na cúan cróebach
    dorat slúag 'sin slat-óenach.
  43. A hocht a Dothra dóinig,
    150] slúag sochla fri sír-móidim,
    gníset óenach cóir Carmain
    fo glóir is fo glan-armaib.

  44. p.14

  45. A dó déc cen rudra im raind
    d' óenaigib urgna, atmaim,
    155] do churi gríbda in gaiscid
    on t-shíl rígda a ro-Maistin.
  46. A cóic a Fid Gaibli garg
    fichset ós Charmun chloth-ard
    óenach saidbir co srethaib,
    160] co saidlib, co srian-echaib.
  47. Sessiur de Raigne réimnig,
    de síl Bresail bric béimnig,
    slúag find fri faglaib funid
    ós grúad Charmain chét-guinig.
  48. 165] Pátric, Brigit imalle,
    Cóemgen is Cholumcille,
    iat is airthech ar cech slúag
    ná rolaimther a marc-shlúag.
  49. Oenach na náeb, nert dia chur,
    170] ar tús, is cert dia chorgud:
    óenach ardríg f
    [...]
    s glain
    issed bís ina degaid.
  50. Cluche ban Lagen iar ló
    on t-shlúag ragel, ní rád ngó,
    175] bantrocht nach bec mess immach
    issé a céte in tress óenach.
  51. Lagsig, Fothairt, fota a mblad,
    leó dar éis chota na mban:
    is leó Lagin, lín a sét,
    180] na dagfir dod
    [...]
    chomét.

  52. p.16

  53. Ra rígdamnaib sruthi sund
    in cóiced cluchi i Carmund:
    slúaig enig hÉrend, mased,
    dóib ra thrén-gell in sessed.
  54. 185] Fa deóid ra clannaib Condla
    cluche Carmain dag-comga:
    sech cech slúag sóer in sochur
    ós cach róen is ríg-thorud.
  55. Secht cluchi, mar dámair dait,
    190] issed forfhácaib Pátraic:
    in cach lá ra sechtmain sain
    ar bar serc-blaid sír-éistid. E.
  56. Donítís Lagin in sin
    iar trebaib iar tellaigib,
    195] ó Labraid longsech, lín slúag,
    co Catháir comsech cleth-rúad.
  57. Nífarlaic Catháir Carmain
    acht dia maicne mór-adbail;
    'n-a tosach co saidbri sain
    200] síl Rossa Failgi fégaid.
  58. Forud ríg Argatrois áin
    for deis ríg Carmuin chóem-náir;
    dia láim chlí cen daidbri nhdúail
    forad ríg Gaibli géc-lúain.
  59. 205] Is lorg la síl Lugdach lóir
    Láigsig maic Conaill chend-móir,
    is Fothairt, nach taidli tart,
    cen daidbri dia n-iarmoracht.

  60. p.18

  61. Hi Kalaind Auguist cen ail
    210] tiagtís ind cech tress blíadain;
    agtís secht ngraifne im gním nglé
    secht laithe na sechtmaine.
  62. And luaitís fri bága bil
    certa ocus cána in cóicid,
    215] cech recht ríagla co rogor
    cech tress blíadna a chórogod.
  63. Ith, blicht, síth, sáma sona,
    lína lána, lerthola,
    fir ríglaich, co combáid cind
    220] dirmaig forráin for hÉrind.
  64. Acra, tobuch frithir fíach,
    écnach, écraite, anríad,
    ní lamar la graifne in gáid
    élúd aithne, athgabáil.
  65. 225] Cen dul fher i n-airecht mban
    cen mná i n-airecht fer findglan
    mad aithed and, nír' chlunter,
    cid athfher cid athmunter.
  66. Cipó tí dar recht na ríg,
    230] Benén co becht rabúan-scríb,
    ná beth ar ás 'na fhine
    acht a bás 'n-a bith-bine.
  67. Is iat a ada olla
    stuic, cruitti, cuirn chróes-tholla,
    235] cúisig, timpaig cen tríamna,
    filid, ocus fáen-chlíara.

