Kl. enair for cétain & .xuiii. fuirre.
Cross-sluaiged la Tairrdelbach h-Úa Concobair la rig Erenn a nn-descert Erenn & ana tuaiscert, co rancatar Toraig, co tucsad
Cú Aifne h-Úa Concobair Failge do eg.
Diarmuid h-Úa Fallomain, taissech Clainde h-Uadach mortuus est.
Seóit Cluana Maic Nois do foillsechadh ar Gallaib Luimnigh iarna n-gaid do Gilla Comgan, & ro crochadh h-é ac Dun Cluana h-Ichtair iarna thidhnacol o Choncobar o Bríain o rig Muman. Ro sir tra an fer-sa Corcach & Les Mór & Port Lairge do dul tar muir soir. In long a faghbadh ínadh ni faghadh-sen gáeth, & ro gebdis na longa aile na bidh-son, uaír do fhastódh Ciaran an long ana triallad-som dul, & do-rad-som a cuibidil fria m-bass annsin, conadh eadh d' fhaicedh Ciaran cona bachaill ic fastadh cacha luíngi ina triallad-som dul. Ro marbastair tra an Coimdhiu & naem-Chiaran an fer-sin.
Maidm Craibe Treithin la Tigernan h-Úa Ruairc for Airrther
Kl. enair for dardain, & .xxíx. fuirre.
Longes la h-Úa Conchobair co R(oss) n-Ailithri, co rancatar c[...] Desmuman & co ro índirsed co mor h-í.
Debaidh etír marc-(sh)luagh Condacht & marc-sluagh Muman, dú a torchair Aedh mac Con Con(n)acht h-Úa Conchobair & O Carrthaigh ollam Con(n)acht, et alíí.
Comluighe do tabairt etir Leith Cuind & Leth Mogha taidhecht a Connachtaib a n-aenfecht. Tancatar didiu Tuaiscert n-Erenn tar Eas Ruaidh .uii. catha co Coirrshliab & co Seghais. Ro thinoil rí Erenn Sil Muredhaigh dia saighidh, cor' cuirsed h-Úi Beicc fian glaslaíth isin Segais dia frithaileam, co tardsad amus forru, cor' bo maidm do Chonall & d' Eóghan & don t-sluagh uile acht cath Ulad do-cúaidh tresin caill ar tus, co tucad ár forro imon n-Garbanach h-Ua mBaigill & am Chond h-Ua Mael Gáithe et alii. & co fargsad a n-eocho & n-airm & a n-édach. Tuc didiu ossadh m-becc an aidchi-sin, co n-dernsad sith re Sil Muiredhaigh, conna tiucbadis a Condachtaib co brath aris a sochraide Leithe Mogha. Do ordaigh didiu Tairrdelbach
Concobur Ua Briain do bualadh do Gilla Padraig h-Ua Londgargan .i. fer gradha dófein & a marbad fein ind.
Leth Mogha immorro, tancatar-sen co Tuadhmumain, cor' tinsolat Connachta do tabairt catha doib; acht ni ro légset Tuadhmuma doib. Arai sen tra ro ben cath Iarrthair Condacht fri cath Iarmuman & Cellachain maic mec Carrtaigh, cor' blosc cath Cellachain isin abaind ar teiced, & cor' báidhedh, & cor' marbad co mor, & co n-dechatar gan tsith dia tigh.
Stokes changes the order of entries 4 and 5; the MS order has been restored here.
Kl. enair fo aine & dechmadh uathadh fuirre. Bisextilis annus.
Mor-choblach la Tairrdelbach h-Ua Concobair, la ríg n-Erenn, for Loch n-Dergderc do innrudh Muman, co n-derna crecha ímda a Mumain & cor' fasaig co mór.
Sluaiged la Tairrdelbach h-Ua Concobair i m-Mumain, cor' airg & cor' mill Cromadh & do-chuaidh tarais isin Midhe, co tard righi Mide do Murchertach h-Úu Mael Sechlainn, & co tard rige & giallu lais.
Crech la Concobar h-Úa m-Briain a Máenmuigh, cor' airg Cill m-Bían & co ruc bu imda.
IMpodh do Tuadhmumain & do h-Úib Briuin & do Chonmaicnib ar Ua Conchobair.
