Corpus of Electronic Texts Edition
Mac Carthaigh's Book (Author: [unknown])

Annal MCB1306

1306

MCB1306.1

1. {folio 23a} Kl. A.D. Mocccui. Toirrdealbac mac Taidc mic Concubuir na Siudaine mic Donnchadha Cairbrigh I Briain, ri Tuaghmuman, do eg, & a adlucadh andsa teampall dorinne se fein dona braitrib a n-Inis Mac n-Inill.

MCB1306.2

2. O Briain do gairm do Donnchadh da mac.

MCB1306.3

3. Maidhm & ar la O Mael Seaclainn & la Mag Eochagain ar Mac Feoruis & ar Gallaibh na Midi.


p.106

MCB1306.4

4. Domnall Og mac Domnaill Ruaidh Meg Carrthaigh do gabail do Domhnall Mael mac Domnaill Guid Carbrig ag fagbhail Corcaidhi, & a tabairt leis gu Baile I Moinigh da tig fein, & a dicheannadh arna beith aimsear aigi a n-iarand, & dabo mor an sgel-sin ag Gaedilaibh Ereann.

Annal MCB1307

1307

MCB1307.1

K. A.D. Mocccuii. Eduard, ri Saxan, do eg ar sluaigead ar Albanachaibh a comrac Alban & Saxan a noin Iuli : ridiri is glica & is croda & is mo ler tuit do dainibh a comaimsir ris, ger mor d[apos ]ulc dorinne don eagluis & do tuaith, uair is lis dotuit Lamhailín, ri Breatan, & Dauid a bratair, & do traeth Breathnuigh go fuilid o soin gan aen ri uatha fein orrtha; & is lis fos do h-imrad daeirsi mor ar Albanachaibh ar n-dicur a rig uatha & ar marbhadh l. mili a n-aenlo dib.

Annal MCB1308

1308

MCB1308.1

K. A.D. Mocccuiii. Caislen Cilli h-Ide do loscadh & do murad a Concubur O m-Briain & la Cormac mac Feidlimid Meg Carrthlaigh. Maidm & ar an la ceadna leo ar Gallaibh.

Annal MCB1309

1309

MCB1309.1

1. K. A.D. Mocccix. Concubur mac Donchadha I Briain do marbhadh la Clainn Oda.

MCB1309.2

2. Aed mac Eoghain I Concubuir, ri Connacht, do marbhadh la h-Aed mac Cathail Ruaidh I Concubuir.

MCB1309.3

3. Aed mac Cathail Ruaidh I Concubuir do marbhadh la consdabla fein a feall la Mac Uighilin.

Annal MCB1310

1310

MCB1310.1

1. K. A.D. Mocccx. Donnchadh Carrtain mac Cormaic Finn Meg Carrthaigh d[apos ]aithrighadh, & Domhnall & Tadhg, a dis mac, do gabhail.

MCB1310.2

2. Caislen Duin Mic Toghmuinn do brisidh la Domnall Mael mac Domnaill Guid Cairbrigh & do Diarmad Tragha Li mac Do
[...]
Donncad
[...]


p.108

Annal MCB1311

1311

MCB1311.1

1. K. A.D. Mocccxi. Donnchadh mac Con Meagha Mic Con Mara & Aed Araduach, a bratair, do marbhadh la Bloideachaibh & la Clainn Matgamhna & la Domnall O n-Grada, & in Domnall-sin O Grada do marbhadh an la ceadna le Clainn Cuilein.

MCB1311.2

2. Sluaigead la Donnchadh mac Toirrdealbhaigh mic Taidg mic Concubuir na Siudaine & la h-Uilliam a Burc go Connachtaibh & go n-Gallaibh Midhi gu Bun Raiti. Sar Risdeard mac Tomais a Clara & Sar Muiris Ridseabard & Diarmaid mac Donnchadha I Briain {folio 23b} ara ceann. Cath do cur aturra dar gabhadh Uilliam a Burc & dar marbhadh Sar Seaan a Cruac, a fear brataigi. Donnchadh O Briain do imteacht slan & in cuid ele don t-sluagh.

MCB1311.3

3. Donnchadh mac Toirrdealbhaigh mic Taidhg mic Concubuir na Siudaine do marbhadh a feall la Murcadh mac Mathgamna mic Domnaill Connachtaigh I Briain a m-Boirind.

MCB1311.4

4. Diarmaid mac Donnchadha I Briain do gabhail braideagh Tuaghmuman le neart An Claraig & Gall, & Muirceartach mac Toirrdealbhaigh I Briain do innarbadh a Connachtaibh.

