Corpus of Electronic Texts Edition
The Irish version of the Historia Britonum of Nennius (Author: [unknown])

p.176

Appendix 1

APPENDIX


p.178

Appendix 2

I

DO FEARTAIB CAIRNICH ANN SO.

ABAS Sarran rigi m-Bretan iartain, & gabais neart Saxan & Cruithneach; & tug do shetígh ingean righ Alban .i. Babona ingean Loairnd mic Eirc; & ni h-í ro naiscedh do acht a siur .i. Erc inghean Loairnd gor trulla la Muiredhach mac Eoghain mhic Neill co h-Erind


p.180

& co ruc ceithri macu do .i. Muirceartach Mac Erca & Fearadhach & Tighéarnach & Maian.

Clanais umorro Sarran Babona co ro tuismeadh leó .u. meic .i. Luirig & Cairnech & Epscop Dallain & Caemlach; & atbail iar coscur & iar m-buaidh i taigh Martain.

Luirig, imorro, ro gab iar sin, go n-erecht a neart for Saxana, & con n-era catair foirechneach i uail mainistrech Cairnich .i. a brathair. Muirceartach Mac Erca in tan sin i uail rig Breatan


p.182

ig foglaim gaiscidh, iar na dichur a h-Erind ar na Crossana do marbadh, & iar na dichor iartain a h-Albain ar marbadh a seanathar .i. Loairnd rig Alban; conas tarla do coisearcadh a airm in tan sin co Cairndech co mac deirbhsheathar a mathar; co n-ebairt Cairnech ris, bod rig Erenn & Bretan tu chaidhchi, & do gebha neamh iardain acht co n-dichuirea Luirig do neart ata for in n-Eclais. Andsin luigh Mac Erca ga righ & atbert a h-aitheasc iar ruachtain .i. na cumthaig do chathair i uail Cairnich epscop. Dar mo Debhroth, ar Luirich, as calma form in peata aighi alltai fil aicci andas fein & in Coimdhe dia n-adhair. Teid Mac Erca fria chulu Cairnech iartain agus sloridis a h-aitheasc. Gabais fearg mor Cairnech dothain & dixit, m'itchi rom Choimdit rom Dia co rop in adbur na h-aighi sin ro gaba bas & leatsu a Mic Erca. h-Erailis Cairneach annsin ar Mac Erca techt do dichur a brathar, & gabais dothain ar aedh comrac, & ua luidh dí h-erail Cairnich do dichur in righ. Co n-dearna Dia mor mirbhuili ar Cairneach andsin .i. cor fhaedh agh n-allaigh as in t-sleibh co h-aerecht ind righ, gor derlair in

p.184

sluagh na dhiaidh ach in righ gona bandalaibh; & dixit Mac Erca, mat cialla chach a Tigearna frit clereach daig bud fulli gach aimnedh lene in cumthachta fri Luirigh. Andsin suidis Mac Erca in lorg catha i slis in righ cor comtrom; & curthaid ga clerigh & cend lais re comartha, & dixit, cend do brathar duid a Cairnic; et dixit Cairneach, leic dam-sa an cnaimh, & tomail-siu in smir, & rofia gac treas comarba sund co brath & in Erind.

Techtais geill & neart in tiri annsin, & Cairnech, fri secht m-bliadhna, im mor rigi Bretan, & Cat, & Orc, & Saxan.

Co n-dearna Mac Erca fuillind in peccaidh .i. bean Luiric do tabairt iar cathagad & iar comlengaibh co mor fri righ Frangc, a cosnam a ingene fris, co n-dorchair ic Mac Erca fodheoidh in ingen,


p.186

& cu ruc ceithri meic do .i. Constantin, & Gaedheal Ficht, o taat ruirigh Bretan & rig Breatan Cornd; Nellend a quo gens Nellan,

p.188

& Scandal in mac ele, a quo gens Scandail .i. a n-Erinn ó táit clanna na desi sin.

Co n-dernad mor-thinol clerech n-Eorpa co Torinis Martan .i. secht n-espuic .xxx. ar .ccc. ma comarba Peadair, do saighidh Cairnich epscop Toirindsi & Bretan Cornd, & na n-uili Breatnach, do dichur cacha h-eirsi, & do cheartugudh gacha tíri immurt na h-Ecalsa; & adrophart condacht martra in beatha do Chairnech ar rob é a thogha beatha martra; & fuair Cairnech .lll. epscop do thoghmar mar mailli re Cairndech dia n-eletrí, & do choidh in Lien da h-eilithri .i. a dualus Mic Erca & Muireadaigh.

