Corpus of Electronic Texts Edition
The Metrical Dindshenchas (Author: Unknown)
poem 5
Ochan
Cinaed Úa Hartacán cecinit.
- Déccid fera níthaig Néill
ós lettir déin díchmaig dúir:
sund for ur slige na slúag
rogab lige n-úar i n-úir.
- 5] Níall mac Echach, assa lecht,
luid fo shecht tar trethan tricht:
roreraig comarbas Cuind
co n-gaet ós muing mara h-Icht.
- Dia ráid in drong dúr din múr
10] "Áil dún décsin ríg nondlig,"
atracht in mál súas iarsein,
in gein ba h-uallchu fo nim.
- Eochu, ba h-ed ainm ind fhir
de Lagnib lir, lám co neim;
15] i tóeb Néill co n-gúalaind glain
sáidis fiad na slúagaib sleig.
- Cid ruc in Lagnech inund
fri báig Saxan n-galbech n-gand
guin ind ríg dond imram oll,
20] ingnad glond dorigned and.
- Tan nosticed cith nó chrúas
tócabtha súas, serig dúis:
ba fír flatha iar n-dáil báis:
maidm secht catha rena gnúis.
p.38
- 25] Fírían focul atbert Níall,
dia n-gaet forsin rian tria rún,
áitt i clanta ilad Néill,
co teilctís a n-géill for cúl.
- Aire-sin roléicthea ass
30] dar gáeth-rian n-glass, trom a thress,
géill Saxan, ba mór-dál mass,
géill Fhranc, géill Rómán andes.
- Lotar asin Temraig síar
fían a theglaig trelmaig tréin:
35] ba de bói iar m-baisse brón
Ochan mór muntire Néill.
- Celebrais i n-Ochain aird
cách diaraile, aidble uird,
Lagin, Mumain, rodasní,
40] Connaicht, Ulaid, Fir Lí is Luirg.
- Láech dosrimthais, ropu rí;
nírb fhand a chlí for bith-ché;
ba suail do Níall, nassad nin,
co toracht creitem dil Dé. D.
- 45] Rannsadar a maic iarsin
inis n-Airt, ba h-amra fir;
is dóib dobértar a n-géill,
céin beti neóil im gréin n-gil.
p.40
- Dá Chonall, Eogan atúaid,
50] Fiachu, Cairpre, Mane mín,
Enna, ba h-óen-baile in tshlúaig,
gabais Lóegaire do ríg.
- Rí dosrat fo thalman tói,
mairg na n-adrann for bith-ché!
55] rorand Muir Romur i n-dó
ba ar omun tuaithe Dé.
- Cland maic Cairne, cengta róe,
diamtís umle imalle,
ar imad óc ocus ech
60] nísfórfed nech acht mac Dé.
- Luid sair dia n-éis, arm-char clí,
Dathí, ba talchar fria ré;
nírb fhand a chomul for cóe
rorand in domun indé.
- 65] Ua as dech ós grían glan a gné
rochin ó Níall, násad n-glé,
Colum Cille rogab h-Í
búaid fir bí fil i tig Dé. D.
p.42