Fuabairt Atha Luain la Concobar h-Ua m-Briain & la Conmaicnib & la Firu Midhi: tri catha Gaeidilech & grinde Gall do indrudh Connacht, & ni ro léced tairis iat.
Caislén Gaillme do muradh la coblach Fer Muman. Lochlaind h-Ua Lochlaind do marbad doib isin ló cétna. Flaithbertach h-Ua Flaithbertaigh ba taisech an coblaigh.
Athfuabairt Atha luain lasin lucht cétna, acht nochor' foghain doib.
Loscadh Indsi Buinde m-Beithe la Muimnechaib.
Conchobur h-Úa Flaithbertaigh & da h-Ua Mugroin do marbad la sluagh Muman.
Crech-sluaiged la Tairrdelbach h-Úa Conchobair a n-Ib Farga.
Diarmait mac Maic Eidinén, taissech Clainne Diarmuda mortuus est.
Kl. enair for domnach .xx.i. fuirre.
Flaithbertach h-Úa Flaithbertaigh do marbad do mac Lochlaind a n-dighail a athar.
Mor-sluaiged la Leith Mogha ule im Cormmac mac maic Carrthaig & im Concobar h-Úa Mael Sechlainn a Condachtaib, cor' marbad leo mac Maic Cathail h-Úi Concobair & Gilla na Naem h-Úa Flaind, taisech Sil Mail Ruáin{folio 22a1} & cor' loisc Dun Mughdorn & Dun Mór, & do impósat gan geill cen t-sith dia tigh.
Righ-rechtaire Erenn .i. Gilla na Naem Ó Birnn, taisech Tiri Bríuin, mortuus est, & a adhnocol a tempoll Rosso Coman.
Da mac Con Condacht h-Úi Chonchobair do badhudh for Loch Rí.
Maidm re Feraib Teftha for Sil Muiredhaigh, dú a-torchair Amlaim mac Airechtaigh h-Úi Radhuib, taisech Clainde Tomaltaig, & Raduban Mac ín Lestair Í Aínlighi.
Conchobar mac Murcadha h-Úi Mael Sechlainn, rígdamna Midhe, do marbadh do Donncadh mac Gilla Mo Colmoc & do Gallaib.
Mac Gilla Mo Colmóc do marbad do Midheachaib.
Lusca do loscad uile cona templaib do Donnchad mac Murchada h-Úi Mael Sechlainn.
Kl. enair for luan & .íí. uathaid fuirri.
Mac Mec Cathail I Chonchobair do marbad le h-Úa n-Egra.
Coisergadh tempaill Cormaic a Caisil le mathaib Erenn, laechaib cleirchib.
Sith do denom o Leth Mogha re Connachtaib iarna cuindchidh o Muiredach O Dubthaigh .i. uasal-espoc na h-Erenn & do mac óghi da comurba Iarlaithe .i. Aedh h-Úa h-Oisin.
Cith cloich-shnechta do ferthain im Caisil na Ríg & a Muig Femin. Uball a m-biad mír duine samail gach cloiche & si trebennach, cor' bo snam dona h-eachaib ar margadh Chaissil & a
Cocadh mór do fhass i l-Leth Mogha uile tre easgaine cleireach Erenn & Connacht, cor' cuired da cath eaturro .i. cath la h-Osraige ar Mac Murchada & ar Ib Cendsilaig, du inar' marbadh Ugaire h-Úa Tuathail. Cath ele la Mac Murchada co n-Uib Cendsilaig & co n-Gallaib Atha Clíath for Conchobar h-Úa m-Briain & for Osraige & for Gallaib Puirt Lairge, du 'nar' marbad moran & inar' cuired ár mór forro im mac Gilla Muire maic Gilla Guit & im mathaib Puirt Lairge & im mathaib Osraige & im Gilla Caemgen h-Úa Cendétigh do gabadh and.
Ár mor la Deasmumain for Dal Cais im Donncadh mac Maic Murchada h-Úi Briain, & im a mac, et alíí multí, tria amus longpuirt.
Aed mac maic Taidhg h-Úi Cellaig, rí h-Úa Maine, mortuus est.
Cathach Iarlaithe do sarughudh la Dal Cais. Tuadhmuma d' fhalmochudh isin raithe cétna tria fertaib Iarlaithe.
Mael M' Aedhoic h-Úa Morgair do dhul a cathair Padraic.
