Corpus of Electronic Texts Edition
The Metrical Dindshenchas (Author: Unknown)

poem 7

Druim n-Dairbrech

Fulartach cecinit.
  1. Cid diatá in druim Druim n-Dairbrech?
    ba mór lá rathuill teglach;
    rem dán at-chím co cuimnech
    clár buidnech mar thír Temrach.
  2. 5] Druim n-Dairbrech is dún álaind,
    múr gainmech fo thuind tóeb-sheing;
    láid baird bas greimm ria glé-raind
    fégaim din beinn aird óebind.
  3. Druim n-drech-shlemon na n-dath-bord,
    10] cuing leth-remor 'na leth-leirg,
    port mar Raigne na rath-bard,
    múr cath-garg Dairbre drech-deirg.
  4. Dairbre drech-derg mac Lulaig,
    ba prap sreth-chelg iar Samain,
    15] mac Ligmuine co leraib,
    irlaime im debaid danair.
  5. Fidgai Fochmaind is Gaileoin
    niptar moch-maill dia lán-réir:
    Firbolg, is Domnann dírím,
    20] ba sír-mín gairbe i n-gád-méin.
  6. Fine Chrecraige ind úr-óir
    Gúmóir Brecraige bán-áir,
    Mendraige Dairbre dúan-fhéil,
    ba búan-léir gairbe grán-áig.

    7. p.48

  7. 25] Tuc Tuathal na ferg fuillid
    do Dairbre derg 'mon grellaig
    maidm immach dar cach mongaig,
    cath Commair gairb ós glennaib.
  8. Dairbre drech-derg 'con drumain
    30] ní 'rondegtherb ria dremmaib:
    Tuathal cosin grúaid glonnaig
    dia chongaib chrúaid rochengail.
  9. Tuathal Techtmar in mílid,
    mór a recht-blad dar rígaib:
    35] docer Dairbre co n-dúanaib
    dia thúagaib, aidble ind ídail.
  10. In cnocc-sa catha in chomlaind,
    a éicsiu datha derbaim:
    maith dia fhir in lá labraim
    40] d'fhaglaim cid diatá in deg-druim.

    11. p.50