Corpus of Electronic Texts Edition
Annals of Tigernach (Author: [unknown])

Annal T1150

T1150.0

Kl. for domnach .xxíx. fuirre.

T1150.1

An Gilla Cláen h-Úa Ciarrdha, rí Cairpri, do thoitim la h-Uib Faelain.

T1150.2

Congalach h-Úa Braín Bregmune do marbad do Clainn Cethernaigh a n-Garrdha na Gamnaighe a Cluain Maic Nois.


p.172

T1150.3

Muiredhach h-Úa Dubtaigh, aird-espoc Connacht & Erenn in Cristó quieuit.

T1150.4

Muiredhach{folio 23a2} h-Úa Flandacan, taisech Clainne Cathail d' ec.

T1150.5

Domnall mac Domnaill h-Úi Choncobair, rígdamna Connacht do tuitim la Ruaidrí h-Úa Concobair.

T1150.6

Murcadh h-Úa Fergail, taisech Muntire h-Angaile, quieuit a n-Ínis Clothrand.

Annal T1151

T1151.0

Kl. enair for luan & .x. fuirre & treas bliadan for bisex.

T1151.1

Concobur Ciabach O h-Egra, rí Luigne, mortuus est.

T1151.2

Crech mor la Ruaidhrí h-Úa Concobair & la Sil Muirdaigh a Mumain, cor' loisced croinn an Puirt Ríg, as ferr do bái a n-Erinn, co tucsad bruid & bu imda léo.

T1151.3

Sluaiged la Torrdelbach h-Úa Concobair isin Mumain & Condachta uile & Diarmaid Mac Murchadha rí Laigen cona sluagh, & Mael Sechlainn mac Murcadha h-Úi Mael Sechlainn co Feraib Midhe & Tigernan h-Úa Ruairc & Fir Teftha, rancatar ar fuaidredh Muman co Glenn Magair & co Mónaid Moír co tarraid doib Toirrdelbach h-Úa Bríain rí Muman & mac Concobair h-Úi Briain co feraib Muman, .ííí. catha ba h-edh a lín.


p.173

T1151.3

Ferthair cath etarru .i. cath Mona Móire, cor' memaidh for Dail Cais & for Feraib Muman, co n-dechaidh tar airem a n-esbadha im Muirchertach mac Concobair h-Úi Bríain im ríg Tuadhmuman, in darna dune is ferr ro bái do Dail Cais, & Lugaidh mac Domnaill h-Úi Bríain & da h-Úa dég Chennédigh & ochtur do Uib Dedhaigh im Flaithbertach h-Úa n-Dedaigh & nonbur do Uib Senchan & cúicer do Uib Chuind, & cuicer do Uib Grada im Aineslis O n-Grada, & cethrar ar fichit do Uib Ócaín, & ceathrar do Uib Aichir, & mac maic Eachach h-Úi Longsigh & im cethrar d'Ib Neill Buidhe & im cuicer do Uib Eachtigern.

No co n-airimther ganim mara & renda nime ni h-airemthar ar' marbad do macaib ríg & taissech & trom-fhlatha Fer Muman andsin, cona térno dona tri cathaib tanic ri Muman acht aen-chath esbadhach amaín.

Tadhg mac an Liathanaigh h-Úi Choncobair & Muirchertach h-Úa Cathalan taissech Claíndi Fogartaigh & Aed mac Mael Ruanaidh h-Úi Fallomaín, taissech Clainne h-Uadach & cethrar do Luignib do thoitim a frithguin an chatha-sin. Muma ule do muradh léo iarsin.


p.174

T1151.3

Toirrdelbach h-Úa Briain do dul i Luimneach, uair na fuaír ínad a Mumain, co tuc .x. fichit uinge d' ór & .lx. set im chorn Bríain Boraime co ro roind-siun sin etir mathaib Sil Muredaigh & h-Úa Bríuin & Conmaicne, uaír nir taibged a h-en-tir riam tínol set amlaid sin. Tanic iarsin rí Erenn co mbraigdib Lethe Mogha lais dia thigh.

T1151.4

Sluaiged la Muirchertach mac Nell maic Lochlainn & la Tuaiscert Erenn co Coirrsliab Seghsa a Corand, co ruc da bragaid o Thoirrdelbach Ua Concobair & co tanic 'na theach.


p.175

T1151.5

Braighde Laigen do ínlacadh conice a tech co Muirchertach mac Nell maic Lochlainn.

Annal T1152

T1152.0

Kl. enair for mairt & .xxi. fuirre.

T1152.1

Cu Midhi h-Úa Cormaidhi, taisech h-Úa Maic Uais Midhi mortuus est.

T1152.2

Comthinól senaidh ac espocaib Erenn im cairdinel comurba Pedair co Drochad Atha, cor' ordaighsed araill do riaglaib and. Ro facaib didiu in cairdinel failliam gacha cuicidh a n-Erinn .i. paillium í n-Ard Macha & paillium a n-Ath Cliath, & araile a Condachtaib & annsa Mumain.

T1152.3

Toirrdelbach O Briain do aithrighadh & do índarba, & a techt a Tír n-Eogain, & an Mumo do roind itir Tadg h-Úa m-Briain & Diarmuid mac Cormuic.

T1152.4

Cathal mac Toirrdelbaig h-Úi Conchobair do marbad a Callraigi in Coraind.

T1152.5

Gilla Maic Líag, comurba Padraic, do guin ó h-Úa Cerbaill, o ríg Oirgiall, ica sharughudh. Ua Cerbaill d' argain & d' aithrigadh


p.176

uime sin o mac Maic Lochlainn.

