ABAS Sarran rigi m-Bretan iartain, & gabais neart Saxan & Cruithneach; & tug do shetígh ingean righ Alban .i. Babona ingean Loairnd mic Eirc; & ni h-í ro naiscedh do acht a siur .i. Erc inghean Loairnd gor trulla la Muiredhach mac Eoghain mhic Neill co h-Erind
Clanais umorro Sarran Babona co ro tuismeadh leó .u. meic .i. Luirig & Cairnech & Epscop Dallain & Caemlach; & atbail iar coscur & iar m-buaidh i taigh Martain.
Luirig, imorro, ro gab iar sin, go n-erecht a neart for Saxana, & con n-era catair foirechneach i uail mainistrech Cairnich .i. a brathair. Muirceartach Mac Erca in tan sin i uail rig Breatan
Techtais geill & neart in tiri annsin, & Cairnech, fri secht m-bliadhna, im mor rigi Bretan, & Cat, & Orc, & Saxan.
Co n-dearna Mac Erca fuillind in peccaidh .i. bean Luiric do tabairt iar cathagad & iar comlengaibh co mor fri righ Frangc, a cosnam a ingene fris, co n-dorchair ic Mac Erca fodheoidh in ingen,
Co n-dernad mor-thinol clerech n-Eorpa co Torinis Martan .i. secht n-espuic .xxx. ar .ccc. ma comarba Peadair, do saighidh Cairnich epscop Toirindsi & Bretan Cornd, & na n-uili Breatnach, do dichur cacha h-eirsi, & do cheartugudh gacha tíri immurt na h-Ecalsa; & adrophart condacht martra in beatha do Chairnech ar rob é a thogha beatha martra; & fuair Cairnech .lll. epscop do thoghmar mar mailli re Cairndech dia n-eletrí, & do choidh in Lien da h-eilithri .i. a dualus Mic Erca & Muireadaigh.
Do luidh Cairndech remhe go Bretnaibh Cornd no Carnticeon, & ro cumdaigead cathoir fo talmain lais ar doigh na faicidh se tir na talumh na h-eoir; cor fuillestair nert & righi Mic Erca ré bliadhna, & co táinic co n-Erind remhe, conadh h-é cét epscop claindi Neill & Temrach, & gor bhé céd mairtír & céd manach Erend, & cétna bretheamh fear n-Erend fos.
Cor chathaidhsedar umorro Fraingc & Saxain dia eis fri Mac Erca, & gor togladh a crich & a cathair ré cian d'aimsir, & gor milleadh crichadh & cumachta na tiri ba neassa do re mete a
.i. Inis Gluair a n-Irrus Domnann, ise a h-aisdi, na cuirp berar inti ni lobait iter, acht fasait a n-ingne & a fuilt & do ber gach aen inti aichni ar a athair & ar a senathair co cian iar n-egaib, & ni lobann cid in feoil arcena cen sailliud inti.
.ii. Loch n-Echach; isi a aisdi, crand cuilinn do berar ind fri secht m-bliadnaib is cloch a m-bi de is in grian, & is iarann na m-bi is in uisce, crand umorro na m-be uassu.
.iii. Tipra Locha Con i Connachtaib; isi a h-aisdi fri sin loch fil na comfocus, cuig troigid eturru do gres, cia forbrid cia sergait in loch sechid-si h-e in cach aisdi dib sin do gres.
.iu. Tipra Gabla Liuin i n-Airgiallaib; isi a aisdi fuilt dar atabar h-it liata fo cetoir.
.u. Tipra Sleibe Bladhma; isi a h-aisdi dia nos fega no dia nos taidlea neach ni an aer i tolad fleochaid co n-dentur oiffrionn & idbarta aicce.
.ui. Tipra Ratha Both i Tir Conaill; isi a aisde fri gach n-duine atos ci, mad fota a shaegul ergid anaird in a aighidh, & fo gni tonngur mor fris. Mad gairit imorro a re fos leci sis do shliac co grian.
.uii. Tipra uisce somblais i taeb in Corainn. Isi aisde in
.uiii. Carn trachta Eothaili; noco luga it chither e in tan is lan ar in tan is traig, & ted muir tar na cairgib moraib na muirbeach impi san chan.
.ix. Cloch fil i Loch Na n-Onchon i sleib i fail Glinni Do Locha; isi a aisde, dia m-buailtear i do flesc tri indsaidi fleochad & grian iarum.
