Corpus of Electronic Texts Edition

Annals of the Four Masters (Author: [unknown])

Annal M286

M286.0

Aois Criost, da céd ochtmoghat a sé.

M286.1

An céd-bhliadhain do righe Fiachaidh Sraibhtine ós Erinn.

Annal M291

M291.0

Aois Criost, da céd nochat a h-aon.

M291.1

An seiseadh bliadhain d'Fiachaidh i r-righe.

M291.2

Cath Duibhlinde ria f-Fiachaidh for Laighnib. Tri catha h-i Slébh Toadh, cath Smetire, & cath Ciarmaighe ria f-Fiachaidh Sraibhtine bheós.

Annal M322

M322.0

Aois Criost, trí céd fiche a dó.

M322.1

Iar m-beith seacht m-bliadhna ar triochat 'na righ ós Erinn d'Fiachaidh Sraibhtine do-cear lasna Collaib h-i c-cath Dubhchomair h-i c-Crich Rois i m-Breaghaib.

Annal M323

M323.0

Aois Criost, trí céd fiche a trí.

M323.1

An ced-bhliadhain do Colla Uais mac Eathach Doimhlén na righ ós Erinn.

Annal M326

M326.0

Aois Criost, trí céd fiche a sé.

M326.1

An cethramadh bliadhain do Colla Uais h-i righe n-Ereann go ros-ionarbh Muiredhach Tireach eisiomh cona bhraithribh i n-Albain go t-tríbh cédaibh maraon riu.

Annal M327

M327.0

Aois Criost, trí céd fiche a seacht.

M327.1

An céd-bhliadhain do Muiredhach Tirech h-i righe n-Ereann.

M327.2

A b-foircend na bliadhna-so tangatar na tri Colla go h-Erinn, & ní ro mair dia sochraide acht trí naonbhair nama. Do-deochatar din go Muireadhach iar na t-teagascc do draidh. Ro baigset fris, & ro raidseat droichbhriathra co rus-marbhadh, & corbadh fair tuairseadh ind fiongal. O nat etaiset tairiset oca, & robtar gora dó.

p.124

Annal M331

M331.0

Aois Criost, trí céd triocha a h-aon.

M331.1

An cúicceadh bliadhain do Muireadhach.

M331.2

Cath Achaidh Leithdeircc h-i Fernmoigh lasna tríbh Collaibh for Ulltuibh, du i t-torchair Fergus Fogha, mac Fraechair Fortriuin, tiughfhlaith Uladh i n-Eamhain in Fergus h-isin. Ro loiscset iaromh Eamhain, & nís-aittreabhsat Ulaidh innte o sén. Tallsat for Ultoibh beos don cúicceadh ó Righe & Loch n-Eathach siar. Do-cer Colla Meann isin cath sin.

Annal M356

M356.0

Aois Criost, trí céd caocca a sé.

M356.1

Iar m-beith triocha bliadhain h-í righe n-Ereann do Muireadhach Tíreach do-cear la Caolbhadh mac Cruinn, ri n-Uladh, oc Port Righ uas Dabhall.

Annal M357

M357.0

Aois Criost, trí céd caocca a seacht.

M357.1

Iar m-beith aon-bhliadhain i righe n-Ereann do Caolbhadh, mac Cruinn Ba Dhrai, do-cear la h-Eochaidh Muighmeadhoin.

Annal M358

M358.0

Aois Criost trí céd caocca a h-ocht.

M358.1

An céid-bhliadhain d'Eochaidh Muighmeadhon h-i righe ós Erinn.