T1152.6

Sluaiged la Toirrdelbach h-Úa Concobair & la Diarmuid Mac Murchadha ar amus Tighernaín h-Úi Ruairc, cor' loiscet Bun Cuilínd, & co tardsat maidm for Tighernan, & coro righsad mac Gilla Bruidi h-Úi Ruairc ar Conmaicne, & cor' gab a n-aird-righi uile, & co ruc' Diarmuid Mac Murchadha rí Laigen, ben h-í Ruairc ar éicin lais a Midhi .i. Dirborgaill ingen Murchadha, cona maithius.

T1152.7

Domnall mac Rigbardan h-Úi Cerbaill, rí Eile, do marbad do mac in Cosfhada, h-Úi Cerbaill.

T1152.8

Énric mac Dabid, rí Alban mortuus est.

Annal T1153

T1153.0

Kl. enair for dardain, & ail uathaid fuirre.

T1153.1

Murchadh h-Úa Mael Sechlainn, aird-rí Midhe cona fortuathaib & urmoír Laighen & Airgiall fri athaidh, quieuit a n-Durmuig Coluim Chille.


p.177

T1153.2

Concobar mac Domnaill Mael Sechlainn do dalladh la Mael Sechlainn mac Murchadha h-Úi Mael Sechlainn.

T1153.3

Flaithbertach Ua Canandan, rí Ceneóil Conaill & a ben .i. Dub Coblaig ingen Tairrdelbaig h-Úi Choncobair, lucht luínge do bathadh forsin faírge.

T1153.4

Dabid mac Mail Colaim, rí Alban & Saxan, uitam feliquiter quietauit.

T1153.5

INgen Murchadha h-Úi Mael Sechlainn do techt dochum h-Úi Ruairc arís a n-elódh o Laignib.

T1153.6

Sluaiged la Muircertach mac Nell co Tuaiscert Erenn a n-Iarthur Midhe. Maidm lais ar Tadhg mac m-Briain ic Ath Maighne, & crech lais co Rathain h-Úi Suanaigh, & do-rad maidm for marc-sluagh Laigen & maidm aile for Conmaicne.

T1153.7

Maidm Fordroma le Murchadh mac Nell & le Tuascert Erenn & le h-Uib Briuin Brefne for Ruaidhri h-Úa Conchobair & for Iarthur Chonnacht, inar' marbadh Gilla Cellaig h-Úa h-Edhin & Aedh a mac & Brian Ó Dubda & Muirchertach mac Concobair maic Tairrdelbaig, & Domnall mac Cathail Ua Concobair & Sitriuc mac Dubgaill & da h-Úa Birnn et alíi multí. D' índlacadh Thairrdelbaig h-Úi Bríain ansa Mumain as uime do tinnscnadh an sluaighedh-sin iarna índarba la Tairrdelbach h-Úa Concobair.


p.178

T1153.8

Tadhg h-Úa Briain do dallad la derbrathair fen .i. la Brían.

T1153.9

Galar mór do gabail Tairrdelbaig h-Úi Chonchobair co n-dechaidh a thasc fó Erinn.

T1153.10

Fland h-Úa Flandacan, rí Teftha mortuus est.

T1153.11

Muirghius mac maic Muirchertaigh, ard-taisech Clainde Tomaltaigh, quieuit.

Annal T1154

T1154.0

Kl. enair for aíne & .xíííí. fuirre.

T1154.1

Diarmuid h-Ua Conchobair, rí Ciarraigi Luachra, sai cen imresain, mortuus est.

T1154.2

Muindter Mail Sinda do argain do Mael Sechlainn mac Murchadha, & a n-índarba a Connachtaib iarsin.

T1154.3

Tucsad Fir Teftha maidm ar drem dia muntir, cor' facsat eocho & daíne imda, im Murchadh h-Úa Flandacan & im mac maic Sitriuca h-Úi Cellaig do Laignib.


p.179

T1154.4

Creach aile la Tairrdelbach h-Úa Conchobair, & a indtódh cen bú iar marbad a maic .i. Mael Sechlainn, & Duinn Cathaigh, ríg Ceneoil Aedha na h-Echtghe.

T1154.5

Tadhg h-Úa Bríain subita morte obiit.

T1154.6

Troid longsi etir longes an Tuaisceirt & coblach Connacht, cur' memaidh for longis in Tuaisceirt.

Annal T1155

T1155.0

Kl. enair for satharnn & ail uathaid fuirre.

T1155.1

Mael Sechlainn mac Murchada h-Úi Mael Sechlainn, rí Midhe & urmoir Laigen, do éc isin trichadmadh annó etatis suae, in terció annó regni suí Midi, a n-Durmuigh Coluim Chilli.

T1155.2

Sluaiged la mac Nell maic Lochlainn a Teftha, co ruc a braighde, & co tard righe o Sinaind co fairrge do Dondchadh h-Úu Mael Sechlainn.

T1155.3

Aedh h-Úa h-Éghra, rí Luigne mortuus est.


p.180

T1155.4

Crech Muighe Find la Feraib Teftha, cor' airgsed drem do Uib Maíne.

T1155.5

IN Gilla Got h-Úa Cíarrdha, rí Cairpri, do marbad do Donnchadh h-Uu Mael Sechlainn.

T1155.6

Maidm le Muntir Láighechan & re Muntir Mael-sinda for drem do Bregmunib & do Muntir Tadhgan & do Muntir Tlaman, ubí multí ceciderunt, im Gilla Fiadhnadan mac maic Aeda .i. taisech Muntire Tlamain, & im Gilla Riabach mac maic Con Caillea Gabalaigh.

T1155.7

Loscadh Indsi Clothrand la feile Poil & Pedair.

T1155.8

Caislen na Cuilendtraighe do thogail la Ruaidhrí h-Úa Concobair, uibi multí ceciderunt.

T1155.9

Dondchadh h-Úa Cerbaill, rí Airghiall, do gabail la Tigernan h-Úa Ruairc .i. la mac a máthar fein.