.x Ite annso tri h-ingantai Temra .i. mac .uii. m-bliadan do
.xi. Linn muilind fil i Cluain Ferta Molua; isi a h-aisde na daine no dos fotraic inti ota braigit na linne do gnic lumu dib. Nemircoit ech imorro, ota sin suas.
.xii. Adnacul Mic Rustaing i Ruisech i Cailli Follomain i
.xiii. Macradh o Chailli Fochlad .i. di ingin, Crebra & Lesra a n-anmann; ro labraidset a m-bronnaib a maithrech, & isedh asbertsat, tair a Naeb Patraic & slanaig sin.
.xiu. Sil in Faelchon i n-Osraigibh ata. Aisdi ingnad acu. Delbait iat i conaib altaid, & tiagait iat i conrechtaib, & dia marbthar iat & feoil ina m-belaib is amlaid bid na cuirp as a tiagat; & aithnit dia muinteraib nar sogluaister na cuirp, air dia n-gluaister ni thicfadsum chucu semper.
.xu. Torann mor do taidecht i n-aimsir Donnchaidh mic Domnaill
.xui. Tri h-inganta la Cluain Mic Nois. Fer cen cend fri re secht m-bliadhan. Inte Bucuc a ainm .i. Maeltamain. In dall no ted fon Sinaind co tabrad les escung gach ladra lam & cos do. In t-adnacul fo clas i Cluain beus & ni fess & ni closs do adnacul ann, & fo frith fer mor-ulcach ind, & braena fola derge tairis, barrach uir-beithi do scuabaib cengail ime. Cuig traigi deg ina fhod, & .xxx. troiged do talamh uasu.
.xuii. Loch Laigh i crich Umaill la Connachto do elud siar co muir nad bai de acht a lathrach.
.xuiii. Loch Leibind do suud i fuil fri .ix. de cono rala i pairtib cro amail scamu cet bruithi.
.xix. Fros fola do ferthain i n-aimsir Aeda mic Neill, co frith a pairte cro fola fors na muigib im Cianacht oc Dumu In Dessa.
.xx. In mac becc do labrad i Craeb Laisre dia mis iar na gein coro turcha scela imda.
.xxi. In araili lo ro bui in fili Mac Coisi ic con Boinn como faccaba
.xxii. Da thopur filed i n-Airteraib o Ard Macha sair; marb fo cetoir in tí blaises in dala n-ai. Dia sillter umorro fo tri for sin topur n-aili atraig con baidi in ti na n-deca, conad air nach lamaid daene a tadall act mines tegmad troich.
.xxxiii. Congalach mac Mailmithigh bai in aenach Taillten in araili lo, co faccaid in loing iar san aeor, co tarlaic aen dib gai i n-diaid brattain; tarrasair in gae i fiadnaisi in aenaigh, co tainic duine as in luing ina diaid; in tanro gab a inn anuas is ann rogab
.xxiu. Araili ailitir do Gaidelaib do rala do Toirinis Martain ic tiachtain o Roim, como facca a mathair ic fodail loma & feola do bochtaib in coimded, co tall uaidi forcle in muidi i m-boi in loim, & ro bai ica iarraidh ina fiadnaisi; & ni dechaid in mathair innonn eter acht a Ros Ailithir do rigni a fodail; & ar onoir Martain do rigne, & si Caintigern mathair h-Ui Dangail mic Baethamnas do rigne in fodail; & ro taispen dia mathair in faircle iar m-bliadain iar toidecht anall do, & tuc si aichni sair, & ba cuimsi dia muidhi sen, conid de sin as follus gach fodail do gnither a n-Uaim Martain co n-geb greim i Toirinis Martain.
.xxu. In lanamain beo fri Cluain Iraird anair. Bablu & Biblu a n-anmann.
.xxui. Cloch fil i cill i n-Ulltaib, isi a h-aisti, dia crechtar in cell fuil dei theipersin esti tri trath roimi.
.xxuii. Loch Suidhi Odhrain i Sleib Guaire do elud co n-dechaidh is in Febail.
.xxuiii. Cros cloichi mor bai for faicthi Slaine I m-Bregaib do cumgabail is in aeor, & a combach is in aeor, gur rancator a buir & a bloga Tailltin & Temraigh & Findabair n-Abha.
.xxix. Tipra Mailgobann i l-Laignib; in Dech Flescach a h-ainm; os abainn Lifi ata; si a h-aisdi in fhlesc uindsend curthar inti do ni flesc cuill di fo cetoir, madu coll focerdar inti is uindsiunn do roaig esti.