Do luidh Cairndech remhe go Bretnaibh Cornd no Carnticeon, & ro cumdaigead cathoir fo talmain lais ar doigh na faicidh se tir na talumh na h-eoir; cor fuillestair nert & righi Mic Erca ré bliadhna, & co táinic co n-Erind remhe, conadh h-é cét epscop claindi Neill & Temrach, & gor bhé céd mairtír & céd manach Erend, & cétna bretheamh fear n-Erend fos.


p.190

Cor chathaidhsedar umorro Fraingc & Saxain dia eis fri Mac Erca, & gor togladh a crich & a cathair ré cian d'aimsir, & gor milleadh crichadh & cumachta na tiri ba neassa do re mete a


p.192

chumhachta & a nert; & go tanic iar sin a mor loingeas do gabail righi na h-Erend; go deisidh ic Fán Na Long for Boind, gor loiscthe lais a longa .i. gonadh uadha Fán Na Long, & gor marbad coigedhaigh na h-Erend iartain, & go ro gaib a righi do dhiles co brath do féin & dá chloind. Gor milleadh cumachta & neart Bretan dia h-eisi indsin.

Appendix 3

II.

DO INGANTAIB ERENN ANDSO DA RER LEBAIR GLIND DA LACHA.

.i. Inis Gluair a n-Irrus Domnann, ise a h-aisdi, na cuirp berar inti ni lobait iter, acht fasait a n-ingne & a fuilt & do ber gach aen inti aichni ar a athair & ar a senathair co cian iar n-egaib, & ni lobann cid in feoil arcena cen sailliud inti.


p.194

.ii. Loch n-Echach; isi a aisdi, crand cuilinn do berar ind fri secht m-bliadnaib is cloch a m-bi de is in grian, & is iarann na m-bi is in uisce, crand umorro na m-be uassu.

.iii. Tipra Locha Con i Connachtaib; isi a h-aisdi fri sin loch fil na comfocus, cuig troigid eturru do gres, cia forbrid cia sergait in loch sechid-si h-e in cach aisdi dib sin do gres.

.iu. Tipra Gabla Liuin i n-Airgiallaib; isi a aisdi fuilt dar atabar h-it liata fo cetoir.


p.196

.u. Tipra Sleibe Bladhma; isi a h-aisdi dia nos fega no dia nos taidlea neach ni an aer i tolad fleochaid co n-dentur oiffrionn & idbarta aicce.

.ui. Tipra Ratha Both i Tir Conaill; isi a aisde fri gach n-duine atos ci, mad fota a shaegul ergid anaird in a aighidh, & fo gni tonngur mor fris. Mad gairit imorro a re fos leci sis do shliac co grian.

.uii. Tipra uisce somblais i taeb in Corainn. Isi aisde in


p.198

topair sini linadh & traghad fo aisdi mara, & is cian o muir cena.

.uiii. Carn trachta Eothaili; noco luga it chither e in tan is lan ar in tan is traig, & ted muir tar na cairgib moraib na muirbeach impi san chan.

.ix. Cloch fil i Loch Na n-Onchon i sleib i fail Glinni Do Locha; isi a aisde, dia m-buailtear i do flesc tri indsaidi fleochad & grian iarum.

.x Ite annso tri h-ingantai Temra .i. mac .uii. m-bliadan do


p.200

tusmid cloinne; & lige in abuic .u. traigid do gach duine ann cia bedis beca no mora; & in Lia Fail .i. in cloc no gessed fa cach righ ar faemfad flata Temrach.

.xi. Linn muilind fil i Cluain Ferta Molua; isi a h-aisde na daine no dos fotraic inti ota braigit na linne do gnic lumu dib. Nemircoit ech imorro, ota sin suas.

.xii. Adnacul Mic Rustaing i Ruisech i Cailli Follomain i


p.202

Midi ní cumaing ben a fegad cen maidm a delma esti, no ardgaire m-baeth.