Cenel Eogain Tulcha Óc do chocar Mael M' Aedhóic, & teni gelain do loscud da fer déc dib isin inadh ar' cogradar é.
Aedh mac Maic Lochlainn h-Úi Chochlain rí Delbna Eathra, mortuus est.
Murchad h-Ua h-Egra & a ben .i. ingen Tairrdelbaig h-Úi Chonchobair, do marbad do Thaichleach h-Úu Eagra.
Kl. enair for mairt & .xuíi.
Cathal mac Taidg h-Úi Chonchobair occisus est o Feraib Teftha iarum.
Ros Coman do loscud, & a h-airchíndeach & a fer léigind do
Muirchertach O Cadhla occisus est o feraib Muman.
Maidm aenaigh Maenmuighe la Concobur mac Tairrdelbaig ar Uib Maíne, dú ín ro marbad Conchobur h-Úa Cellaig & Ó Maíndín, rí Soghain, et alíí.
Ua Maille occisus est o mac Domnaill h-Úi Dubda a n-dam líag Nuachongbala, & a ghaí fein día marbadh-som tria fhirt Colaim Cille isin raithe cétna.
Cunga & Enach n-Duín & Ros Comaín do loscud.
Cu Mara Mór do marbadh tre fhert cathaire Iarlaithe do sarugud.
Ruaidhrí h-Úa Canandan, rí Cheneoil Chonaill occisus est o Chenél Eogain.
Mael Issa h-Úa h-Ainmire, espoc Puirt Laírge quieuit.
Hua Madadhan, rí Sil n-Anmchadha & h-Úa Maine, do marbad a fill do mac Gilla Caemgen h-Úi Cendédigh.
Domnall Gerrlamach, mac maic Muirchertaigh in clericatu quieuit.
Cinaeth h-Úa Baigill, espoc Clochair, quieuit.
Enri ri Saxan mortuus est.
{folio 22a2}Kl. enair for cétain & .iiii.xx. fuirre millisimus .c.xxxuí. annus ab Incarnatióne Dominí.
Aed mac Domnaill h-Úi Chonchobair occisus est cona aes grada iar fell dona Tuathaib fair.
Ruaidri h-Úa Concoboir & Uada h-Úa Con Cenaind do gabail la Tairrdelbach h-Úa Conchobair ar comairge chomurba Iarlaithe & h-Úi Dubthaigh & na Bachla Buidhi & h-Úi Domnallain. Galar do gabail Tairrdelbaig isin ló-sa, co raibe fada 'na laighe.
Domnall mac maic Lochlainn, rí Tuaisceirt Erenn, do marbadh la Cenel n-Eogain.
Domnall h-Úa Dubthaig in t-espoc .i. comurba Ciarain, do éc.
Néidhe h-Úa Mael-Conaire, in senchaidh quieuit.
Aed h-Úa Fínd, aird-espoc na Brefne, quieuit a n-Inis Clothrand.
Aed mac Tairrdelbaig h-Úi Concobair do dallad la derbrathair fen .i. la Concobar & la Diarmuid mac Taidg h-Úi Mael Ruanaid.
Domnall h-Úa Caendelban, rí Laegaire, do marbadh do Tighernan h-Úu Ruairc.
Crech Locha Cairrgin la Feraib Teftha, & ro loiscet a chaislén.
Cluain Iraird do argaín do Bregnechaib & do Feraib Fernmuighe.
Muirchertach mac Neill maic Lochlainn do rigadh andsin.
Kl. enair for aine & .u. uathaid fuirre.
Coblach mor la Tairrdelbach h-Úa Concobair la ríg n-Erenn for Loch Rí, & do tinoladh Conmaicne & Fir Teftha a fuaratar do ethraib .i. .uíí. fichit serrcend, dia fuabairt, & ni caemnacair ní doib.
Mor, ingen Murchadha h-Úi Briain, ben Murchadha h-Úi Mael Sechlainn, do éc.
Tairrdelbach h-Úa Briain do gabail dia brathair.
Domnall mac Murcadha h-Úi Mael Sechlainn do marbadh do Airrther Midhi & dona Saidnib.
Domnall h-Úa Conaing, aird-espoc Muman quieuit.