MCB1311.5

5. Uilliam a Burc do legin amach, & dul a Connachtaibh dó.

MCB1311.6

6. Sluaigead la h-Uilliam aris do nearttughadh Muirceartaigh mic Toirrdealbhaigh & do comall a breithri ridireachta go Bun Raiti, & o nar gabhadh uaid a lamh a laim An Claraigh arin faichti, do imthigh se fein & Muirceartac & do gabadur braighdi Tuagmuman, & do fan Muirceartac mac Toirrdealbhaigh mic Taidhg mic Concubuir na Siudaine a Cluain Ramfada ina righ Tuaghmumhan, & do lig braighdi Tuagmuman le h-Uilliam a Burc a Connachtaibh, & do h-innarbadh Diarmaid mac Donnchadha I Briain a Tuagmumhain.

MCB1311.7

7. Diarmaid Ruagh mac Domnaill Ruaidh Meg Carrtaig do gabhail t-Seaain I Donnchadha. Seaan d[apos ]elogh uaigh & dul a teampull Muiri a Cluain Droicitt do. Diarmaid do breith asan teamhpull ar feall do cuir roime & h-e ana oglach aigi ina coimdeacht fein, & do tabairt bais do fein, & do deanum a creicti.

Annal MCB1315

1315

MCB1315.1

1. K. A.D. Mocccxu. Ceathra mic Fingin mic Mic Craith do teacht ceathra longa fada a Berri guna mnaib & guna muinntir


p.110

go h-Inis Cairbre a foslongport ar Diarmaid Mor O Matgamna & ar Tadhg a bratair eile, da mac Donnchadha Ratha Dreoain, & beith doibh innti urmor in t-samhraidh. Fingin mac Diarmada Moir I Mathgamna do tarruing baid o traigh Baili Risoid go Dun Maghnuis, & dul do lucht an baid-sin faru a n-Inis Cairbri. An bad do cur do ar cean a lochta eile da muinntir aris, & e fein d[apos ]anmuin san oilen nogo tangadur a muinntear cuigi sa m-bad a n-diaigh a ceile. Bualadh do & do clainn Fingin ara ceile sa maidin. Diarmaid & Concubur, da mac Fingin mic Mic Craith, do marbhadh co nn-ar a muinntiri umpu. Domnall & Cian do breith.

Annal MCB1398

1398

MCB1398.1

1. {folio 24a} In t-Iarla ceadna sin co n-Gallaib & co n-Gaeidilibh Muman leis a crich Builtearac, & in t-Iarla do badhadh 'na aenur a measg an t-sluaigh annsa t-Siuir. An sluagh d[apos ]inntogh da tigibh gan da nith acht in t-Iarla.

MCB1398.2

2. Sluaigead le Cormac mac Eoghain mic Cormaic mic Domhnaill Oig & le Domhnall, a brathair eile, a Corca Duibhne, gur airg i t-tar baile An Daingin & an tir o soin amach, nac eidir a airim do eadail a tugadur leo ass.

MCB1398.3

3. In Cormac ceadna sin & Domnall a bratair do dul do gabail crichte Baroideac. Imarcraidh spreigi & daine do breith leo innti, & a h-aitiughadh re bliadhain. Cormac na Cailleadh mac Domnaill Riabhaigh mic Domhnaill Glais Mec Carrthaigh & in Roitseac Fear Muidhe do dul sluagh mor do denum creach orro. Domnall mac Eoghain gu sluagh mor do Deasmumain do breith orro ag Bel Atha Cairrgi Ruchain. Cormac na Cailleadh do marbhadh leo, & Donnchadh mac Mec Carrthaigh Cluaisaigh, & Fingin mac Aengusa I Eidirsgeoil, & moran eile. An cuid eile don t-sluagh do dul a Carraig Ruchain & Deasmuma 'na timcill nogu tainig Cormac mac Eoghain & Domnall Glas mac Domhnaill Riabhaigh Mec Carrthaigh arnamarach cugo, & do leigidur clann Eoghain an sluagh Cairbreach imslan asin cloith, acht ar marbhadh an cead la dibh.


p.112

MCB1398.4

4. Tadg mac Domhnaill Oig mic Cormaic Mec Carrthaigh, Deasmuman, do ég a m-Baile I Cairbri, & a breith gu Corcaigh da annlucadh.