.xiii. Macradh o Chailli Fochlad .i. di ingin, Crebra & Lesra a n-anmann; ro labraidset a m-bronnaib a maithrech, & isedh asbertsat, tair a Naeb Patraic & slanaig sin.


p.204

.xiu. Sil in Faelchon i n-Osraigibh ata. Aisdi ingnad acu. Delbait iat i conaib altaid, & tiagait iat i conrechtaib, & dia marbthar iat & feoil ina m-belaib is amlaid bid na cuirp as a tiagat; & aithnit dia muinteraib nar sogluaister na cuirp, air dia n-gluaister ni thicfadsum chucu semper.

.xu. Torann mor do taidecht i n-aimsir Donnchaidh mic Domnaill


p.206

mic Murchaidh rig Erenn, gur marb .xur. ar mili i crich Corco Baiscind & co ro rann Innsi Fiti i tri.

.xui. Tri h-inganta la Cluain Mic Nois. Fer cen cend fri re secht m-bliadhan. Inte Bucuc a ainm .i. Maeltamain. In dall no ted fon Sinaind co tabrad les escung gach ladra lam & cos do. In t-adnacul fo clas i Cluain beus & ni fess & ni closs do adnacul ann, & fo frith fer mor-ulcach ind, & braena fola derge tairis, barrach uir-beithi do scuabaib cengail ime. Cuig traigi deg ina fhod, & .xxx. troiged do talamh uasu.

.xuii. Loch Laigh i crich Umaill la Connachto do elud siar co muir nad bai de acht a lathrach.


p.208

.xuiii. Loch Leibind do suud i fuil fri .ix. de cono rala i pairtib cro amail scamu cet bruithi.

.xix. Fros fola do ferthain i n-aimsir Aeda mic Neill, co frith a pairte cro fola fors na muigib im Cianacht oc Dumu In Dessa.

.xx. In mac becc do labrad i Craeb Laisre dia mis iar na gein coro turcha scela imda.

.xxi. In araili lo ro bui in fili Mac Coisi ic con Boinn como faccaba


p.210

in eltai n-eala co tarlaicc cloic doib, co ro ben dar sceith eala dib; rethis dia gabail lasodain, & do ces do co ro ba ben, & coma foacht scela uaidi cid do rala di, & can imus luaidi; & adfed-si, do i n-galar ba, olsi, & do ces do muinntir co n-erbalus, & isedh araidi is deamna rom aircellsat leo; & ros tadban in fili dia muintir.

.xxii. Da thopur filed i n-Airteraib o Ard Macha sair; marb fo cetoir in tí blaises in dala n-ai. Dia sillter umorro fo tri for sin topur n-aili atraig con baidi in ti na n-deca, conad air nach lamaid daene a tadall act mines tegmad troich.

.xxxiii. Congalach mac Mailmithigh bai in aenach Taillten in araili lo, co faccaid in loing iar san aeor, co tarlaic aen dib gai i n-diaid brattain; tarrasair in gae i fiadnaisi in aenaigh, co tainic duine as in luing ina diaid; in tanro gab a inn anuas is ann rogab


p.212

in fer anis. Co n-debert in fer anuas, atatar icom badud ar se. Lec uait do ar Congalach, & lecair suas & teid uaidib for snam iartain.

.xxiu. Araili ailitir do Gaidelaib do rala do Toirinis Martain ic tiachtain o Roim, como facca a mathair ic fodail loma & feola do bochtaib in coimded, co tall uaidi forcle in muidi i m-boi in loim, & ro bai ica iarraidh ina fiadnaisi; & ni dechaid in mathair innonn eter acht a Ros Ailithir do rigni a fodail; & ar onoir Martain do rigne, & si Caintigern mathair h-Ui Dangail mic Baethamnas do rigne in fodail; & ro taispen dia mathair in faircle iar m-bliadain iar toidecht anall do, & tuc si aichni sair, & ba cuimsi dia muidhi sen, conid de sin as follus gach fodail do gnither a n-Uaim Martain co n-geb greim i Toirinis Martain.

.xxu. In lanamain beo fri Cluain Iraird anair. Bablu & Biblu a n-anmann.

.xxui. Cloch fil i cill i n-Ulltaib, isi a h-aisti, dia crechtar in cell fuil dei theipersin esti tri trath roimi.