T1155.10

Fuaslacadh do Choncobar mac Domnaill h-Úi Briain la Toirrdelbach mac Ruaidri & la Diarmuid Mac Murchadha.

T1155.11

Donnchadh O Cerbaill, rí Airghiall, do thabairt{folio 23b2} ar éicin do Loch Silend la h-Úa Raighillaig cona macaib & ro fuaslaiced


p.181

tre bendachtain cleireach Erenn.

T1155.12

Da ríg h-Úa Conaill Gabra .i. h-Úa Cind Faelad mac Concobair & h-Úa Cuilén mac Concobair, do thoitim a n-aen-ló eatarro féin.

Annal T1156

T1156.0

Kl. enair for domnach luna secunda.

T1156.1

Braighde Tairrdelbaig h-Úi Briain, rí Muman, do Toirrdelbach h-Úu Choncobair, do ríg Erenn.

T1156.2

Snechta mor isin bliadain-sin, & sicc dermair, & ba h-e med na seicce co n-imthighdis daíne & índile locha Erenn uile.

T1156.3

Maidm la Diarmuit h-Úa Mail Sechlainn for Donncadh for a derbrathair fesin, du a torchair mac Gilla Decair h-Úi Cairpri, taisech Tuaithe Buadha.

T1156.4

Toirdelbach Ua Concobair, rí Erenn uile & Auguist iarthair Eorpa, tuile ordain & oireachais & cadhais cell & cleireach, cend sonais & saidbrisa in domain; duine risnar' gab cath na


p.182

cruaidh-irgal in céin ro bo béo; aen-fer rob fherr troccaire & tidhlacadh, deirc & deg-eneach, tanic d' fhuil na Adham-clainne .i. isin ochtmadh bliadain sescat a aíse & isin cóicetmadh bliadain a righe ad-bath, & ro h-adnaicedh laim re h-altoír Chiarain, & robi timna in ríg don Comdhe & do ecalsaib Erenn. Tuc didiu .lx. & .u. cét unge do ór & .lx. marg d' airgead bruinnti & ro idhbair a séodu ule cenmotha claidim no corn nó sciath no arm, etir eocho & índile & edach & fidhcill & brandam & bogha & bolg-shaighid & stabuill, & ro fodhail fén uile, & ro ordaigh cuid gach cille iar n-urd.

T1156.5

Cath ria n-Gallaib & Laignib & Midhechaib ar Tighernan h-Úa Ruairc co m-Brefnechaib ac Lis Luigdi, du a torchair mac Cinaith Bricc h-Úi Ruairc & Aed mac Duib Dothair & Dond mac maic Fíndbarr Geradhan, & Fogartach h-Ua Cuind, & a torcradar ile aile, sed Tighernan uictus euasit.


p.183

T1156.6

Aedh mac Donnchadha h- Mael Sechlainn, rí Fer Cell, occisus est o Muntir Luáinim i r-Raithin.

T1156.7

Brían Brefnech mac Tairrdelbaig, do dallad la Ruaidhri h-Úa Conchobair la derbratair & la Diarmuid mac Taidhg.

T1156.8

Sluaiged la Muirchertach mac Neill maic Lochlainn a n-Osraigi, cor' airgsed in tir uile & cor' loisc .íííí. prim-chella im Durmach h-Úa nDuach & im Achadh Maic Airt, & ro loisc Eochaig Ua Cuind, in fer leghínd, isin cloicthigh.

Annal T1157

T1157.0

Kl. enair for mairt, luna decima tertia.

T1157.1

Cend Eachach meic Luchta do faghbail ic Finchoraidh, & ba cudruma re core mor é.

T1157.2

Cu Ulad h-Úa Caendelban rí Laéghaire do marbad la Donncadh h-Úa Mail Sechlainn & se ar comairghe comurba Padraic & cleirech Erenn & urmoir a righ.


p.184

T1157.3

Coisergadh Tempuill na Manach la cleirchib Erenn am comurba Padraic & imon leghaít & am Muirchertach mac Maic Lochlainn & im Dondchadh h-Úa Cerbaill & im Tigernan h-Úa Ruairc & Derborgaill ingin Murchada h-Úi Mael Sechlainn, & ro tidhlaic Muirchertach imadh oir & airgid & aidhme do cleirchib na hErenn.

T1157.4

Ro h-indarbad Dondchadh Ua Mael Sechlainn la Murchertach mac Nell & le cleirchib Erenn a cinaidh a saraighthi dó, & ro h-airgedh Diarmuid a derbrathair da éis.

T1157.5

Cu Ulad h-Úa h-Eochadha, rí Ulad, do éc a n-Dun Da Leathglas.

T1157.6

Sluaiged la Muirchertach mac Maic Lochlaind co Laigniu & co Desmumain, cor' gab a m-bráighdi dib línaib. Tuc iarsin forbuse for Luimneach, co tardsat Gaill righi dó & cur' dichuirsed Tairrdelbach h-Úa Bríain uathaib, & dream dib do marbad im Ó Cathan na Craibe, & Ros Cre do argain doib. Ro sái as-sen dia thigh.


p.185

T1157.7

Crech-sluaighedh la mac Tairrdelbaig h-Úi Conchobair tar eís Murchertaig a Tír n-Eogain, cor' loisc Inis Enaig, & cor' thesc a h-aballgort.

Annal T1158

T1158.0

Kl. enair for cétain .xx.uííí. fuirre, & bliadan deridh naedhecdha.

T1158.1

Domnall h-Úa Lonngargan, aird-espoc Dal Cais, quieuit.

T1158.2

Aed h-Úa Dímusaigh, taisech Clainde Mail Úgra, mortuus est.

T1158.3

Sitriuc mac Gilla Enan do marbad do Murchadh h-Úa Cellaig.

T1158.4

Concobar mac Domnaill h-Úi Bríain & a mac do dallad la Tairrdelbach h-Úa m-Bríain.

