Corpus of Electronic Texts Edition
Chronicon Scotorum (Author: [unknown])

Annal CS1086

Kl. Enair.

Maoiliosa h. Brolacan sruitsenóir Erenn & saoi ecna & aircedoil quieuit.

Tairdelbach h. Briain rí urmoir Erenn regni anno .xx. ii. uitam feliciter finiuit.

Maidm na Crincha ria nGallaibh & Laignibh for Maolseclainn mac Concupair ubi ceciderunt Maolciarain h. Catasaigh & h. Maoilmhuaidh rí fFer Ceall et alii.

An Sinnach Finn h. Caturnaigh .i. Cinaoth rí Tebta & a mac & h. Muiredhaigh taoisech Muintire Tlamain do marbadh a ffill ó Maolseclainn mac Concupair i lLoch Muighe hUatha.

H. Baoigealláin rí Airgiall occisus est o Conaillibh.

Annal CS1087

Kl.

Maolseclainn mac Concupair ri Temrach do marbad d'feraibh Teabtha a n-Ardachadh per dolum.

Maolruanaidh h. Airt rí Tebtha moritur.

Cath Conacla {.i. a Corainn} la Ruaidri h. Concupair & Cormac h. Cillin ardsecnab Sil Muiredhaigh & mada Ciaran 'na laimh resan cath dia mbaoi da cur eidir Connachtaibh & Conmaicnibh gur raeimhedh for Conmaicnibh dú a ttorchair {MS folio 212vb(326b)} Aodh mac Airt h. Ruairc ri Conmaicne & Muiredhach h. Eolais & Sitriog mac Con Slebhe h. Fergail & mac Gafraid h. Siridén et alii. Ruaidri h. Concupair uictor fuit.

Cath Rata Edair eidir Laignibh & feraibh Muman gur raoimedh for Laignibh. Muircertach h. Briain uictor fuit.

Annal CS1088

Kl.

Maidm la Ruaidri h. Concupair ag Inis Ardachaidh for Muircertach h. m-Briain dú an ro marbadh ár Muimnech. Ar aile Muimnech la Ruaidri h. Concupair. Inradh Corcumrúaidh la Ruaidri h. Concupair, is inbhechtain nochar fhagsat boin no duine gan malairt. Do rocrattur ann tri baoghal tríar maith do Connachtaibh .i.

p.256

mac Cathail h. Mugroin taoisech Clainne Cathail et Cu Sinna mac Muirchertaigh taoisech Clainne Tomaltaigh & mac Gilla Crist mac Ectigern taoisech Corca Aclann. Coinnmedh caoicidhis ó Ruaidri h. Concupair do Domnall mac meic Lochlainn & do Conall & d'Eogan. Do cuattur iar sin Connachta & lucht an tuaisgeirt i Mumhain gur indreattur go hImlech lbair & go Loch Gair & Brugh Righ & Dun Aiched & go Drumain h. Clercin & gur mursat Luimnech & go ttugsat cenn meic Cailigh o Chnocoibh Sainngil & gur togailsiot Cenn Coradh & gur fagbaidhsit ocht .xx. laoch ann eider Gullu & Gaoidealu & co ra g{a}baisit gialla dibh go rugsat leo mac Madudain h. Cinnedigh {MS folio 213ra(327a)} este et mac Congaluig h. Ocain et mac Echach h. Luingsigh go ttugadh ba & ór et ech et airged & cuirn tar a chenn ó Murchadh h. Briain.

Tigernach h. Braín do Sil Muiredhaigh comar{ba Ciar}ain Cluana M Nois & Comain quieuit.

Dup Cablaigh ingen Aodha h. Concupuir moritur.

Mor ingen Tairdealbaigh h. Briain ben Ruaidri h. Concupair moritur.

Ua Maoilgirc ollam Erenn quieuit.

Annal CS1089

Kl.

Donnchadh mac Domnaill Remair rí Laigen et Gall do marbadh do Concupur h. Concupair Failgig.

Coblach ffer Muman do toighect for Sinainn & for Loch Ribh gur airgsiot Inis Clotrann et Inis Bó Finne & Inis Engin & Cluain Emain gur dunadh Aidhircech & Recráith dar a n-és la Ruaidrí h. Concupair & co ndechattur lucht an coblaigh for cumairce h. Maoilseclainn go ffargsat a longa aige co ndechaidh h. Concupair ar creich a Mumhain go Cill Dalua & go Dál cCaiss isna longaibh sin & h. Maoilseclainn i n-Uaitnibh Tire & a nUaithnibh Fiodbaidhe go ttugsat bu imda & braid leo.

Caisg na gaoithi. {MS folio 213rb(327b)}

Annal CS1090

Kl.

Muircertach h. Bríain do dul ar Loch Riach tre baoghal.

Muircertach h. Bricc rí na n-Desi occisus est.

Dun Aiched do losccadh la Ruaidri h. Concupair.