.xxx. Cloictheach teneadh do aicsin ic Rus Dela fri re .ix. n-uar, & eoin duba díairimhde as, & aen en mor eturru, & no tegdis
.xxxi. Inis Locha Cre i crich Eili; nis lamait ethaide boinenda no anmannai boinenna do mil no do dhuine, & ni epil pecthach indi, & ni cumacar a adnacul inte.
.xxxii. Muilenn Cilli Cess i n-Osraigib; ni mheileadh i n-Domnach acht na n-oegedh; & ni meil nach fota i n-gaidi, & ni lamait mna teacht ind.
.xxxiii. Lachain lindi Senbotho Colmain; cia dopartar in imrosc
xxxiu. Ni aitrebait dno, loiscind no nathracha i n-Erinn uili, & cia to bertar a h-inadaib eili inti aplaid fo cetoir, & isedh son ro derbad, acht luch fael & sinnach ni bai & ni bia nach n-anna n-anmanna aurchóitech inti & is mesair ar thes & ar fhuacht. Muir tairrsi .uii. m-bliadna re m-brath.
Maelmura Othna. cc.
- Canam bunadas na n-Gaedel
gair cloth n-gledend
canas tarla tondgur dilend
dochum n-Erend.- Citne in ferand in ro threbsat
tuirfer Fene
cidh dos fuc i terce tíre
do fhuiniud gréne.- Ciarso thucait rodos fogluais
rém do thastiul,
in do theched, nó in do cenach,
no ind' gasciud?- Ciad e as dilsiu doib for dhomun
ind a taedin
dia n-anmnigud in a n-atreb
Scuitt nó Gaedil.
- Ciamdis Fene atbertha
do anmand dóib
acus Gaedel andos gleid
can dosroid.- Bid nus rélfasu damsa
cor ba tirech,
daig it eolach i sreith senchasa
mac Miled.- Mad ail do Dia bid inniu duit
ní ba márach
ord senchasa mac Miled
feib ro relad.- Rig-mac Nóe náir Iafeth
is uad ar ciniud
do Grecaib dún conar mh-bunud
conar n-dligud.
- Don treib is amru ro gabsat
flathius fuilech
for bith broenach; o thurcbail greine
co a fuined.- Flaithem croda rogab in mh-bith
n-glesac n-glegrach;
Nembróth a ainm fer las n-dernad
in tor dermar.- Luid Fenius chuice as in Scithia
for sluagad,
fer airegda ecnaid eolach
bruthmar bagach.- Ba oen berla boí is in domun
in ro gabsat,
dá bérla déc ar tri fichtib
tan ro scarsat.
- Scol mór la Faenius ic foglaim
in cech ergna,
fer ard adma ro bíd co amra
in cech berlu.- Bretha mac do Faenius Farsaid
ba dual co brath,
ar cumtach in tuir la tuaith talman
Nél da rograd.- Rancatar scela co Foraind
la mhet nh-gretha,
Nél mac Faeniusa ica filet
berla in betha.- Bretha Nél fa des in Egipt
féin n-guirm n-gle-se,
do breth ingen Fhoraind
dó dar ése.- Ruc Scotta scíth mac do Neól
ar n-dul in Aegipt,
err cet catha Goedel Glass
fír flatha fhegelt.- Feni o Fhaenius as a m-bertor,
clú cen dochta,
Gaedil o Gaediul Glas garta
Scuitt o Scotta.- Síd mór i m-batar la Fhoraind
la meit n-uabair;
ropdar duanaich i n-dálaibh
ropdar sluagaig.- Sluag tuathe Dé léices Foraind
uad ar omun,
gebes for a slicht co dremun
co muir Romur.
- Bátir Foraind a lín uili
adbul cairdde,
terna tuath De da tír,
ní ros báid ind fhairgge.- Atraigset clanna Niúil ferg Foraind,
combtar brónaig,
dáig nach dechatar don digail
las in coraid.- Cid in tan na terna Foraind
don riad raenach,
tuatha Egept ecla la claind Néoil
dia n-daerad.- Tallsatar liberna Foraind
a tír trebsat,
in aidchi uair dar belach
Mara Ruaid sairset.- Raiset sech Indé sech Assia,
ar don fessid,
don Scithia, co m-bríg n-uasail,
da tír fessin.