.xxuii. Loch Suidhi Odhrain i Sleib Guaire do elud co n-dechaidh is in Febail.


p.214

.xxuiii. Cros cloichi mor bai for faicthi Slaine I m-Bregaib do cumgabail is in aeor, & a combach is in aeor, gur rancator a buir & a bloga Tailltin & Temraigh & Findabair n-Abha.

.xxix. Tipra Mailgobann i l-Laignib; in Dech Flescach a h-ainm; os abainn Lifi ata; si a h-aisdi in fhlesc uindsend curthar inti do ni flesc cuill di fo cetoir, madu coll focerdar inti is uindsiunn do roaig esti.

.xxx. Cloictheach teneadh do aicsin ic Rus Dela fri re .ix. n-uar, & eoin duba díairimhde as, & aen en mor eturru, & no tegdis


p.216

na h-eoin bega fo clumaib in tan no teged is in cloictheach, & tancatar in aenfecht uile amach & conur gabsat coin leo na n-ingnib i n-airde, & no lecset sis co talam uaidib, & iat marb. Luidset in enlaith as iartain, & in caill for sa n-desidar d'ellig fothu co talamh, & in dairbri for sa n-desid in t-en mor ut ro fuc lais cona fremaib a talmain, & ni fes cid imluaid.

.xxxi. Inis Locha Cre i crich Eili; nis lamait ethaide boinenda no anmannai boinenna do mil no do dhuine, & ni epil pecthach indi, & ni cumacar a adnacul inte.

.xxxii. Muilenn Cilli Cess i n-Osraigib; ni mheileadh i n-Domnach acht na n-oegedh; & ni meil nach fota i n-gaidi, & ni lamait mna teacht ind.

.xxxiii. Lachain lindi Senbotho Colmain; cia dopartar in imrosc


p.218

aidchi maraen la h-uisce na lindi i cairi for tenidh cia no loiscdis feda in talman fon coiri sin ni h-aurchoitigh, & ni theg in uisce.

xxxiu. Ni aitrebait dno, loiscind no nathracha i n-Erinn uili, & cia to bertar a h-inadaib eili inti aplaid fo cetoir, & isedh son ro derbad, acht luch fael & sinnach ni bai & ni bia nach n-anna n-anmanna aurchóitech inti & is mesair ar thes & ar fhuacht. Muir tairrsi .uii. m-bliadna re m-brath.

Finit. Amen. Finit.

p.220

Appendix 4

III.

DUAN EIREANNACH.

Maelmura Othna. cc.

    1. Canam bunadas na n-Gaedel
      gair cloth n-gledend

      p.222

      canas tarla tondgur dilend
      dochum n-Erend.
    2. Citne in ferand in ro threbsat
      tuirfer Fene
      cidh dos fuc i terce tíre
      do fhuiniud gréne.
    3. Ciarso thucait rodos fogluais
      rém do thastiul,
      in do theched, nó in do cenach,
      no ind' gasciud?
    4. Ciad e as dilsiu doib for dhomun
      ind a taedin
      dia n-anmnigud in a n-atreb
      Scuitt nó Gaedil.

    5. p.224

    6. Ciamdis Fene atbertha
      do anmand dóib
      acus Gaedel andos gleid
      can dosroid.
    7. Bid nus rélfasu damsa
      cor ba tirech,
      daig it eolach i sreith senchasa
      mac Miled.
    8. Mad ail do Dia bid inniu duit
      ní ba márach
      ord senchasa mac Miled
      feib ro relad.
    9. Rig-mac Nóe náir Iafeth
      is uad ar ciniud
      do Grecaib dún conar mh-bunud
      conar n-dligud.

    10. p.226

    11. Don treib is amru ro gabsat
      flathius fuilech
      for bith broenach; o thurcbail greine
      co a fuined.
    12. Flaithem croda rogab in mh-bith
      n-glesac n-glegrach;
      Nembróth a ainm fer las n-dernad
      in tor dermar.
    13. Luid Fenius chuice as in Scithia
      for sluagad,
      fer airegda ecnaid eolach
      bruthmar bagach.
    14. Ba oen berla boí is in domun
      in ro gabsat,
      dá bérla déc ar tri fichtib
      tan ro scarsat.