{folio 24a1}

T1158.5

Cu Choírne h-Ua Madadaín, rí Sil n-Anmchada mortuus est.

T1158.6

Comthinol senaidh ar cleirchib Erenn ac Bri Maic Thaidhg a Láeghaire. Tancatar amuis Diarmuda h-Úi Mael Sechlainn a Cuirr Cluana ar cind espuic Connacht & espuic Cluana, dá comurba Ciarain, cor' marbsat dias dia muntir & ro soaid arís dia tigib, uair nirb' ail a lecon isin senadh.


p.186

T1158.7

Crech la Ruaidhri h-Ua Conchobair a Teftha, cor' airg Mael Cíaran mac In Abadh & drem do Muntir Cheirín, co ruc ba imda leis, & tucsat Fir Teftha maidm for drem dia muntir. Muilti ceciderunt im Tomaltach h-Úa MaelBrenainn, & am Gilla n-Dé h-Úa Thresaigh, im mac mec Aedha maic Ruaidhri, & im h-Úa Maic Liág, & im mac Aedha na n-Amus, & im Ferchar h-Úa Fallomain; & im mac h-Úi Flaithbertaigh do gabail.

T1158.8

Cu Ulad mac Deoradh h-Úi Flaind mortuus est .i. rí Dal Ríada.

Annal T1159

T1159.0

Kl. enair for dardaín & .ix. uathaid fuirre & bliadan tosaig nóidecdha.

T1159.1

Cendeídig mac maic Murchadha h-Úi Bríain mortuus est.

T1159.2

Díarmuid mac Taidhg h-Úi Mael Ruanaigh, rí Muighe Luirg & na h-Aicidheachta, sai n-enigh & n-engnoma Lethe Cuínd do beandaigh Día, ar crichnughudh a bethadh a Carraig Locha Ce, obít.


p.187

T1159.3

Gilla Caemgen h-Úa Cendedigh mortuus est.

T1159.4

Aedh mac Donnchaidh h-Úi Choncobair Failghe mortuus est.

T1159.5

Sluaiged la Muirchertach, mac Maic Lochlainn, co Ruba Conaill, cor' índarb Diarmuid h-Úa Mael Sechlainn.

T1159.6

Sluaiged la Ruaidhrí h-Úa Concobair co Condachtaib & co cath Tuadhmuman lais co h-Ath Luain. Tucsad Fir Teftha debaid doib iman ath, cor' buailedh righdamna Connacht and .i. Aedh mac Ruaidhrí, co n-erbailt de.

Lotar as-sen co Loch Semdighe & ro tairrngedh ocht lestair léo, cor' airgsed Inis Enain & cor' marbad urmor a daine, & cor' loiscedh iardain, & ro marbsad lucht na h-indse h-Úa Taidhg maic Taidhg in Teghlaigh.

Lotar as-sen co h-Ath Fir Dhiaidh, Ruaidhri cona sluagh & Tigernan h-Úa Ruairc & da cath lais. Tanic didiu Muirchertach mac Nell Maic Lochlainn, co Cenél n-Eogain, & Donncadh O Cerbaill & Fir Fernmuighe ina n-agaidh, cor' tardsat cathraínedh for Connachtaib, cor' laadh ár and im Gilla Crist mac Diarmuda maic Taidg ríg Muighe Luirg, & im Murcadh mac Taidg & im Muredach h-Úa Mandachan ríg h-Úa m-Briuin na Sinda, & im Branan mac m-Branan, taisech Corco Achland, & im Ceithernach h-Úa Fallomain, taisech Clainde Uadach, & im Aedh mac Uallachan, taisech Muntire Cinaith, & im Cellbuidi h-Úa Sechnusaigh, & im Dondchadh mac Aedha maic Ruaidhrí & Diarmuid O Conchenainn & Aithis mac Laimín.

At íád-so na maithe a-torcradar do Uib Bríuin and .i. Mac na h-Aidhchi h-Úa Cernachan & h-Úa Cubran & h-Úa Rotaidhe, & mac maic Aighneór & Cu Cacaigh mac Aedha, et alíí multi.

Ocus ro índrastair mac Maic Lochlainn h-Úu Bríuin & Muntir Geradhan.


p.188

T1159.11

Crech la Bregmunib & la drem do Muntir Tadhgaín, cor' airgsed termund Cluana Ferta, & ro marbsad lucht da eathar fan Suca, im Chathal Crumthaind & im Gilla Énain h-Úa n-Domnaill.

T1159.11

Sluaiged la Murchertach mac Nell, maic Lochlainn, a Connachta,


p.189

co ranic Dun Mor, & cor' mill in Dun, & do-chuaidh as-sen ar fud Muighe Conmaicne, co riacht Dun na n-Gall. Ro soich as-sen{folio 24a2} cen cath, cen giall.

T1159.12

Crech la Donnchad h-Úa Mael Sechlainn & la Firu Teftha a Tir Maine, co rancatar in Breuadh (?) & Durudh Mainnín. & rucatar h-Úi Maíne & Concobar O Cellaig rí ó Maine, orro, & ro muidh for Feraib Teftha, & tucad ár forro fa mac Maic Ualgairg & im Andadh h-Úa Moracan, et muilti nobiles et ígnobiles.

T1159.13

Sluaigedh la mac Maic Lochlainn a Midhe d' indarba h-Úi Ruairc a Midi. Ro chondmestair da chath Ceneoíl Eogain fri re miss for Feraib Midhe. Do-ríndi h-Úa Ruairc sith fris, & ro leic-sin a ferand fen do h-Úu Ruairc. Do-rad righe Laigen do Diarmuid Mac Murchada, & ro marb Faelan. Ro sai dia taigh iarsin & ro airg Delbna Mór.