Crech la Tigernan h-Úa Ruaircc & la Firu Brefne a Connachtaib tar Ath indsín t-Sruthra, cor' airg Cland Uadach a n-Druim Drestan & cor' marbad Ailill mac Gille Enan, & tar Ath luain dia tigh.
Mac in Lestair h-Úi Ainlighe, taisech Ceneoil Doftha do marbad d' Ua Grada & do Luighnib.
Dall Find Edha .i. Gilla Muire, o coin allta mortuus est.
Condachta didiu do fasugud o Eas Ruaidh co Sinaind & co h-Echtaigh Muman, & a cur fén a n-Íarthur Condacht.
Kl. enair for satharn & .uí. dec fuirri.
Úada O Conchenaind do dallad la Tairrdelbach h-Úa Concobair, ina mignimaib fén do dalladh.
Mathgamain h-Úa Concobair, rí Cíarraige & Corco Duibni, tanaisti ríg Muman, quieuit.
Creach i Midhe la Tighernan h-Úa Ruairc, cor' marb Aedh h-Úa Con Fiacla.
Maidm Berna na Bo Maile la Tighernan h-Úa Ruairc & re
Cormac mac maic Carrthaig do marbad do Tairrdelbach O Briain .i. da cliamuin & da cairdes Crist & da altraind a fill .i. índsaigtheach Erenn uile & rí Leithe Moga co comlan.
Conchobar O Bríain a n-aird-rigi Muman.
Amlaim Mor mac Firbisigh, ollam O Fiachrach uile re senchus & re filidhecht, & sái clerigh co m-bethaigthib ecailsi imda, & togha do Cunga, & a ec and iar m-buaidh ongtha & aithrige.
Kl. enair for domnach & .xxuíí. fuirri.
Cu Condacht O Dálaigh, o Lecain Midi, in fer dana is ferr do bái a n-Erinn, do ég ína senoir.
Donnchad O Mail Muaidh, rí Fer Cell, do marbadh la Murcadh h-Úa Mael Sechlainn. Murchad h-Úa Mail Muaid rí aile Fer Cell, do loscud ó Uib Luaínim a tempull Rathain.
Mac Ragnaill maic Muiredhaigh, taisech Muntire h-Eolais, do marbadh la Tigernan h-Úa Ruairc.
IN t-Suca do tochailt la Tairrdelbach O Choncobair co tanic i Turloch Desceirt in Muighe & Turlach Aeda, co n-derna locha mora dib & co n-deachaidh a n-Abaind na h-Eidhnighe & a Loch Rí, & ro bái tínol Connachtach ac denom an gnima-sin.
Aedh h-Úa Cadhla, rí Conmaicne Mara, do marbadh da muintir fen a fill.
Gilla Padraic mac Gilla na Naem h-Úi Fergail do marbad{folio 22b1} da brathair fén .i. do Murchadh.
Kl. enair for luan & nómad uathaid fuirre.
Eochaidh h-Úa Cellaig, aird-espoc fer Midhi, mortuus est.
Mael M' Aedoic Ó Morgair do taidhecht o Roim.
Tir Da Glass do loscud d' Uib Maíne & do Feraib Teftha & do cethernaib Conchobair maic Tairrdelbaig, & taissi Colaim maic
Droiched Atha Lúain do denom la Tairrdelbach h-Úa Concobair, cor' airg da lan-buailigh déc do Teftha, & derg-ár na Midhech la Sil Muredaigh, co torachtatar .ííí. fichit cend aen-baile, acht chena tucadh ár aile ar Sil Muiredhaigh. Muiredhach mac maic Muredhaigh h-Úi Fhinachta, taisech Clainne Murchertaigh & clainne Condmuigh & cend ceille & comairle Sil Muredaigh ule, do marbadh a frithguin and.
Droiched aile la Tairrdelbach h-Úa Concobair ar Ath Luaín, & coblach Connacht ica denom, cor' gabsat giallu Fer Teftha & cor' indarbsad Murchadh h-Úa Mail Sechlainn a Mumain.
An fer léighind h-Úa Catharnaigh mortuus est.
Kl. enair for cétain & xx.i. fuirre.
Gilla na Naem h-Úa Fergail do eg ina senoír & a adnacol a n-Ínis Clothrand.
Domnall mac Ruaidhri h-Úi Mail Muaidh, rí Fer Cell, do marbadh do Uib Luanaim.
