Aois domhoin, tri mile da céd sechtmoghat a cethair.
An céd bhliadhain do righe Shengaind innsin.
Aois domhain, tri mile da ced sechtmoghat a h-ocht.
A b-foirchend an cúicceadh bliadhain do righe Sengainn torchoir lá Fiachaidh Cennfionnán mac Stairn.
Aois domhain, tri mile da ced sechtmoghat a naoi.
An ced bhliadhain do righe Fiachach Cennfionnán.
Aois domain, tri mile da ced ochtmoghat a trí.
An cúicceadh bliadhain do righe Fiacha, & a thuitim la Rionnal mac Geanoinn an bliadhain-si.
Aois domain, tri mile da ced ochtmoghat a cethair.
An ced bhliadhain do righe Rionnail mic Geanoinn for Erinn.
Aois domhain, tri mile da ced ochtmoghat a naoi.
Iar b-forbadh an seiseadh bliadhain do Rionnál isan righe, torchoir la Foidhbhgen mac Senghainn.
Aois domhain, tri mile da ced nochat.
An ched bhliadhain do righe Foidhbhgen.
Aois domhain, tri mile da ced nochat a trí.
A b-foircenn an cethramhadh bliadhain do righe Foidhbhgen do rochair la h-Eochaidh mac Erc.
Aois domhain, tri mile da ced nochat a cethair.
An ced-bhliadhain do righe Echdhach mic Erc indsin.
Aois domain, tri mile tri ced a trí.
An dechmadh bliadhain do righe Eachdhach mic Erc, & as isidhe bliadhain deidhenach a fhlaithiusa, uair tangatar Tuatha De Danonn do gabhail Ereann for Feroibh Bolcc co t-tardsat cath dia 'roile for Maigh Tuiredh h-i Conmaicne Chuile Toladh i c-Condachtaibh, gur ro marbhadh an ri Eochaidh mac Erc lá tribh macoibh Neimhidh mic Badhrai do Tuathaibh de Danonn, Ceasarb, Luamh, & Luachra a n-anmanna. Ro díotlaithrighedh Fir Bolcc isin chath-sin, & ro ladh a n-ár. Ro benadh beos a lámh do Nuadhatt mac Eochdhach, mic Ettarlaimh, (don righ ro baoi for Tuathaibh De Dannann) isin cath cedna. As é an t-Eochaidh remhráite rí deidhenach Fer m-Bolcc. Naonbhar ro gabh righe diobh, & seacht m-bliadhna décc ar fichit fod a b-flaithiusa for Erinn.