Eochu & Fælan dá mac Muredaig maic Oengusa maic Fedeilmid maic Enna maic Labrada maic Bresail Belaig maic Fiachach Baccida maic Cathair. Ro brog tra inti Fælan in n-Eochaid o thír dar muir i n-Albain, co m-bæ la Gabran mac nh-Domongairt maic Fergusa Moir maic Eircc maic Echach Muinremair.
Bæ dano a ben i fail Echach .i. Feidelm ingen Fhedelmid Findleith maic Cobthaich maic Crimthaind maic Nathi maic Fiachrach. Torrach dano ben Echach & ba h-ed ben Gabrain. Maccach dano ben Echach & ingenach ben Gabhrain. Astuidet i n-oenaidchi. Da mac la mnai Echach & dí ingin la mnai Gabrain.
Cid rucais, a ben Echach? ar ben Gabrain. Failet da mac limm isunna, ar ben Echach. Failet lim-sa isunna dano di ingein, mar nach annom, ar ben Gabrain. No-m-thesaircg-se & tuc dam indara mac & beir h-uaim indara n-ingin. Mo mind oir & mo fhail, mo delgc & mo dechelt duit.
Atetha ani-sin, ar Feidelm. Ocus ro adnacht Feidelm grainne n-oir fo slinnen & do bert uaidi am-mac & do bert ingin uaidi, co m-ba mac & ingen la cechtar n-æ.
Baistiteir na maic ar thus & in da ingin iarum. Ocus at-bert in drui triasin mh-baithis: Na bad nar lib-si, a mná, h-it emuin in da mac sa & it h-emuin in di ingin. Ocus do bert Aed & Brandub foraib.
Ro chomailit iarum h-i comaltus, cotoracht Eochaid mac Muiredaig dia thír & a mac leis & ro gab in mac sin rigi Lagen iar tain. Ro gab Aedan immorro rige n-Alban.
Ba mor uall & borrfad Aidain. Do luid for sluagod i nh-Erinn do chosnam rige h-Érenn. Ar ba toich do .i. o senathair, o Chairpre Rigfhota mac Conaire Moir maic Etarsceoil maic Eogain maic Ailella Ain maic h-Ieir maic Dedaid maic Sin.
Amlaid do thæt Aedan .i. co n-Albain & Bretnu & Saxsanu leis do inriud for h-Érind. Ocus do thæt co Laigniu do chuingid giall co Brandub. A mathair beo h-ifus ar a chind. Ocus do chuaid do chuingid chairdde co Aedán.
Ocus as-bert si: Orddan & tocad duit, a maic Gabrain! Ba coir dún fáilti frit fo daig t'athar & do mathar. Ocus in ticfa ar leth do immacallaim frim-sa? Can don mnai? ar cach. Mathair Branduib in sin, ar Aedan. Ar is caillech mo mathair-se, ar Aedan, regma do acallaim na caillige aile.
In béo do máthair? ar si. Béo écin, ar Aedan. Is bennachda dún. Dia ar a bethaid! ol sisi. Cid co-ndn-uige, a chaillech? Cairdde frim mac din chaur sa ar daig for cairddessa. Ar is Eochaid mac Muiredaig do athair & missi do máthair & Brandub do derbrathair. Ar ni bered ben Gabrain acht ingena & ni berind-se acht macco. Ocus ro chloechloichsem mac & ingen. Ocus fail uaim-si comartha innut .i. grainne óir bæ h-i cind mo deilge graiph fail fot slinnen chlé-su. Ocus topacht in grainne ass & ro lín a lepaid isin deilgc.
Do thæt Brandub do acallaim Aedain & fo gnit a cairddes do derbad. Comraichne & imairchissecht eturru ond uair sin.
At-berat araili co m-bæ Aedan i l-Laignib, co n-dechas uad co h-Albain do imchomarcc a mathar & co ro-innissetar in da mnai do feib do rola a cairddes & amail ro chlaimchaiset chlainn .i. mac & ingen cechtar n-ai.