    15. p.228

    16. Scol mór la Faenius ic foglaim
      in cech ergna,
      fer ard adma ro bíd co amra
      in cech berlu.
    17. Bretha mac do Faenius Farsaid
      ba dual co brath,
      ar cumtach in tuir la tuaith talman
      Nél da rograd.
    18. Rancatar scela co Foraind
      la mhet nh-gretha,
      Nél mac Faeniusa ica filet
      berla in betha.
    19. Bretha Nél fa des in Egipt
      féin n-guirm n-gle-se,

      p.230

      do breth ingen Fhoraind
      dó dar ése.
    20. Ruc Scotta scíth mac do Neól
      ar n-dul in Aegipt,
      err cet catha Goedel Glass
      fír flatha fhegelt.
    21. Feni o Fhaenius as a m-bertor,
      clú cen dochta,
      Gaedil o Gaediul Glas garta
      Scuitt o Scotta.
    22. Síd mór i m-batar la Fhoraind
      la meit n-uabair;
      ropdar duanaich i n-dálaibh
      ropdar sluagaig.
    23. Sluag tuathe Dé léices Foraind
      uad ar omun,
      gebes for a slicht co dremun
      co muir Romur.

    24. p.232

    25. Bátir Foraind a lín uili
      adbul cairdde,
      terna tuath De da tír,
      ní ros báid ind fhairgge.
    26. Atraigset clanna Niúil ferg Foraind,
      combtar brónaig,
      dáig nach dechatar don digail
      las in coraid.
    27. Cid in tan na terna Foraind
      don riad raenach,
      tuatha Egept ecla la claind Néoil
      dia n-daerad.
    28. Tallsatar liberna Foraind
      a tír trebsat,
      in aidchi uair dar belach
      Mara Ruaid sairset.
    29. Raiset sech Indé sech Assia,
      ar don fessid,
      don Scithia, co m-bríg n-uasail,
      da tír fessin.

    30. p.234

    31. For muncind Mara Caisp gabsat
      cethirn dilis
      faracsat Glass in Coronis
      ar Muir Libis.
    32. Luid Srú mac Esriu iartanaib
      ba cen miffri
      timchell atuaid trom co dathe
      Slebe Riffi.
    33. Ro gab a n-Golgatha gaethach
      comol grianda

      p.236

      anais and a chland cen digna
      dá cét mh-bliadhna.
    34. Brath mac Deagatha dos n-ainich
      rigda isretha,
      asin co h-em egraid fothuaid
      i tuascert m-beatha.
    35. Ba de gabais iar n-Gaethlaigib
      co h-indsib
      rigda a loingsin tascnam mara
      Tarrian trillsich.
    36. Do Chreit do Shicil ros rersat
      ros ri tinrem

      p.238

      sech colomna Hercuil adbuil
      d'h-Espáin indlib.
    37. Ua Deatha ruaid don rigraid
      rida in forand
      gebes Espáin in fer foroll
      in tí Bregond.
    38. Brigantia ainm na cathrach
      na cét n'airech,

      p.240

      tor mh-Bregoin assaide in subach
      for-sa suidea.
    39. Sairtuaid as tur atchess h-Erinn
      do iath Lumnig;
      fescur gemrid fos fuair Ith
      mac Bregoin buidnig.
    40. Ba mh-Brentracht do rala,
      co lucht a theglaig,
      cetna marb dia chenel chongbaid
      bebla Slemnaib.
    41. Sairdes bretha Ith in Espáin
      iar na brígaib
      tren dollotar meic mil Mile
      dia digail.

    42. p.242

    43. Dond Colptha Amairgen glun gel
      fer tren tírech
      Ir scéo Eber h-Erimon
      se meic Miled.
    44. Mac Itha Lugaid cain crechach
      coscrach cathach
      Dar ler lethan dolluid
      do digail a athar.
    45. Bui Bregain bruthmara beoda,
      feib ros ríme
      Blod, Corp, Cualgne, Righbhard
      Tigern mac Brige.
    46. Batar cethri athig fhichet
      nir bo uabor
      ic irraí narrig cen baigul
      for sin t-shluagod.
    47. Sluindfet-sa duib uili a n-anmand
      mar dos raeraig
      iar na n-arim boí dias díb
      i fail cech oenfhir.

