Corpus of Electronic Texts Edition
Orthanach Ua Coillama cecinit (Author: [unknown])

p.108

  1. Masu de chlaind Echdach aird
    atái, a baird, búaid cech óin,
    indid etarlam nach ndúain
    de chomram chrúaid Chobthaich Cóil.
  2. Cobthach gabais Brí's a bróen,
    ba derb ba cael gné a chuirp,
    gabsai format, fí fo bailc,
    co mbad rí for Life Luirc.
  3. Luid do ráith mo ruirech ruiss,
    rordígus, ba fingal gand,
    góita leiss Lóegaire Lorc,
    luid a mac hi tíri Gall.
  4. Gabais Cobthach cíaso chían,
    clandais slúago, sochla dál,
    degleth Ulad, errid uill,
    échtga Cuind co n-orddan n-án.
  5. Mad Cú Difne de lith lerg,
    fúadait crithre, grinne n-ard,
    isin dáil sin, sliucht nád cherb,
    clú siut Laigniu lon fri Corb.
  6. Guin íar Lugdach réo nderg ríg
    rucad a tír toirthech tríath,
    dainm dóib túath íarna ráth
    ótá Bónd co Áth Clíath.

  7. p.109

  8. Cía nád cúala lir co rían
    rígi Meiss-Gegra don Maen?
    mac Mis-Delmond dorar már,
    marbsi Conall oc 'Ath Chlaen.
  9. Abrat loga, lám dar crích,
    fuilliucht fola dar 'Ath Clíath,
    trí barrchais Berba conscáig,
    rosrir Conall i lláim lúaith.
  10. Lánrí Lagen lúin co ngairg1
    Corpre Niä-fer co feirgg,
    íar nguin Ailella dond Aird
    atbath Cet mac Mágach meirg.
  11. Medón Uisnig, ard in dind,
    dia n-atád in bruiden borr,
    ba si maten, magen ing,
    i n-abbad rí Lagen lond.
  12. Lassar medras in mbith mbúan
    Bruiden Dá Choca co n-ár,
    atbath Conchorb comnart glond
    la Cormac Cond-Longes lán.
  13. Láthrais bóromai, fó mind,
    mór a tórmach toirthech tromm,
    Túathal Techtmar, Cormac, Find,
    Fíachra Cassán cosin nGall.
  14. Cóic cét déëc, trichem tromm,
    tress blíadain birte bend,
    blíadain, aile, immed n-oll,
    a comlond líg lumnech lenn.
  15. Láthrais Cormac, gáis co sós,
    sech ba formach for a ngrés,
    fúacrais, ba fíanna in fás,
    fri trichait mblíadna in mbés.
  16. Béimend Túathail túathaig techt
    íar fecht fithre, formach n-án,
    indred Cormaic, findgen grían,
    íar nguin na n-ingen oc Fál.
  17. Finta dún ca teng na tend,
    ol at éola ecnai uill,
    ol at eana gnó grinn,
    cid dia mbóe cathró Cuind.
  18. Ce atchethed tredua cáin
    Cormaic for máil maige maith,
    is mac Ailella ind ríg
    ronír Brigit immon flaith.
  19. Fácaib Eocho2 Find fúath n-airt
    a thír arthír Lifi Luirc,
    láthrais cathu, ba caur tailc,
    tar cend Lagen fri Leth Cuirc.
  20. Cétna cath fiche, ba úath,
    ó Ardd Lúathrid luid dond ár,
    Áed mac Dergabail, trén fer,
    firend docer isinn áth.
  21. Órastarglaiss, ba orddan n-án,
    ní bu thár fri forggu fer,
    fácbaid cathair, dind cach slúaig
    la Laigniu thúaid i mMaig Breg.
  22. Ba ard císel choscair chain
    Cormac co n-áni a chuir,
    ó galaib óenfer íar tain
    dá ríg déëc dó do guin.

  23. p.110

  24. Gasta Labraid Life líg,
    Lugaid Corc den rígraid ráin,

    [...]
    debaid, flaith fír,
    Fíacha Crón co forthiu máil.
  25. Mogelni Morca mar dam,
    Eocho mac Dúin, ba trén dorn,
    dá mac Labrada cend carad
    Ailill, Etan canar gorm.
  26. Gormac Lagen lir co glend
    Corpre Liphechair, fó mind,
    fichset trí catha dar a chend
    co cath Cammair na trí lind.
  27. Lánrí Lagen lir co túaig
    Dúnlang feided flatha (feoir)3,

    [...]
    níthach nene4 úair
    atbath i cath Feda Éoin.
  28. Ó fecta cath Dromma Deirg
    tallad airriun ír co ngairg
    a Brí Éle, aurrand cháem,
    corrici taeb Uisnig aird.
  29. Arm Lagen, Gaedel cen lén(?)
    Cuind clú orddain, errid áir,
    amal leoman eter trét

    [...]
    cach
    [...]
    túata
    [...]
  30. Cord co cétaib cath

    [...]


    [...]
    end uar
    [...]


    [...]
    aig rosgab ó muir co muir.
  31. Dagmaic Áugaine co ngrád
    Cobthach, Lóegaire fria long lúath,
    fris dia tucam lór slóged n-án
    amal muir co n-anfud úar.
  32. Aill is tóla catha crúach,
    aill is córa cacha crích,
    aill is grinne fidlo find,
    aill is rinde fri neach níth.
  33. Nochotulsat flathi fíann,
    fás a ndúine, dían a mbress,
    Pátraic ás hÉrinn hi foss,
    Brigit óas hÉrind andess.
  34. Ó dosránic Brigit bán,
    Rí mórchatha rodagael,
    co cath Cobad, aurgal búan,
    i mbu búadach Aldán Áed.
  35. Imsceng Fíadat
    [...]
    dentá
    amal phupall bís im dall,
    trúag a cuinge feasa
    [...]

    dogní síl mac nÁdaim and.
  36. Ó
    [...]
    cechlaind
    [...]
    find
    atái co rind recni chaiss,

    [...]
    iar dam fadess
    dligthi Dondchad molbthach mass.
  37. Ma.