T1159.14

Aed mac Ruaidhrí h-Úi Concobair do marbad d' aen-urchar do cloich ar cleith drochaid Atha Luain do gilla d' Feraib Teaftha.


p.190

T1159.15

Donncad h-Úa Mael Sechlainn & Fir Mide & Fir Thebtha do thaidhect tar Snam Da En ar Sinaind a Connachta, co tucadh derg-ár forro.

Annal T1160

T1160.0

Kl. enair for aíne & .xx.i fuirri, & bliadan bisexa

T1160.1

Donncadh mac Domnaill h-Úi Mael Sechlainn, rí Midhi, occisus est o Murchadh Ó Fhindallan & ó da mac tre mebail.

T1160.2

Lorcan h-Úa Caíndelban, rí Láegaire, occisus est ó Aedh h-Úa Cháindelban a n-Ath Truim.

T1160.3

Sluaiged la Ruaidhrí h-Úa Chonchobair co h-Ath Féne a Córco Raidhe, cor' gab bráighde Fer Tebtha & Iarthair Midhi.

T1160.4

Domnall Ua Gairmlegaigh, taisech Ceneóil Muain, occisus est o Mael Ruanaigh ríg Fer Manach.

T1160.5

Brodar mac Turcaill, rí Atha Cliath, do marbadh la Descert m-Bregh.

T1160.6

Diarmuid O Cathusaigh, rí Saidne, o Murchertach h-Úa Cellaig


p.191

Bregh occisus est.

T1160.7

Domnall mac Gilla Sechlaind, rí Desceirt Bregh, occisus est o Murcadh mac Domnaill h-Úi Mael Sechlainn.

T1160.8

Gilla na Naem h-Úa Duind, fer léighind Indsi Clothrann & ughdar Erenn re senchus & re dan, & aen-ollam na n-Gaedhel, do ég.

T1160.9

Mac Gorman, espoc Cilli Dara quieuit.

T1160.10

Gilla Crist h-Úa Mael Belltaine, in t-uasal-shacart & in t-ard-maighistir, quieuit.

T1160.11

Ruaídhri mac Tomaltaigh, taisech Muntire Duib Etaín occisus est.

T1160.12

Coblach la Ruaidrí h-Úa Concobaír ar Sinainn & ar Loch Dergderc, cor' gab braígdi Tairrdelbaig h-Úi Briain & Dal-Cais.

Annal T1161

T1161.0

Kl. enair for domnach, prima luna fuirre. Bliadan bisex.

T1161.1

Aed h-Úa h-Oissín, aird-espoc cuicidh Connacht quieuit.

T1161.2

Tadhg O Longargan espoc Tuadmuman quieuit.

T1161.3

Sluaiged la Ruaidhrí h-Úa Concobair a Midhi & a Laigniu, cor' facaib ríg ar Uib Faelain & ríg ar Uib Failghe, & tuc a m-braighdi


p.192

lais iarsin.

T1161.4

Gofraidh h-Úa Raigillaig, rí Muntire Mael Mordha & Muighe Gaileng, & a mac Gilla Issa do marbad la Mael Sechlainn mac Tighernain h-Úi Ruairc a Cenandus.

T1161.5

ISác h-Úa Cuan, espoc Ruis quieuit.

T1161.6

Sluaiged la Muirchertach mac Maic Lochlainn a n-Uib Briuín, co ro indrustair co Leicc m-Bladha & co h-Ath Ferna. Tancadar Gaill & Laigin ína theach .i. Diarmuid Mac Murchadha, rí Laigen. Do-rad Ruaidhrí h-Úa Conchobair cethrar braighead tar cend Ua m-Bríuin & Conmaicne & Lethe Midhi & Lethe Mogha.

T1161.7

Domnall mac Con Medha h-Úi Laigechan, taisech Clainne Suibne, do marbad la Ruaidhrí Ua Concobair a n-geimil, & se ar comairce comurba Cíarain.

T1161.8

Fallomaín Fínd Ua Fallomain, taisech Clainne h-Uadach in clericatu quieuit.

T1161.9

In t-espoc Ó Murgusa quieuit.

T1161.10

IN t-espoc O Ronan quieuit.

T1161.11

Madadhan Ua Ronan, rí Cairpri Gabra, quieuit, & a mac do marbadh la h-Úa Con Gemle tre meabul.


p.193

Annal T1162

T1162.0

Kl. enair for luan & .xu. fuirre.

T1162.1

Sluaighedh la mac Maic Lochlainn dochum Gall, co Feraib Erenn lais, do dighail a mna & a saraighthe forro, cor' dedhladar cen t-sith, cen cath.

T1162.2

Coirpre mac Samuel, ard-ollam a scribíund.

T1162.3

Concobar mac Taidhg h-Úi Briain quieuit.

T1162.4

Comthinol senaidh ac cléirchib Erenn im comurba Padraic & imon legait & im espagaib aile na h-Erenn, im Diarmuid Mac Murchadha, ríg Laighen, & im Diarmuid h-Úa Mael Sechlainn ríg Midhe, cor' ordaighsed araile do righaib cona righlaib and.

T1162.5

Cathal h-Úa Ragailligh do eg subita morte.

T1162.6

Donncadh Mac Gilla Padraig, rí Osraigi mortuus est.

T1162.7

Mael Sechlainn h-Úa Ruairc do marbadh la mac maic Andaigh


p.194

h-Úi Raighillaig.

T1162.8

Maithi Cláinne Mael Ugra do marbadh la Mael Sechlainn h-Úa Concobair a fill .i. Cu Brogha & Cellach O Dimmusaigh.

Annal T1163

T1163.0

Kl. enair for Mairt & tresfichit fuirre.

T1163.1

Muirchertach mac Domnaill h-Úi Mael Sechlainn do toitim do droiched Chorcaighe & se ar meisce, cor' báidedh isin t-Shabraind h-é.

T1163.2

Mael Ísu h-Úa Laíghenain, espoc Imlech Iubair, quieuit.