- For muncind Mara Caisp gabsat
cethirn dilis
faracsat Glass in Coronis
ar Muir Libis.- Luid Srú mac Esriu iartanaib
ba cen miffri
timchell atuaid trom co dathe
Slebe Riffi.- Ro gab a n-Golgatha gaethach
comol grianda
anais and a chland cen digna
dá cét mh-bliadhna.- Brath mac Deagatha dos n-ainich
rigda isretha,
asin co h-em egraid fothuaid
i tuascert m-beatha.- Ba de gabais iar n-Gaethlaigib
co h-indsib
rigda a loingsin tascnam mara
Tarrian trillsich.- Do Chreit do Shicil ros rersat
ros ri tinrem
sech colomna Hercuil adbuil
d'h-Espáin indlib.- Ua Deatha ruaid don rigraid
rida in forand
gebes Espáin in fer foroll
in tí Bregond.- Brigantia ainm na cathrach
na cét n'airech,
tor mh-Bregoin assaide in subach
for-sa suidea.- Sairtuaid as tur atchess h-Erinn
do iath Lumnig;
fescur gemrid fos fuair Ith
mac Bregoin buidnig.- Ba mh-Brentracht do rala,
co lucht a theglaig,
cetna marb dia chenel chongbaid
bebla Slemnaib.- Sairdes bretha Ith in Espáin
iar na brígaib
tren dollotar meic mil Mile
dia digail.
- Dond Colptha Amairgen glun gel
fer tren tírech
Ir scéo Eber h-Erimon
se meic Miled.- Mac Itha Lugaid cain crechach
coscrach cathach
Dar ler lethan dolluid
do digail a athar.- Bui Bregain bruthmara beoda,
feib ros ríme
Blod, Corp, Cualgne, Righbhard
Tigern mac Brige.- Batar cethri athig fhichet
nir bo uabor
ic irraí narrig cen baigul
for sin t-shluagod.- Sluindfet-sa duib uili a n-anmand
mar dos raeraig
iar na n-arim boí dias díb
i fail cech oenfhir.
- Aidne Aile Assal Mitte
Morba Mide
Cuib Cliu Cira Sair Slán Lige
Life Line.- Ligin Traig Dollotar Aire
Nai Dess Aine
Fea foruair mínlech mh-brogai
Femin Fera.- Fos dailset cland Breogain buidnech
ba gen mibail,
comtís fognaimthe na trenfhir
do na rigaib.- Ruc Cruithne mac Cinge a mna uadib
rossar n-direch
inge Tea ben h-Erimoin,
mic Miled.- Mor saethair césait uili
for cach mh-buadre
la mna Bresse la mná Basse
la mna Buaigne.- Banba a sleib Miss co na shluagaib
siriuc tuislech
Fótla in Eblinne asnac
h-Eriu in Uisnrich.- Adocorsat Tuatha Dea
tria chert clitach,
o tír tidach dar noi tonnaib
don lir lethan.- Ro gab h-Erimon co l-leith in t-shluaig
iar n-urd tolgdai
timchell atuaid ba gen mergle
d'Inber Cholpthai.
- Ro gab Dond do sin leith aile
iar n-urd innaiss
ba marb ic ascnam cen chomais
descert h-Irrais.- Co tuarcbad corn la lia a cheneoil
as lir lethach
sen treb tontech conid Tech Duinn
de don garar.- Ba h-ésin a h-edacht adbul
dia chlaind chetaich
cucum dom tic tissaid uili
iar bar n-écaib.- Ic Inbiur Scene ro saurset
scél cen dúnad
sruth dian dermar in ros fhothraic
Fial ben Lugdach.
- Ros dailset fo h-Erind oraig
mar atberid
gníset cora fri Firu Bolg
fri cland Nemid.- Nis bátar mná soirbe soíre
ce a n-oglea
Ar n-gait a m-ban gabsat clemnas
Tuath Dea.- Do breth dóib leth cech arba
co muir medbar,
iars in charddine choir chomdes,
iars in clemnas.- Ro gab h-Erimon in tuascert
dú dia ciniud,
Co na sencus, co na sólud,
co na n-dligud.
- Co na n-dúnib, co na cathaib,
gairge regthe,
co na n-debthaige tria oibhne,
co na cethre.- Ro gab Eber descert nh-Erenn,
ord ro chinnius,
co na utmaille, cona chommus,
co na binnius.- Co na buadaib, co na h-uile,
co na aege,
co na dersaide tria dúre,
co na chaine, co na dene.- Do chlaind h-Erimoin do Lagnib
luath co clochda,
Leth Cuind, Connacht, Niall fasse,
Nial ind fhochla.