  68. p.20

  69. Fian-shruth Find, fáth cen dochta,
    togla, tána, tochmorca,
    slisnige, is dúle feda,
    240] áera, rúne romera.
  70. Ároisc roscada ríagail,
    's tecusca fíra Fithail,
    dubláidi dindshenchais dait,
    tecusca Cairpri is Chormaic.
  71. 245] Na fessa im fheis truim Temra,
    óenaige im óenach Emna,
    annálad and, is fír so,
    cach rand rorannad Héreo.
  72. Scél tellaig Temra, nach timm,
    250] fis cech trichat in hÉrind,
    banshenchas, buidne, bága,
    bruidne, gessi, gabála.
  73. Deich-thimna Catháir chétaig
    dia chlaind racháim ríg-métaig
    255] foirb cech duine mar as dlecht
    co mbet uile 'ca éistecht. E.
  74. Pípai, fidli, fir cengail,
    cnámfhir ocus cuslennaig,
    sluag étig engach égair,
    260] béccaig ocus búridaig.
  75. Turcbait a fedma uile
    do ríg Berba bruthmaire:
    conérne in rí rán fri mess
    ar cach dán a míad díles.
  76. 265] Aitte, oirgne, aidbse cheóil,
    coimgne cinte cóem-cheneóil,
    a réim ríg, rath dar Bregmag,
    a chath is a chrúad-engnam.

  77. p.22

  78. Is é sin scor ind óenaig
    270] ón t-shlúag beóda bith-fóelid,
    co tabar dóib ón chomdid
    talam cona cóem-thorthib.
  79. G
    [...]
    Lagen iar ló
    nóem in chotaig, ní clóen-ró,
    275] ós rath-lind Charmain co cáid
    affrind, slechtain, salm-gabáil.
  80. Troscud i fagmur, fofecht,
    i Carmun uile i n-óen-fhecht
    ra Lagnib, nach sam-therc sund,
    280] ra anrecht, ra écomlund.
  81. Clérig, láeich Lagen ille,
    mnái na ndagfher co ndemne
    Dia rofitir mar rosdlig:
    ria n-itgib ána éistid. E.
  82. 285] Oegidacht úa nDrona de,
    ocus ech-thress Ossairge,
    ocus núall fri crunnu sleg
    ón t-shlúag sunnu, 's é a dered.
  83. Cid Firt Mesca atbermais de,
    290] ní hespa ní hécraite,
    is Sengarman fíar a fer,
    is sund co cían roclaided.
  84. Cid uádib sin nogairthe
    etir slúagaib samaigthe,
    295] rosdlecht cen daidbri is rosdlig:
    a Laigni na lecht éistid. E.

  85. p.24

  86. Ráth ar fhichit, is búan blad,
    i fail slúag fo tháth talman,
    'sa lín railec cor-rablaid,
    300] i fail sain-sherc saer-Charmain.
  87. Secht ndumai cen taidliud de
    do cháiniud marb co mence,
    secht maige tarmain cen tech
    fo chluiche Charmain cháintech.
  88. 305] Trí marggaid 'sin tír treóraig,
    marggad bíd, marggad beóchraid,
    marggad mór na nGall ngrécach
    i mbíd ór is ardd-étach.
  89. Fán na n-ech, fán na fuine,
    310] fán na mban, dál fri druine,
    fer do slúag
    [...]
    ngáirech
    nísmáided nísimcháined.
  90. Fil ara nemdénam de
    máile is meth is moch-léithe,
    315] ríg cen géri, cen grinni,
    cen fhéli cen fhírinni.
  91. Co se ba brígach bara
    slúag línmar lis Labrada;
    cach slúag nach saigthech bíd secc,
    320] laimther ocus ní laimet.
  92. Fáilte ic slúag nemda na nóeb
    dam, ic Dia delbda deg-chóem,
    rí cor-rath-buidnib nosrig:
    ri cach n-athchuingid éistid. E.

  93. p.26