Concobar, mac Donncadha, maic Domnaill h-Úi Mael Sechlainn, do marbadh a n-gemil la Murcadh h-Úa Mail Sechlainn.
Art h-Úa Mael Sechlainn, rígdamna Temrach mortuus est.
Secht fir dég do rigraidh Laighen do marbadh & do dalladh la Murcadh mac Murchadha, im Domnall mac Faelain & im Murchertach mac Gilla Mo Colmóc & im Murchad h-Úa Tuathail & im tri macu Mec Gorman.
Kl. enair for dardaín & aenmadh déc fuirre.
Concobar mac Diármuda h-Úi Briáin, rí Tuadhmuman & Desmuman & Lethe Mogha & fer índsaighe Erenn, do gabail galair & a ég de a Cill Da Lua a n-ailithre. Toirrdelbach a derbrathair do gabail righe Muman.
Gilla Sinítan mac maic Amalgaidh, taisech Callraigi in Chalaidh, do marbad do Bregmuíne.
Donnchadh h-Úa Concobair, ri Ciarraigi, do marbad la Coin Mara mac Conmara.
Dondchad mac maic Carrthaig la Sil Muredaigh occisus est.
Mac Fergail h-Úi Mael Mhuaidh, rí Fer Cell, do marbad o mac Ruaidhri h-Úi Mael Muaidh a n-Durmaig Coluim Chille.
Fer léigind Aird Macha .i. Cathusach h-Úa Geir Cháerach quieuit.
Kl. enair for aíne & ail déc fuirre.
Murchadh h-Úa Mael Sechlainn, ard-flaith Temrach, a báss co felltach.
Donnchadh h-Úa Con Chenaind do ég.
Tairrdelbach h-Úa Bríain & Fir Muman do techt a Connachtaib co Ruaidhbethigh, cor' marbad foirenn mór dib and, im h-Úa n-Domnaill ríg Corco Baiscind, & ro h-escradh Gilla Brenainn mac maic Flaind h-Úi Murcadha, taisech lochta tighe Tairrdelbaig h-Úi Choncobair, gerait gaiscid Chonnacht uile, co rus-díchendsad Mumnigh. Gairid iarsin co rancatar Mumnigh an Ruaidbeithech cétna, cor' cuirset Connachta a n-ár, & cor' marbad and h-Úa Concobuir Ciarraigi, & co nn-dechatar drem ar dasacht dib.
Aithrighadh Murcadha h-Úi Mael Sechlainn & a índarba a Mumain la Tairrdelbach h-Úa Concobair la ríg n-Erenn, & Conchobar mac Tairrdelbaig a mac fen do righadh for Midhi o Sinaind co fairrge.
Mor-thinol ac cleirchib Erenn & Connacht uile im Mureadhach h-Úa nDubthaigh, .u. cét sacart & da espoc dég a lín, d' iarraidh fuaslaicthe do Ruaidhri mac Tairrdelbaig h-Úi Choncobair ara athair iarna gabail do Tighernan h-Úa Ruaircc & do Conchobar da brathair fen ria lamaib Tairrdelbaig ína aíndligedh. Ro gell didiu Tairrdelbach co tibredh ar amus na cleirech im belltaine robo neassa doib.
Oigh-síth do dénom lasin ríg la Tairrdelbach & la mac fri re tri n-aidhche ar mís iar m-bliadain co leith in hoc anno.
Mac Neill{folio 22b2} h-Úi Lochlaind do indarba a Tir n-Eogain & h-Úa Gairmlegaigh do ríghadh 'na ínadh.
Aedh mac Muircertaigh h-Úi Dubda, rí h-Úa n-Amalgaidh & h-Úa Fiachrach mortuus est.
ISin bliadain cétna-sa ruc rí Erenn .i. Tairrdelbach h-Úa Concobair, an baile etir Loch & Cluain I Birnn & itir Loch na n-Én & an abind sair, & tuc Gilla na Naem O Flaind, comurba Comain, ór do fén & da braithrib da cind & Murcadh mac maic Aireachtaigh Húi Raduib ina dilsi do gress.
Kl. enair for satharn & .xx.ííí. fuirre, & bliadan bisex.
Concobar mac Tairrdelbaig h-Úi Choncobair do marbadh do Uib Dublaich & do Feraib Tulach, & do choccar Fer Midhe uile co h-incleithe ro marbadh, & ac Belach Mune na Sirride ro fellad fair, & sé a rige Temrach 'ga marbad.