T1163.3

Glend Da Lacha do loscadh im Cró Chiaran & im Cró Caimgen.

T1163.4

Níall mac Muirchertaig maic maic Ardgair do dul a Tir Maíne ar connmedh, & a n-gabail la h-Uib Maine & la Concobar O Cellaig, & ár a muntire do chur per uirtutem sancti Cíarainí .i. connmedh égne do-rindi ar samad Chiáraín ria n-dul síar.

T1163.5

Aithrighadh Diarmuda h-Úi Mael Sechlainn la Feraib Midhi. Coic fichit uínge d' ór do-rat do Muirchertach Mac Lochlainn


p.195

tar cend rige Iarthair Midhi.

T1163.6

Cu Chaissil h-Úa Fíndallan do marbadh la h-Aedh h-Úa Ruairc a mebail.

T1163.7

Mac Donnchaidh Mec Carrthaig do marbadh dia brathair .i. do mac Cormaic, a mebail.

Annal T1164

T1164.0

Kl. enair for cétain .iiii. uathaidh fuirre.

T1164.2

Caislén ingantach do denum la Ruaidhri h-Úa Conchobair a Túaim Da Gualand.

T1164.3

Tuaím n-Grene & Clúain Ferta & Tír Dá Glass do loscud.

T1164.4

Mael Sechlainn h-Úa Chonchobair Failge do marbadh do Claind Mail Ugra isin mebail do-rindi orro.

T1164.5

Muirchertach h-Úa Tuathail, rí h-Úa Muredhaig mortuus est.

T1164.6

Somairle mac Gilla Brighdi, rí Indsi Gall & Cind Tire, & a mac .i. Gilla Brighdi, co n-ár Gall Atha Cliath araen ríu, do marbadh la Firu Alban.

T1164.7

Donnchad mac Diarmuta Briain, espoc Tuadhmuman quieuit.

T1164.8

Amlaim mac Gilla Chaemghen h-Úi Chendeidigh, rí Urmuman, do dallad la Tóirrdelbach h-Úa m-Briain.


p.196

T1164.9

Dabid mac Duind Sleibe h-Úi Eochadha, do marbadh do Uib Eachach a fill.

Annal T1165

T1165.0

Kl. enair for aíne & .xu. fuirri. cét-bliadan bisex.

T1165.1

Tairrdelbach h-Úa Bríain do thecht a n-ailithre co Cill Da Lua, & a mac .i. Muirchertach, d' fhagbail a r-righe Dal Cais.

T1165.2

Maidm ria Laighes Ua Mordha & ría Mac Craith h-Úa Mordha for Osraigi, du a torchair Domnall Mac Gilla Padraic, rí Osraigi, & h-Úa Bróich, et ailii multi.

T1165.3

Sluaiged la mac Maic Lochlainn a n-Ulltaib, co ro índrustar ín tir, etir chill & tuaith, & ro gab giallo Ulad, & ro índarb mac Duind th-Slebe h-Úi Eochadha, & ro marb mac Gilla Espuic, & Ínis Lacain do innradh lais, & do scailedh.

T1165.4

Eochaidh mac Duind Sleibe Ua Eochadha do gabail do Donnchadh h-Úu Cerbaill, & a lecan a gemil do arís, & righe n-Ulad do tabairt do mac Maic Lochlainn tar cend oír & braíged.


p.197

T1165.5

Ua Canandan, rí Ceneoil Conaill mortuus est.

T1165.6

An Gilla Cron h-Úa Mael Brenaind, taisech Clainne Concobur mortuus est.

T1165.7

Ruaidhrí Ua Concobair do tabairt Iarthuir Midhe do Diarmuid h-Úu Mael Sechlainn.

T1165.8

Snechta mor issin bliadain-sin, cu mba h-opair do daínib & do cheathraib a imthecht.

T1165.9

Cocadh mor etir Midhechaib & Brefnechaib, cor' marbad Sittriuc h-Úa Ruairc ó Uib Ciardha & o Cairpri.

T1165.10

O Ruáircc & Ó Conchobair do dhenom da creach ar Cairpri & ar Midechaib & ar Laignechaib.

T1165.11

Sluaiged la Ruaidri h-Úa Concobair a n-Desmumain, co tuc giallu o mac Cormaic Mec Carrthaig.


p.267

Annal T1166

T1166.0

Kl. enair for satharn, & .uii. fiched fuirre, & bliadan tanaisti for bisex.

T1166.1

Sluaiged la Ruaidhrí Ua Conchobair co mathaib Connacht ima [...], .i. Tigernan h-Úa Ruairc & Diarmuid h-Úa Mael Sechlainn cona sluagh co h-Atha Cliath, co tucsat Gaill rige do Ruaídhri & co tuc-san da fiched cét bó do Gallaib, & co n-dechadar, etir Gall & Gaedhel, co Manistir moir Drochit Atha, co tanic O Cerbaill co mathaib Airgiall a tech h-Í Choncobair & tucadh da fichit deg bó do & ceithri braighde uada som d' Ó Chonchobair, & do-chuadar uile i l-Laighnib, tancatar mac Maic Faelan & O Concobair Failge a tech I Chonchobair, & tuc-san da fiched dég bó gacha fir dib, & ro gabsad uile co Fid n-Dorcha.

Tanic Mac Murchadha ina n-aghaidh, & tuc debaidh doib, & ro memaid ar Mac Murchadha, & marbthar moran


p.268

dia muntir and, & reidigter an fidh la h-Úa Concobair ar eicin, & ro loisc Mac Murchadha féin Ferna Móir M' Áedhoíc, & tuc Mac Murcadha cethrar braighed d' Ó Concobair, & ni fhuaír do shomíadh acht cuirp Ua Cendselaig.