    48. p.244

    49. Aidne Aile Assal Mitte
      Morba Mide
      Cuib Cliu Cira Sair Slán Lige
      Life Line.
    50. Ligin Traig Dollotar Aire
      Nai Dess Aine
      Fea foruair mínlech mh-brogai
      Femin Fera.
    51. Fos dailset cland Breogain buidnech
      ba gen mibail,
      comtís fognaimthe na trenfhir
      do na rigaib.
    52. Ruc Cruithne mac Cinge a mna uadib
      rossar n-direch
      inge Tea ben h-Erimoin,
      mic Miled.
    53. Mor saethair césait uili
      for cach mh-buadre

      p.246

      la mna Bresse la mná Basse
      la mna Buaigne.
    54. Banba a sleib Miss co na shluagaib
      siriuc tuislech
      Fótla in Eblinne asnac
      h-Eriu in Uisnrich.
    55. Adocorsat Tuatha Dea
      tria chert clitach,
      o tír tidach dar noi tonnaib
      don lir lethan.
    56. Ro gab h-Erimon co l-leith in t-shluaig
      iar n-urd tolgdai
      timchell atuaid ba gen mergle
      d'Inber Cholpthai.

    57. p.248

    58. Ro gab Dond do sin leith aile
      iar n-urd innaiss
      ba marb ic ascnam cen chomais
      descert h-Irrais.
    59. Co tuarcbad corn la lia a cheneoil
      as lir lethach
      sen treb tontech conid Tech Duinn
      de don garar.
    60. Ba h-ésin a h-edacht adbul
      dia chlaind chetaich
      cucum dom tic tissaid uili
      iar bar n-écaib.
    61. Ic Inbiur Scene ro saurset
      scél cen dúnad
      sruth dian dermar in ros fhothraic
      Fial ben Lugdach.

    62. p.250

    63. Ros dailset fo h-Erind oraig
      mar atberid
      gníset cora fri Firu Bolg
      fri cland Nemid.
    64. Nis bátar mná soirbe soíre
      ce a n-oglea
      Ar n-gait a m-ban gabsat clemnas
      Tuath Dea.
    65. Do breth dóib leth cech arba
      co muir medbar,
      iars in charddine choir chomdes,
      iars in clemnas.
    66. Ro gab h-Erimon in tuascert
      dú dia ciniud,
      Co na sencus, co na sólud,
      co na n-dligud.

    67. p.252

    68. Co na n-dúnib, co na cathaib,
      gairge regthe,
      co na n-debthaige tria oibhne,
      co na cethre.
    69. Ro gab Eber descert nh-Erenn,
      ord ro chinnius,
      co na utmaille, cona chommus,
      co na binnius.
    70. Co na buadaib, co na h-uile,
      co na aege,
      co na dersaide tria dúre,
      co na chaine, co na dene.
    71. Do chlaind h-Erimoin do Lagnib
      luath co clochda,
      Leth Cuind, Connacht, Niall fasse,
      Nial ind fhochla.

    72. p.254

    73. Fothart, na Desi, Mog Láma,
      la cur Cualnge,
      fir Dal Riatai, Corca Rinne,
      is Corcu Roeda.
    74. Rigraid clainne Echach uili Domblen,
      tuir do télaib,
      Is rigrad Airgiall a Buichne,
      co Loch Febail.

    75. p.256

    76. Fir Da Gial o Gréin co Coraid
      cen nach n-dímess,
      deg meic Maine Bresail Fiachraig Dallán,
      acus Domlen diles.
    77. Dubne dolus temen fodub
      Fothud airgnech,
      Aendia Trennia,
      Coennia cairpdech.
    78. Corpre Arad, Arad Tire,
      Arad Cliathach,
      Latharn Benntraige Inmanaig,
      Dal Find Fiatach.