- Fothart, na Desi, Mog Láma,
la cur Cualnge,
fir Dal Riatai, Corca Rinne,
is Corcu Roeda.- Rigraid clainne Echach uili Domblen,
tuir do télaib,
Is rigrad Airgiall a Buichne,
co Loch Febail.
- Fir Da Gial o Gréin co Coraid
cen nach n-dímess,
deg meic Maine Bresail Fiachraig Dallán,
acus Domlen diles.- Dubne dolus temen fodub
Fothud airgnech,
Aendia Trennia,
Coennia cairpdech.- Corpre Arad, Arad Tire,
Arad Cliathach,
Latharn Benntraige Inmanaig,
Dal Find Fiatach.
- Fodla Corpre sceo Tratraige
ba toirm tírech,
sluag balc buadach, muntir h-Erimoin,
mic Miled.- Maiccne Ebir Eoganachta,
uili ardait,
Ani, Loch Léin, Casel, Glendamain,
Ross n-Argait.- Eochu Raithlinne cen drongad
cáin culad,
Eoganacht cech dú i tát,
la brigu Muman.- Mathe Dál Chaiss Dal Cein cetaig,
co nh-gail irgnai,
Dal Moga, Dal Cuirc, Dal Ceata,
Galenga, Delbhna.- Tratraigi cech du itat,
Lugni im dualait,
Lugaid Láge, Luguirne,
acus Mogo Nuadait.- Nuall clainne Lugdach mic Itha,
Oll tond rudrag,
Erne Arbraige Musca Bascan,
meic Lugdach.- Lughaid Orcthe Lugaid Gala,
Derga Oen Aible,
rí Dúin Chermna Berre,
Lugaid Laigde.- Lán in h-Erin do chlaind Ir,
mic Míled,
Midir Rudraige rí Fachtna Fathach,
cona ciniud baide.- Ciar a cheithern Conmac cona
maine muach,
Corcu Dallan, Corcu Eoluim
Corco Mruad.- Dál mh-Buain Confhind comil sergen,
serb nh-gossa
Mogh Roith ressa ciniud Fergusa
mic Rossa.- Ríge o Fachtnu Dál n-Araide
ercda dogair
secht Laigse Lagen co febail,
na secht Sogain,
- Sil Conaill Glaiss míc Eich
ba ercdaid ogra
Do Maig Fothaid do Maig Uisnig
do Maig Mogna,- Do Maig Sulide do Fernmaig
do Maig Mache
d'Inbiur Buasse bruchtait srotha
do Iath Aiche.- Eocho Maireda in maitre miad
n-ordd n-ingnad
dia m-borb a Lindmuine laendrech
uas loch lindglan.- Laechrad síl Rígbaird mic Brige
báig cen gainne
Corc Oiche cloe cloth cen timme
Dál saer Selle.- Se cinedha nach do muntir Bregoin
ciap-sa magen,
Gabraighe Succa, Uí Thairsig
Galeoin Lagen.- Léir so thuirmisemar ar crónic
cia no nh-gled?
Inti medon acus tossach
acus dead.- Derb leam cipé rodos ríme
o ro gabad h-Eriu
cona faigbe ní ba fíriu
na bas leriu.- Leor lend lenmait a sanais irs
ro ses tulad
muntir Bhregoin feib atberar.
can a m-bunad.C.
Dal Riada, umorro, dar labramar go lég ós iad nach f-fuil amhorus againn is in m-beagan da m-bunadhus, & craobsgaoileadh da lamhsam san leabhar-sa. Cuiream sean duain Seanchasa a ríogh ar Albain annso sios.