Mac Gilla Padraic & Osraige do thecht a tech I Choncobair, & tucsad a m-braighde dó, & tuc O Concobair da fiched dég bó doib-siun.

T1166.2

O Concobair do techt da tigh, & ni roibe acht ceathra h-aidhche iga thigh an tan do-chúaidh ar sluaighedh co h-Es Ruaidh, co tancatar Cenel Conaill ina teach & tucsad braighde.

T1166.3

ET an oired do bi-seom a Cenél Conaill téid h-Úa Ruaírc & Breifnig & Conmaicne & Oirgialla & sluagh I Ruairc a Tir n-Eogain, cor' thinoilsed Cenél Eogain im Murchertach mac Maic Loclainn ina n-aighidh .i. aird-rí Erenn, co Fedhaib h-Úa n-Echdach, co tuc fobairt chatha doib, & brister ar Cenél n-Eogain, & marbthar ann Muirchertach mac Nell Maic Lochlainn, aird-rí Erenn, & se dune dég do raighnib a munteri, & cleirigh an Chluig n-Udachta do marbad ann, & Ua Bríuin do thabuirt in Chluig léo, & O Floind do Uib Bríuin do marbad an righ, & tre mirbulib Padraic ro marbad h-é iar sarughudh comurba Padraic dó & cleirech Erenn im h-Úa n-Eochadha .i. Eochaid mac Duinn Slebe rí Ulad do dallad la Murchertach mac Maic Lochlainn tar sárugudh na cleireach-sin, & ar comairce h-Úi Cerbaill, ríg Airghiall, & as trid-sin do impoatar Ulltaigh & Airgialla air-sium.


p.269

T1166.4

Gilla Maic Aiblen, comarba Brénainn Cluana Ferta quieuit.


p.270

T1166.5

Gilla na Trinódi h-Úa Dálaigh, ollam Desmuman, do m-marbad do mac Cormaic Meg Carrtaigh.

T1166.6

Tairrdelbach h-Úa Briain do gabail righe Muman iterum.

T1166.7

Mac Gilla Mo Colmóg, rí h-Úa n-Dunchadha, do marbad do macaib Maic Braenain a mebail, tre furail Maic Murchadha.

T1166.8

Laigin & Goill do impodh for Mac Murchadha 'na chintaib fein.

T1166.9

Braighdi h-Úa Faelan & Ua Failghi la Diarmuid h-Úa Mael Sechlainn.

T1166.10

Ard Macha do loscadh tígib templaib.

T1166.11

Braighde Osraigi & h-Úa Faelan, im mac Meic Faelan, do marbad do Mac Murchadha.

T1166.12

Daire Colaim Cilli do loscadh 'mun Duibreglés.

T1166.13

Sluáighedh la Tigernán h-Úa Ruairc & la Diarmaid Ua Mael Sechlainn, & Gaill Atha Cliath leo, ar amus Maic Murchadha do dighail mna h-Úi Ruairc fair, cor' scailsed an teach cloiche do bai a Ferna ac Mac Murchadha, & ro loiscsed in longport, & ro indarbsad Mac Murchadha dar muir co riacht a Saxanaib, & do roindsed Ua Chendsilaigh ar dó etir h-Úa n-Gilla Padraic & Murchadh Mac Murchadha, & tucsat a m-braighdi léo, & do-radsad do Ruaidhrí h-Úa Choncobair íat iarom.


p.271

{folio 25a1}

T1166.14

Enna Mac Murcada do gabail la Osraighe.

T1166.15

Braighde Deasmumain do índlacadh condici a tech d' U Concobair.

T1166.16

Concobur h-Úa Focarta do marbadh laisin Dubsuilech Ua Focarta.

T1166.17

Ceileachar h-Úa Congaile, secnab h-Úa Neill.

T1166.18

IN Dall O Coin Allta quieuit.

T1166.19

Mor-sluaig timchill la Ruaidrí Ua Concobair, co tuc braigdi Ulad & Airgiall & Gall & Laigen & Fer Muman lais, coro roind Muma ar do itír Clainn Carrthaig & Sil m-Briain.

T1166.20

Comdal ac Ruadrí Ua Choncobair ac ríg Erenn ic Ath Luain, & ac Díarmuid Ua Mael Sechlainn ríg Midhi, & ac Tigernan Ua Ruairc, ríg Brefne, & ac Gallaib Atha cliath a l-los tuarastail. Do srethadh da fiched cét bo do Gallaib Atha cliath for Feraib Erenn, & do-rad in rí da fiched dég bó do Cenél Conaill & .x. n-etaighe datha fichit & da fichit etach datha d' Feraib Muman. Do-rat .ccc. bó do Ua Cherball do rí Airgiall. Do-rat da fiched déc bo do Mac Fhaelan. Do-rat .u. eich fichit do Mac Gilla


p.272

Padraic do ríg Osraigi. Do-rad .x. n-eich & tri fichit each do Mac Carrthaigh.

Annal T1167

T1167.0

Kl. enair for domnach & .uii. uathaidh fuirre.

T1167.1

Derbail ingen Domnaill h-Úi MailShechlainn, do éc a n-ailithri a Cluain Maic Nóis.

T1167.2

Uada Ua Con Chenaind, rí Ua n-Díarmuda in clericatu quieuit.

T1167.3

Mor ingen Domnaill Ua-Concobair Failgi, abatísa Chilli Dara, quieuit.