    79. p.258

    80. Fodla Corpre sceo Tratraige
      ba toirm tírech,
      sluag balc buadach, muntir h-Erimoin,
      mic Miled.
    81. Maiccne Ebir Eoganachta,
      uili ardait,
      Ani, Loch Léin, Casel, Glendamain,
      Ross n-Argait.
    82. Eochu Raithlinne cen drongad
      cáin culad,
      Eoganacht cech dú i tát,
      la brigu Muman.
    83. Mathe Dál Chaiss Dal Cein cetaig,
      co nh-gail irgnai,

    84. p.260

    85. Dal Moga, Dal Cuirc, Dal Ceata,
      Galenga, Delbhna.
    86. Tratraigi cech du itat,
      Lugni im dualait,
      Lugaid Láge, Luguirne,
      acus Mogo Nuadait.
    87. Nuall clainne Lugdach mic Itha,
      Oll tond rudrag,

      p.262

      Erne Arbraige Musca Bascan,
      meic Lugdach.
    88. Lughaid Orcthe Lugaid Gala,
      Derga Oen Aible,
      rí Dúin Chermna Berre,
      Lugaid Laigde.
    89. Lán in h-Erin do chlaind Ir,
      mic Míled,
      Midir Rudraige rí Fachtna Fathach,
      cona ciniud baide.
    90. Ciar a cheithern Conmac cona
      maine muach,

      p.264

      Corcu Dallan, Corcu Eoluim
      Corco Mruad.
    91. Dál mh-Buain Confhind comil sergen,
      serb nh-gossa
      Mogh Roith ressa ciniud Fergusa
      mic Rossa.
    92. Ríge o Fachtnu Dál n-Araide
      ercda dogair
      secht Laigse Lagen co febail,
      na secht Sogain,

    93. p.266

    94. Sil Conaill Glaiss míc Eich
      ba ercdaid ogra
      Do Maig Fothaid do Maig Uisnig
      do Maig Mogna,
    95. Do Maig Sulide do Fernmaig
      do Maig Mache
      d'Inbiur Buasse bruchtait srotha
      do Iath Aiche.
    96. Eocho Maireda in maitre miad
      n-ordd n-ingnad
      dia m-borb a Lindmuine laendrech
      uas loch lindglan.
    97. Laechrad síl Rígbaird mic Brige
      báig cen gainne

      p.268

      Corc Oiche cloe cloth cen timme
      Dál saer Selle.
    98. Se cinedha nach do muntir Bregoin
      ciap-sa magen,
      Gabraighe Succa, Uí Thairsig
      Galeoin Lagen.
    99. Léir so thuirmisemar ar crónic
      cia no nh-gled?
      Inti medon acus tossach
      acus dead.
    100. Derb leam cipé rodos ríme
      o ro gabad h-Eriu

      p.270

      cona faigbe ní ba fíriu
      na bas leriu.
    101. Leor lend lenmait a sanais irs
      ro ses tulad
      muntir Bhregoin feib atberar.
      can a m-bunad.
    102. C.

Appendix 5

IV.

DUAN ALBANACH.

Dal Riada, umorro, dar labramar go lég ós iad nach f-fuil amhorus againn is in m-beagan da m-bunadhus, & craobsgaoileadh da lamhsam san leabhar-sa. Cuiream sean duain Seanchasa a ríogh ar Albain annso sios.

Marso ader ge easbadhach í iar ríomh na ríogh na rann dereanach, & fos iar slechtaibh ele:


p.272

    1. A eolcha Alban uile,
      a shluagh feuta foltbhuidhe,
      cia ceud ghabhail, an eól duíbh,
      ro ghabhasdair Albanruigh?
    2. Albanus ro ghabh, lia a shlógh,
      mac sen oirdérc Isicon,
      brathair is Briutus gan brath,
      ó ráitear Alba eathrach.
    3. Ro ionnarb a brathair bras
      Briotus tar Muir n-Icht n-amhnas,
      ro gabh Briotus Albain áin,
      go rinn fhiadhnach Fotudáin.
    4. Foda iar m-Briotus m-bláith, m-bil,
      ro ghabhsad clanna Nemhidh,

      p.274

      Erglan iar t-teacht as a loing,
      do aithle thoghla thuir Conuing.
    5. Cruithnigh ros gabhsad iarttain,
      iar t-tiachtain a h-Ereann-mhuigh,
      .x. rig tri fichit righ rán
      gabhsad díobh an Cruithean-chlár.
    6. Cathluan an céd righ diobh-soin,
      aisnedhfead daoibh go cumair,
      rob é an righ dégheanach dhíbh
      an cur calma Cusaintín.
    7. Clanna Eathach ina n-diaigh,
      gabhsad Albain iar n-áirdghliaidh,
      clanna Conaire an chaoimhfhir,
      toghaidhe na treun-Ghaoidhil.