Marso ader ge easbadhach í iar ríomh na ríogh na rann dereanach, & fos iar slechtaibh ele:
- A eolcha Alban uile,
a shluagh feuta foltbhuidhe,
cia ceud ghabhail, an eól duíbh,
ro ghabhasdair Albanruigh?- Albanus ro ghabh, lia a shlógh,
mac sen oirdérc Isicon,
brathair is Briutus gan brath,
ó ráitear Alba eathrach.- Ro ionnarb a brathair bras
Briotus tar Muir n-Icht n-amhnas,
ro gabh Briotus Albain áin,
go rinn fhiadhnach Fotudáin.- Foda iar m-Briotus m-bláith, m-bil,
ro ghabhsad clanna Nemhidh,
Erglan iar t-teacht as a loing,
do aithle thoghla thuir Conuing.- Cruithnigh ros gabhsad iarttain,
iar t-tiachtain a h-Ereann-mhuigh,
.x. rig tri fichit righ rán
gabhsad díobh an Cruithean-chlár.- Cathluan an céd righ diobh-soin,
aisnedhfead daoibh go cumair,
rob é an righ dégheanach dhíbh
an cur calma Cusaintín.- Clanna Eathach ina n-diaigh,
gabhsad Albain iar n-áirdghliaidh,
clanna Conaire an chaoimhfhir,
toghaidhe na treun-Ghaoidhil.
- Tri mec Erc mec Eachdhach ait,
triar fuair beannachtair Pátraicc,
ghabhsad Albain, ard a n-gus,
Loarn, Fearghus is Aonghus.- Dech m-bliadhna Loarn, lér bladh,
i f-flaitheas oirir Alban,
tar es Loarn fhél go n-gus,
seacht m-bliadhna ficheat Fearghus.- Domhangart mac d'Fearghus ard,
aireamh cúig m-bliadhan m-biothgarg,
a .xxiiii. gan troid,
do Comhgall, mac Domhangoirt.- Da bhliadhan Conaing gan táir,
tar és Comhghaill do Gobhrán,
tri bliadhna fo cuig gan roinn,
ba ri Conall, mac Comhghoill.
- Cethre bliadhna ficheat tall
ba rí Aodhán na n-iol-rann,
dech m-bliadhna fo seacht, seól n-glé,
i f-flaitheas Eathach Buidhé.- Connchadh Cearr ráithe, rel bladh,
a .xui. dia mac Fearchar
tar és Fearchair, feaghaidh rainn,
.xiiii. bliadhna Domhnaill.- Tar és Domhnaill Bric na m-bla,
Conall, Dunghal .x. m-bliadhna,
.xiii. bliadhna Domhnuill Duinn,
tar és Dunghail is Chonuill.- Maolduin mac Conaill na c-creach
a .xuii. dó go dlightheach,
Fearchair Foda, feagha leat,
do chaith bliadhain ar .xx.- Da bliadhain Eachdhach na n-each,
ro ba calma an rí rightheach,
aoin bhliadhain ba flaith iarttain,
Ainceallach maith mac Fearchair.- Seacht m-bliadhna Dunghail déin,
acus a ceathair do Ailpén,
tri bliadhna Muireadhoigh mhaith,
.xxx. do Aodh na árdfhlaith.- A ceathair ficheat, nír fhann,
do bhliadhnaibh do chaith Domhnall,
da bhliadhain Conaill, cém n-glé,
is a ceathair Chonaill ele.- Naoi m-bliadhna Cusaintin chain,
a naoi Aongusa ar Albain,
cethre bliadhna Aodha áin,
is a tri déug Eoghanáin.- Tríocha bliadhain Cionaoith chruaidh,
a ceathair Domhnall drechruaidh,
.xxx. bliadhain co na bhrígh,
don churadh do Cusaintin.- Dá bhliadhain, ba daor a dath,
da brathair do Aodh fionnscothach,
Domhnall, mac Cusaintin chaín,
ró chaith bliadhain fa cheathair.- Cusaintín ba calma a ghleac,
ro chaith a sé is dá fhicheat,
Maolcoluim cethre bliadhna,
Iondolbh a h-ocht airdriaghla.
- Seacht m-bliadhna Dubhoda dén,
acus a ceathair Cuilén,
a .xxuii. ós gach cloinn,
do Cionaoth, mac Maoilcholuim.- Seacht m-bliadhna Cusaintin cluin,
acus a ceathair Macdhuibh,
triochadh bliadhain, breacaid rainn,
ba rí Monaidh Maolcolaim.- Se bliadhna Donnchaid glain gaoith
.xuii. bliadhna mac Fionnlaoich,
tar és Mec Beathaidh go m-blaidh,
.uii. mís i f-flaithios Lughlaigh.- Maolcholuim anosa as rí,
mac Donnchaidh dhata dhrechbhi,
a ré nocha n-fidir neach,
acht an t-eólach as éolach. A eolcha.
- Dá rígh fór chaogad, cluine,
go mac Donnchaidh drich ruire,
do shiol Erc ardghlain anoir,
gabsad Albain a eólaigh.