Domnall h-Úa Con Fhiacla, rí Teftha, obit.
Cerball h-Úa Findallan, rí Delbna, do é
Cinaeth Mag Amalgaidh, taisech Callraigi mortuus est.
Sluaiged la Tairrdelbach h-Úa Conchobair a Midhi, coro roind Midhi itir da ríg, tar eis áir & esbadha do tabairt ar Midhechaib cur' bo indamail lai bratha ín tres tuc .i. ar Uib Senchain.
Mac aile Tairrdelbaig do thesdail .i. Tadhg in t-adhbar ríg rob aille & rob fherr & ro bo beodha ro bai ar Erinn.
Mor-sluaighedh & mor-tinol ac cleirchib Erenn .i. comurba Padraic & comarba Coman, & h-Úa Longhargan & Tairrdelbach h-Úa Concobair & Tigernan h-Úa Ruairc & Ua Fergail, do fuaslacadh do Ruaidhrí Húu Chonchobair & do Domnall h-Úu Flaithbertaigh & do Cathal h-Úu Choncobair, & ro foslaiced dib ar cínd a n-etire & a luighe, & ar cenn enigh na cleirech.
Mor-thinol fer n-Erenn, laechaib cleirchib, & la Tairrdelbach h-Úa Conchobair & la Tairrdelbach h-Úa m-Briain, co n-dernsad óg-shith na h-Erenn oired no bedis 'na m-bethaidh, do reír na cleirech
Donncadh Mac Carrthaig do ég a n-gemil ica brathair.
Gilla Áengusa O Cluman, ollam Condacht re dán, do ég.
Kl. enair for luan & .íííí. uathaid fuirri.
Tadg mac Toirrdelbaig h-Úi Choncobair mortuus est.
Cocadh mor do eirghe co coitchend etir feraib Erenn, co tancadar Fir Muman sluaiged do chum Midheach & Connacht, cor' eirigh Domnall h-Úa Conchobair & drem do Condachtaib, & Fir Midhe, cor' muidh do Mumnechaib, & cor' cuiredh a n-ar co mor, & ro imposed iarom.
Creach mór do denom do Sil Muiredhaigh a n-Uib Briuín, co tucsat bruid & bú esti.
Creach la h-Uib Briuin a Midhi, co tarla mac Mail Sechlainn & Fir Midhi doib, cor' facsat h-Úi Briuin ar adhbal.
Amus do tabairt la h-Uib Bríuin & la Connachtaib ar drem do coblach Sil Muiredhaigh & na Tuath, cor' marbadh and Murchadh h-Úa Mael Brenaind, taisech Clainne Concobair, & rí h-Úa m-Briuin na Sínda .i. Donnchad h-Úa Mandachain.
Ruaidhri mac Cathail h-Úi Chonchobair do marbad la Feraib Brefne.
Ruaidrí h-Úa Flaithbertaig do marbad la h-Ua n-Ócan, nó is la Mumnechaib ro marbad.
Maidm mor le cablach I Concobair ar cablach Fer Muman & Gall Luimnigh ac Buindi in Beithi for Sinaind.
Maidm Dune Dubain re Murcadh h-Úa Mael Sechlainn & ria Cairpre h-Úa Ciarda for Feraib Brefne, ubi .ccc. uiri ceciderunt im Serrach h-Úa Condachtaigh & im Cathal h-Úa Cathluain & im h-Úa Cumran.
Find h-Úa Cerbaill, rígdamna Éile, occisus est.
Kl. enair for mairt & .xu. fuirre, bliadan tanaisti bisex.
Crech mor la Tairrdelbach h-Úa Concobair tar Ath Luain a Teftha, cor' airg Muintir Mail Fhinna & a n-urmor uile, co tucadh amus fair im cend cleithe Atha Luaín ar drem do deiridh in t-sluaig, cor' thoit cliath an drochaid fúthaib, co baith & cor' marb moran do drochainib and, & tuc ri Erenn na bái bái lais.
Mac Gilla Crist h-Úi Mael-Brenaind do h-ég.
{folio 23a1}h-Ua Donnchada Gilla Padraic rí Osraigi do Uib Braenan occisus est.
Aird-espoc Laigen quieuit.