    8. p.276

    9. Tri mec Erc mec Eachdhach ait,
      triar fuair beannachtair Pátraicc,
      ghabhsad Albain, ard a n-gus,
      Loarn, Fearghus is Aonghus.
    10. Dech m-bliadhna Loarn, lér bladh,
      i f-flaitheas oirir Alban,
      tar es Loarn fhél go n-gus,
      seacht m-bliadhna ficheat Fearghus.
    11. Domhangart mac d'Fearghus ard,
      aireamh cúig m-bliadhan m-biothgarg,
      a .xxiiii. gan troid,
      do Comhgall, mac Domhangoirt.
    12. Da bhliadhan Conaing gan táir,
      tar és Comhghaill do Gobhrán,
      tri bliadhna fo cuig gan roinn,
      ba ri Conall, mac Comhghoill.

    13. p.278

    14. Cethre bliadhna ficheat tall
      ba rí Aodhán na n-iol-rann,
      dech m-bliadhna fo seacht, seól n-glé,
      i f-flaitheas Eathach Buidhé.
    15. Connchadh Cearr ráithe, rel bladh,
      a .xui. dia mac Fearchar
      tar és Fearchair, feaghaidh rainn,
      .xiiii. bliadhna Domhnaill.
    16. Tar és Domhnaill Bric na m-bla,
      Conall, Dunghal .x. m-bliadhna,
      .xiii. bliadhna Domhnuill Duinn,
      tar és Dunghail is Chonuill.
    17. Maolduin mac Conaill na c-creach
      a .xuii. dó go dlightheach,

      p.280

      Fearchair Foda, feagha leat,
      do chaith bliadhain ar .xx.
    18. Da bliadhain Eachdhach na n-each,
      ro ba calma an rí rightheach,
      aoin bhliadhain ba flaith iarttain,
      Ainceallach maith mac Fearchair.
    19. Seacht m-bliadhna Dunghail déin,
      acus a ceathair do Ailpén,
      tri bliadhna Muireadhoigh mhaith,
      .xxx. do Aodh na árdfhlaith.
    20. A ceathair ficheat, nír fhann,
      do bhliadhnaibh do chaith Domhnall,
      da bhliadhain Conaill, cém n-glé,
      is a ceathair Chonaill ele.
    21. Naoi m-bliadhna Cusaintin chain,
      a naoi Aongusa ar Albain,

      p.282

      cethre bliadhna Aodha áin,
      is a tri déug Eoghanáin.
    22. Tríocha bliadhain Cionaoith chruaidh,
      a ceathair Domhnall drechruaidh,
      .xxx. bliadhain co na bhrígh,
      don churadh do Cusaintin.
    23. Dá bhliadhain, ba daor a dath,
      da brathair do Aodh fionnscothach,
      Domhnall, mac Cusaintin chaín,
      ró chaith bliadhain fa cheathair.
    24. Cusaintín ba calma a ghleac,
      ro chaith a sé is dá fhicheat,
      Maolcoluim cethre bliadhna,
      Iondolbh a h-ocht airdriaghla.

    25. p.284

    26. Seacht m-bliadhna Dubhoda dén,
      acus a ceathair Cuilén,
      a .xxuii. ós gach cloinn,
      do Cionaoth, mac Maoilcholuim.
    27. Seacht m-bliadhna Cusaintin cluin,
      acus a ceathair Macdhuibh,
      triochadh bliadhain, breacaid rainn,
      ba rí Monaidh Maolcolaim.
    28. Se bliadhna Donnchaid glain gaoith
      .xuii. bliadhna mac Fionnlaoich,
      tar és Mec Beathaidh go m-blaidh,
      .uii. mís i f-flaithios Lughlaigh.
    29. Maolcholuim anosa as rí,
      mac Donnchaidh dhata dhrechbhi,
      a ré nocha n-fidir neach,
      acht an t-eólach as éolach. A eolcha.

    30. p.286

    31. Dá rígh fór chaogad, cluine,
      go mac Donnchaidh drich ruire,
      do shiol Erc ardghlain anoir,
      gabsad Albain a eólaigh.