T1167.4

Sluaiged la Ruaidhrí h-Úa Conchobair, la aird-rí Erenn & la rigraidh Erenn .i. Diarmuit Mac Carrthaigh, rí Desmuman, & Muirchertach Ua Bríain, rí Dal Caiss, & rigraidh Laigen & Osraigi cona ler-tinol, & Diarmuid Úa Mael Sechlainn, rí Midhi, & Tigernan Ua Ruairc, rí Ua m-Bríuin & Conmaicne, & O Cerbaill rí Airgiall, & h-Úa h-Eochadha, rí Ulad, cona mór-thinol; & na ríga sin aile ar aen-rian. Tri catha déc doib da cois & .uíí. catha marc-shluaigh, co riachtatar Ard Macha, & tri h-aidche doib andsin ac urnaidhe Ceneóil Conaill & in coblaigh móir


p.273

tancatar timcell Erenn co rancatar cuan Doire & co n-dechatar do muir & do thir fó Chenel n-Eoghain fo alltaib & fo chailltib, & tinolaid Cenél Eogain do tabairt amuis longpuirt ar Feraib Erenn. Conid ed ro fhás de-sidhe, arna roind cor' marb cach dib féin a cheli isinn aidhche a n-imrusc, acht chena tucsad ochtur braighed arnamarach do ríg Erenn .i. do Ruadri Ua Conchobair, & ro facaib cethrar braighed dib i l-laim I Cerbaill ríg Airgiall ica coméd, tanic fén a Condachta, & tuc na .íííí. braighdi aile lais, & ro impa gach cóicedhach dib dia thir fen, & tanic rí Erenn ar fud Ceneóil Conaill & tar Eas Ruaidh a Condachtaib, & tuc O Briain & Mag Carrthaig, leis dia taigh, & tuc claidim Cormaic do Chormac Mac Carrthaig, & tuc cornn Tairrdelbaig Bríain do mac Bríain.


p.274

T1167.5

Diarmuid Mac Murchadha do techt a n-Erinn, & socraidi Gall & Saxanach & ridiredh leis, cor' gab rigi Ua Cendsilaig arís. Sechtmain do ríg Erenn ica thigh in tan do-chuala Mac Murchadh d' fhaghail treisi móire & do gabail nerta for Laighnib. Do-chuaidh rí Erenn & Ua Ruairc & Ua Mael Sechlainn co Fidh n-Dorcha, & Gaill léo, & do batar sechtmuín and ac urnaidhe sídha, cur' elóatar drem d' uaislib in longpuirt amach d'iarraidh debtha, & ro marbad seser dib cor' erig in sluagh mór amach, & tucadh ruaíg do Mac Murcadha cona Saxanachaib, co raníc .x. cínn fiched aen-inadh do chendaib Laigen im dis ridiredh. Co tanic{folio 25a2} Mac Murchadha a teach ríg Erenn & tuc a breth fen do braigdib dó tar cend Ua Cendsilaig, & tuc Mac Murcadha .u. fichit uinge d' ór do síth d' U Ruairc i l-lógh a mna.

T1167.6

In t-espoc Ua Flandacan .i. espoc Cluana h-Uama quieuit in Christo.


p.275

T1167.7

Aenach Taillten do denom le Ruaidri la ríg Erenn.

T1167.8

Tairrdelbach Ua Briain, rí Muman & Lethi Mogha re re in tribulatione bona uitam feliciter fíniuit.

T1167.9

Cond O Mael Míadhaigh, taíssech Muntire h-Eolais mortuus est.

Annal T1168

T1168.0

Kl. enair for luan & .xuííí. fuirre & bliadan corabisex.

T1168.1

Murchadh Ua Finnallan, rí Delbna Moire, do marbad do Muirchertach mac Donncadha Mael Sechlainn ar comairche ríg Erenn & Connacht & Oirgiall, & do-radsad Fir Midhi secht cét bó ina eneclainn do Chonnachtaib & d' Airghiallaib.

T1168.2

Enda Mac Murchadha, rígdamna Laigen, do dallad la Donnchadh Mac Gilla Padraic la ríg Osraigi.

T1168.3

Aenach Taillten la Ruaidhrí Ua Concobair la ríg Erenn isin bliadain-si.

T1168.4

Muirchertach, mac Tairrdelbaig Briain, do righadh tar eís a athar, & mac maic Concobair Briain da marbad-sen a mebail, & mac Concobair do toitim fo chétoír índ la Mael Sechlainn Ua Faelan & la Díarmuid Find Ua m-Bríain a n-dighail Muircertaig.


p.276

T1168.5

Righi Tuadhmuman do gabail do Domnall Ua Briaín & righe Urmuman do Brían.

T1168.6

Brian mac Tairrdelbaig do gabail la Domnall mac Tairrdelbaig, & righe Dal Cais uile do gabail dó.

T1168.7

Flandacan Ua Dubtaigh, espoc & sai a léighind quieuit.

T1168.8

Mac Raith h-Úa Morain, espoc Conmaicne quieuit.

T1168.9

Donncadh Ua Cerbaill, rí Airgiall, do ég iarna ledradh do thúaigh fir dia muntir fén.

T1168.10

Meass mor isin bliadain-sin, & sonus & imadh gach maithiusa arna tidnacol do Día do righi Ruaidhrí Ua Concobair.

T1168.11

In Gilla Leithderg O Concobair Corcomruadh do marbad do braithrib fen a mebuil.

Annal T1169

T1169.0

Kl. enair for cétain & .ix.xx. fuírre.

T1169.1

Ferchar Ua Fallomain, taisech Clainne h-Uadach mortuus est.


p.277

T1169.2

Sluaiged la Ruaidhrí Ua Concobair la ríg Erenn a n-Uib Cendsilaig, co tuc mac Maic Murchadha a n-gellsine lais.

T1169.3

Drong mor do ridirib do techt tar muir 'cum Maic Murcudha.

T1169.4

Rigi Cenéoil Eogain do gabail do Concobar mac Nell Maic Lochlainn.

T1169.5

Diarmuit h-Úa Mael Sechlainn, rí Midhi & urmóir Laigen, & adbar ríg Erenn, do marbad la Domnall m-Breaghach h-Úa Mael Sechlainn tria fingail.

T1169.6

Osraige do indradh, etir cill & tuáith, la Mac Murchadha co n-Gallaib.