Congal mór etir Connachtaib & Firu Muman & h-Úu Briuin & Conmaicne, & Fir Teftha & Midhigh anoír fó Chondachtaib, co tancatar Fir Muman andess, cor' thinolsat Connachta 'na n-aghaidh, cor' moidh for Mumnechaib, cor' marbad dream.
Sluaiged la Tigernan h-Úa Ruaircc co Magh n-Áei tar éis Sila Muiredhaigh, cor' loisc Dun Imdaín & cor' airg Magh n-Aí,
Crech mór la Ruaidhri h-Úa Concobair & la Sil Muiredaigh a nDartraighe, cor' airgset uile.
Mac Domnaill h-Úi Choncobair do gabail la Toirrdelbach h-Úa m-Briain tre furail Ruaidhrí h-Úi Chonchobair.
Raghnall mac Turcaill, rí Gall Atha Clíath, co n-imadh cét do marbadh re Descert Bregh.
Domnall O Bráin, rí Breghmuine mortuus est.
Cellach h-Úa Cellaigh, rí Bregh, occisus est o Flaithbertach h-Úu Cathasaigh & o Gallaib Atha Clíath.
Gilla na Naem, mac maic Con Medha h-Úi Láegachan, do thoitim la derbrathair fen .i. Domnall, & Cu Medha a mac quieuit.
Kl. enair for cétain & .xuíí. fuirre.
Gilla Mo Conne h-Úa Cathail, rí h-Úa Fiachrach Aidhne, do marbad do mac maic Domnaill h-Úi Chonchobair.
Maidm Atha Luaín for Domnall mac Toirrdelbaig for Uib Maíne ria Feraib Teftha, a n-dorchair mac maic Amalghadha h-Úi Flaínd, et alíí.
Nert Iudhaidhe do thoirned lasna Cristaidhib.
Duarcan h-Úa h-Eagra do marbad d' Ua Gadhra.
Kl. enair for dardaín, & .uii. uathaid fuirre & bisex.
Mór-choínde la Toirrdelbach Ó Conchobair & la Tigernan h-Úa Ruairc im Sinaind. Domnall h-Úa Fergail cona muntir do chongar h-Úi Ruairc, & ín t-Aithcleireach h-Úa Fergail da bualadh do chloidim, cor' ledair co mor, cor' marbad e fén índ. Eachmarcach mac Branan & Mac Airechtaigh h-Úi Raduib do marbadh and ac dul a n-díaidh h-Úi Ruairc da athmarbad, & eraic h-í Ruairc do búain do Conmaicnib amal ro marbtaís.
Crech la Tairrdelbach h-Úa Conchobair i n-Airrther Midhe cor' airg Muintir Láeghechan.
Oitir, rí Gall Atha Clíath, do marbadh do macaib Turcaill.
Muiredhach Sindach, rí Teftha, mortuus est.
Sitriuc h-Úa Briain, rí Bregmune, do thoitim le da mac Congalaig h-Úi Bráin a fill.
Mac Fergail h-Úi Mail Muáidh, rí Fer Cell, occisus est o Uib Braccáin.
Mael M' Áedhóc h-Úa Morghair, aird-espoc Erenn & Alban quiéuit.
Kl. enair for sathurn & .uii.l. xuiii.iiim.c.x.íx.
Torand & saighnén do techt a n-enaír, cor' gab in tene an Íubar Ciaran, coru tre nert daíne ro baidhedh, & cor' marb .xiii. ar cét do chairib fan iubur.
Muirchertach h-Úa Mael Mocherghe, espoc h-Úa m-Bríuin quieuit.
Crech la Toirrdelbach h-Úa Concobair ar Luighne Connacht cor' airg uile.
Sluaighedh la Murchertach mac Nell maic Lochlaind co Conull & co n-Eóghan & co n-Airgíallaib a n-Ulltaib, cor' índairsed etir cella & tuatha, co rucc braigdi leis iartain.
Cellachan mac Maic Carrthaig mortuus est.
Sluaiged la mac Maic Lochlaínd, co ruc braighdi Tigernain h-Úi Ruairc & Murchaidh h-Úi Mail Sechlainn & Conmaicne & Fer Teftha lais don chur-sin.
Callraighi do argaín o Shil Ronan & a n-índarba a Condachtaib a cinaidh Gilla Ulltan maic maic Carrgamna.