Corpus of Electronic Texts Edition
Annals of the Four Masters (Author: [unknown])

Annal M558

M558.0

Aois Criost, cúig céd caoccatt a h-ocht.

M558.1

Iar m-beith fiche bliadhain os Erinn i righe do Diarmaitt, mac Fergusa Cerrbeoil, do-cear la h-Aodh n-Dubh, mac Suibhne, rí Dál n-Araidhe, ag Raith Bicc, h-i Moigh Line. Tuccadh a chend go Cluain Mic Nois, go ro h-adhnacht innte, & ro h-adhnacht a cholann h-i c-Coindere.

M558.2

Is in m-bliadhain-si ro gabhadh an muirgelt .i. Liban inghean Eathach, mic

p.202

Muiredha, for Tracht Ollarbha, h-i lín Beoain, mic Inli, iascaire Comhgaill Bendchair.

Annal M559

M559.0

Aois Criost, cúicc céd caoccat a naoi.

M559.1

An céd-bhliadhain do dá mac Muirchertaich, mic Muireadhaigh, i righe n-Ereann .i. Domhnall & Feargus.

M559.2

Cath Gabhra Liffe, & cath Dumha Aichir, ria n-Domhnall & ria b-Fergus, for Laighnibh, dia n-ebradh:

    1. Cath Gabhra,
      & cath Dumha Achair
      At-bath amhra i c-cechtair,
      Colgu acus a athair.
    2. Cath Gabhra,
      ni cath duine ná dí cét
      at-bath fiche ó Faolan,
      ó Ailell fiche fichet.

Annal M560

M560.0

Aois Criost, cúig céd seasccat.

M560.1

An dara bliadhain do Domhnall & d'Feargus.

M560.2

Daimhin Daimhairgit, .i. Coirpre, d'écc. As uadha-sidhe na h-Airghialla.

Annal M561

M561.0

Aois Criost, cuig céd seasccat a h-aon.

M561.1

Iar m-beith trí bliadhna i righe n-Ereann do Domhnall & d'Feargus, da mac Muirchertaigh, mic Muireadhoigh mic Eoghain, mic Nell, ro éccsat araon.

Annal M562

M562.0

Aois Criost, cúig céd seasccat a dó.

M562.1

An céid-bhliadhain d'Eochaid, mac Domhnaill, mic Muirchertaigh, & do Baodan, mac Mhuirceartaich, mic Muireadhaigh, i righe n-Ereann.

Annal M563

M563.0

Aois Criost, cuig céd seascat a trí.

M563.1

S. Mo Laisi, abb Daimhinnsi, d'écc an dara la décc do September.

M563.2

Iar m-beith dá bhliadhain i righe n-Ereann

p.204

d'Eochaidh & do Baodan, torchradar la Cronán, toiseach Ciannachta Glinne Gemhin.

Annal M564

M564.0

Aois Criost, cúig céd sesccat a cethair.

M564.1

An céd-bhliadhain do Ainmire, mac Sedna, mic Fergusa Cendfhoda, h-i righe n-Ereann.

Annal M565

M565.0

Aois Criost, cúig céd seasccat a cúig.

M565.1

An dara bliadhain d'Ainmire.

M565.2

Deman, mac Cairill, ricch Uladh, mic Muireadhoigh Muindeircc, do marbhadh la bachlachaibh Boirne.

M565.3

Murchobhlach la Colman m-Becc, mac Diarmata, mic Fergusa Cerrbheoil, & la Conall, mac Comhgaill, toiseach Dal Riada h-i Soil, & i n-Ile, co t-tardsat edála iomdha eistibh.

Annal M566

M566.0

Aois Criost, cúig céd seasccat a sé.

M566.1

Iar m-beith trí bliadhna h-i righe n-Ereann d'Ainmire, mac Sedna, torcair la Fergus, mac Nelline, dia n-ebrad:

    1. Féimin an tan ro m-boi rí
      nir bo mennat nach detlai
      Indiu as foirdergg a lí
      la h-Ainmire, mac Séatnai.

Annal M567

M567.0

Aois Criost, cúig céd seasccat a seacht.

M567.1

Iar m-beith aon-bhliadhain h-i righe n-Ereann do Baodan, mac Nindeadha, mic Fergusa Cendfoda, do-cear oc Lém Inn Ech, i n-debhaidh, lasan da Comaoine .i. Comaoine, mac Colmain

p.206

Bicc, mic Cerbhaill, & Comaoine, mac Librene, mic Iolladhain, mic Cerbhaill. Tré comhairle Colmain Bicc do-ronsat an gníomh h-ishin.