Corpus of Electronic Texts Edition
Annals of the Four Masters (Author: [unknown])

Annal M517

M517.0

Aois Criost, cúig céd a seacht dég.

M517.1

A cethair décc do Muircheartach.

M517.2

.S. Dar Erca Cille Slébhe Cuilinn, dar b-ainm Mo Ninde d'écc 6 Iulii. Naoi fichit bliadhain fod a shaoghoil dia n-ebradh:

    1. Naoi fichit bliadhain 'mole,
      do reir riaghla gan time,
      gan baes, gan béd, gan baoghal,
      ba h-e saoghal Mo Ninde.

p.170

Annal M519

M519.0

Aois Criost, cuig ced a naoi décc.

M519.1

A sé décc do Mhuirchertach.

M519.2

S. Condlaedh, epscop Cille Dara, cerd Brighde, d'écc 3. Maii.

Annal M521

M521.0

Aois Criost, cúig céd fiche a h-aon.

M521.1

A h-ocht décc do Mhuirchertach.

M521.2

S. Buite, mac Bronaigh, espucc Mainistre, d'écc 7. December.

    1. Buite bratha brí co m-blaidh,
      tí cech tratha dom cobhair,
      Gealghlach go n-gloraibh n-gluinn n-gloin,
      degh-mac Bronaigh, mic Bolair.

Annal M523

M523.0

Aois Criost, cúicc céd fiche a trí.

M523.1

An fichetmhadh bliadhain do Muirchertach.

M523.2

Beoaidh, espucc Arda Carna, d'écc, an t-ochtmhadh la do Marta.

M523.3

Eochaidh, mac Aonghusa, righ Mumhan, d'écc.

Annal M524

M524.0

Aois Criost, cuig céd fiche a cethair.

M524.1

A h-aon fichet do Muircheartach.

M524.2

Cath Atha Sighe ria Muirchertach for Laighnibh, dú in ro marbhadh Sighe, mac Dein, conadh uadha aderar Ath Sighe.

Annal M525

M525.0

Aois Criost, cuig céd fiche a cuicc.

M525.1

A dó fichet do Muircheartach.

M525.2

S. Brighit ogh, banab Chille Dara d'écc. As di-sidhe cetus ro h-iodhbradh Cill

p.172

Dara, & ba lé con-rodacht. As í Brighit tra ná tucc a meanmain ná a h-inntheifimh as in coimdheadh eadh n-aonuaire riamh acht a siorluadh, & a siorsmuaineadh do grés ina cridhe & menmain, amhail as errderc ina bethaidh fein, & i m-bethaidh naoimh Brenainn, espucc Cluana Ferta. Ro thochaith imorro a h-aimsir acc foghnamh go diochra don coimdhe, ag denomh fert & miorbhal, ag slánucchadh gach galair & gach tedhma archena, amhail aisnéidhes a betha, go ro faoidh a spirat do chum nimhe, an céd lá do mí Febhru, & ro h-adhnacht a corp i n-Dún i n-aon-tumba la Patraicc, co n-onoir & co n-airmidin.

M525.3

Ailill, epscop Arda Macha, do Uibh Breasail do-sidhe, do écc.

Annal M526

M526.0

Aois Criost, cuicc ced fiche a se.

M526.1

An treas bhliadhain fichet do Mhuirchertach.

M526.2

As do thairrngire báis Mhuircheartaigh ad-beart Cairneach

    1. Asam uamhon ar in m-bein,
      ima luaidhfe ilor Sin,
      Ar fhiur loisccfidher i t-tin,
      for taoibh Cletigh báidhfir fin
.i. la Sín ingin Sighe do-rochair Muircertach, i c-cionadh a h-athar ro marbh-somh.

p.174

M526.3

Cath Eibhlinne ria Muirchertach mac Earca, cath Moighe h-Ailbhe, cath Almhaine, cath Cinn Eich, & orccain na c-Cliach, cath Aidhne, for Connachtaibh, conadh dona cathaibh-sin at-bert Ceand Faoladh:

    1. Cath Cinn Eich, cath Almhaine,
      ba h-aimsir airdherc aimhre,
      orccain Cliach, cath Aidhne,
      acus cath Maighe h-Ailbhe.

M526.4

Cairell, mac Muireadhaigh Muindeircc, ri Uladh, d'écc.

M526.5

Oilill, mac Dunlaing, ri Laighen, do écc.

Annal M527

M527.0

Aois Criost, cúicc céd fiche a seacht.

M527.1

Iar m-beith ceithre bliadhna fichet i righe n-Ereann do Muirchertach, mac Muiredhoigh, mic Eoghain, mic Néill Naoighiallaigh, ro loiscceadh é i t-Tig Cletigh uas Bóinn, oidhche Shamhna iar na bhátadh h-i f-fín. Sín at-bert an rann:

    1. As mesi Taeten inghen
      do-cher aireach Néll,
      As Gamadhaigh mo ainm,
      in gach airm as rén.

Cend Faoladh ro raidh:

    1. Fillis an rí mac Earca
      a l-leith Ua Neill,
      Firt fuil ferna in gach moigh,
      broghais criocha h-i c-cén.

      2. p.176

    2. Fo seacht ferais no chairpthi
      acus bidh cian bus cumhan
      Do-bert gialla Ua Néill
      la gialla moighe Mumhan.

Annal M528

M528.0

Aois Criost, cúig céd fiche a h-ocht.

M528.1

An céd-bhliadhain do Tuathal Maolgarbh, mac Corbmaic Caoich, mic Coirpre, mic Neill, i righe n-Ereann.

M528.2

Cath Luachra Móire etir Da Inbher, frisa raiter cath Ailbhe i m-Breghaibh, ria t-Tuathal Maolgarbh, for Ciannachtaibh Midhe.

Annal M531

M531.0

Aois Criost, cuicc céd triocha a h-aon.

M531.1

An ceathramhadh bliadhain do Tuathal.

M531.2

Cath Claonlocha h-i c-Cenel Aodha ria n-Goibhneann, taoisioch Ua Fiachrach Aidhne, airm in ro marbhadh Maine, mac Cerbhaill, ag cosnamh geillsine Ua Maine Connacht.