MCB1398.5

5. Amlaibh Bodur Mac Amlaib Ealla do marbhadh arin Claenglais ag dul gu teagh Seamuis Iarla Deasmuman.

MCB1398.6

6. Concubur O Concubuir Ciarraighi do marbhadh a n-Druim Ard a tigh mic h-í Ímair le Toirdealbac mac Taidg I Concubuir & le ceiteirnn tigi Seamuis Iarla.

Annal MCB1437

1437

MCB1437.1

1. A.D. Moccccoxxxuii. Brian Ballach mac Muirceartaigh mic Henri mic Briain mic Aeda Buide I Neill do marbhadh a feall la Gallaibh Cairrgi Feargusa & é ar n-dol d[apos ]ol fhína annsa m-baile.

MCB1437.2

2. Brian Og mac Domhnaill mic Henri h-Í Neill, ri Oiligh, do marbhadh la Catanacuibh.

MCB1437.3

3. Eoghan mac Neill Oig mic Neill Moir & Neachtain mac Toirrdealbhaigh mic Neill Gairb do dul gu maitib cuigid Uladh gu teg Iarla Mars & é 'na Giusdis a n- inadh righ a n-Eirinn gu Baile Atha Cliath {folio 24b} In t-Iarla do eg. Na Gaeidil-sin do gabhail annsa baile ar n-eag an Iarla & imarcraidh óir & airgid & each do buain astu.

MCB1437.4

4. Niall Garb mac Toirrdealbhaigh mic Neil Gairb mic Aeda mic Domnaill Oig do dul sluagh mor a Fine Gall. Breith air fein do taeb amuigh da t-sluagh & a gabhail, & Toirrdealbac a mac da marbhadh.

MCB1437.5

5. Ua Domnaill do breith tar muir gu Lundain & gan a fagail re fuaslugadh anair o thsoin.

MCB1437.6

6. Enri mac Eoghain I Neill d[apos ]fulairim I Neill da gairm de fein, & d[apos ]aitrigadh a athur & e 'na t-seanoir.

MCB1437.7

7. O Neil, Henri mac Eoghain, do cur Mic Con Midhi ar ceann Briain Oig Í Neill, & a cos & a lam do buain do Brian Og tar sarughadh Mic Con Midhi.

MCB1437.8

8. Eoghan mac Neil Oig, righ Cineil Eoghain re h-aimsir, do eg.


p.114

MCB1437.9

9. Neachtan mac Toirrdealbhaigh mic Neill Gairb mic Aeda mic Domnaill Oig do marbhadh a n-amus longpuirtt la Domnall mac Neil Gairbh I Domnaill & la h-Aed Ruadh & le Conn & le h-Eoghan, a triuir dearbrathar, & clann dearbrathar do Neachtain iad.

MCB1437.10

10. Enri mac Eoghain mic Neil Oig I Neil do teacht gu Ceinel Eoghain le cloinn Neachtain mic Tairdealbhaigh mic Neil Gairb. Domnall mac Neil Gairb mic Tairdealbhaigh mic Neil Gairb do teagmail da t-sluagh beacan marctsluaigh, & a marbhadh doibh ar n-deanum imarcradha gaisgidh.

MCB1437.11

11. Conn mac Neil Gairb Í Domhnaill do dul docum fiadhaigh beacan marctsluaigh um bard Gleann na Finne. Eigneacan mac Neachtain mic Toirrdealbhaigh mic Neill Gairb guna braithribh do innsaighi Cuinn, & a marbhadh leo ar n-denum morain gaisgidh.

MCB1437.12

12. Aed Buide mac Briain Ballaigh mic Muirceartaigh mic Aenri mic Briain mic Aedha Buide do dul ar sluaigead ar Mag Aengusa & a lot arin sluaighid-sin & a eg ar n-dul da tig.

MCB1437.13

13. Macc Uibilin & a mac Teaboid da innarbadh Clainni Aedha Buidhe & teacht doib a foslongport ar lar a tire. Conn mac Aedha Buidhe mic Briain Ballaigh do dul buidean marcach a n-aice an foslongpuirt & an sluagh do leigin amach air & eisin d[apos ]inntogh orro, & ro marbhadh Teaboid Mac Uibilin ara lar & teacht do fein slan.

MCB1437.14

14. Maidm le Conn mac Aedha Buidhe mic Briain Ballaigh ar Muirceartac Ruadh mac Briain Ballaigh & ar Ruibeard Sabais dar gabadh Muirceartach Ruadh mac Briain Ballaigh.