Kl. enair .úii. feria .uii. luna.
Gilla Coluim O Mail Muáidh, rí Fer Cell, & a ben do marbadh don Géoccach h-Úu Aillén.
Maidm la Tairrdelbach mac Ruaidrí h-Úi Choncobair la rig Connacht & le Sil Muiredhaigh for Conmaicnib la rig Connacht & le Sil Muiredhaigh for Conmaicnib a Muigh Ái, co tard ár Conmaicne and im mac Con Caille h-Úi Fergail & am Gilla na Naem h-Úa Fergail & an Duarcan mac Duib Dara Ua Eolais & sochaidhe árchena.
Maidm re Feraib Breifne for Sil Muiredhaigh a Muig Brengair, du a torchair sochaide im Menmuin h-Úa Muiredhaigh & am Ruaidhri h-Úa Muiredhaigh.
Creach la Murcadh mac Fhlaind h-Úi Mael-Sechlainn, ríg Midi, co Loch Uachtair, cor' marbad drem do muintir h-Úi Ruairc and.
Mac Gilla Colaim h-Úi Mael Muaidh, rí Fer Cell, occisus est o Uib Aillén a fill.
Kl. enair for domnach & a .xuíí. xuiii fuirri.
Sicc mor, co téighdis groigthi & imirgecha ar in eighridh.
Cenannus & Lughmadh do loscadh.
Crech mor la Murchertach h-Ua m Bríain for Conmaicnib & for Firu Teftha.
Cathal mac Cathail h-Úi Mughroin, taisech Clainne Cathail, mortuus est.
Cluain Maic Nois d' argain do Dail Cais a comairle Muirchertaig h-Úi Briain.
Mordal fer n-Erenn etir laechaib & cleirchib i Fiadh Aengusa im Muirchertach h-Úa Briain ríg Muman, co feraib Muman, Mael Muiri h-Úa Dunan aird-espoc Muman, & Cellach mac Aeda comarba Padraic. Is si-seo uimir aesa graidh batar isin mordail sin .uííí. n-espuic .l. & .ccc.xuííí. do sacartaib & .xxuii. deochain, & ni fuil airim ara med do cleirchib. Ro cínded riagla
Senadh mor Uisnigh isin bliadain-sin.
Crech la Tairrdelbach O Concobair, cor' airg Termund Da Beoóc. Crech aile lais cor' airg co Bend Eachlabra & co Sliab Raissen & co Loch Eirne.
Kl. enair .íí. feria .xx.ix. luna, bisextilis annus.
Tir Da Glass & Fabur do loscad ex parte.
Ugaire h-Úa Lorcaín, rí h-Úa Muiredaigh in penitentia quieuit a n-Glind Da Lacha.
Raith Aird Macha do loscad cona templaib.
Crech la Cenel{folio 20b1} n-Eogain a Fine Gall & co Droiched Dubgaill, co rucsad bu & bruid imda.
Gormlaith ingen Murchadha maic Máil na m-Bó, bancomurba Brighdi, mortuus est.
Kl. enair quarta feria .luna. .x.
Mael Sechlainn h-Úa Concobair, rí Corco Mruadh, a fratre suó occisus est.
Mor-sluaighed la Muirchertach h-Úa m-Briáin, la ríg n-Erenn & la mathaib Erenn, laechaib cleirchib, co Grenoíc a comdail maic Maic Lochlainn, & ni tanic-seom and, & tanic comurba Padraic uadh & do iarrastair eadh cairdhi chom a thechtana.
Cliathach etir Muintir n-Gillgain & Munter Mhael Marthain, cor' marbad sochaide do Muntir Gillgan ima taisech & ima mathaib archena.
Donnchadh mac Taidhg h-Úi Bríáin & Cellach mac maic Mail Íssu, comurba Patraic, & mac Aedacan espoc.
Gabail Murchaid h-Úi Mael Sechlainn la Muirchertach h-Úa m-Briain.
Bratan do gabail a Cluain Maic Nois issin bliadain-sea, da traigidh déc ina fhad, da dorn déc ina leithead cen scoltadh, tri duirnn & da mer a fhada eithri a braighead.
Kl. enair for dardaín & aen fichet fuirre.
Maidm ar in Gilla Sronmael h-Úa Ruaircc ria
Murchadh h-Úa Mael Sechlainn uibi cecidderunt
[gap: extent: 2/3 words]
..
Fabur & Cluain Iraird & Cell m-Benéoin & Cunga & Ceall Cuilínd & Cell Caíndigh & Ard Patraic do loscud isin bliadain-si.
Galar do gabail Muirchertaig h-Úi Bríain co n-dechaidh a tasc fo Erinn, & cor' imposat fir Erenn air, & co ro gab Díarmuid h-Úa Briain rige Muman.
INdarbaidh didiu Tairrdelbach h-Úa Concobair a brathair .i. Domnall h-Úa Conchobair a Mumain & Conmaicne do Muigh Aí.
Mor-sluaigedh la Tairrdelbach h-Úa Concobair la rig Connacht cona sochraidi o Leth Cuind .i. im Domnall mac Maic Lochlainn, co Tuaiscert n-Erenn & co Feraib Midi co Tulaigh I Dedaigh, cor' feradh debaidh etir marc-shluagh Connacht & Muman, cur' muid for Mumnechaib, cor' marbad sochaidhe and im Cathal Ua n-Duibcind & ím Ua n-Grada. Do-ber didiu Tairrdelbach cairdi do Feraib Muman dar sarugud Lethe
Domnall h-Úa Conchobair do gabail do Uib Maine & a thabairt a l-laim Tairrdelbaig.
O Longsigh, rí Dal Araidhi, occisus est a n-dighail Bernain Ciarain do sharugad dó isin mís-sin.
Muirchertach mac Maic Lochlainn, rígdamna Ailig, & Ruaidri h-Úa Canannan, rí Ceneoil Conaill, occisi sunt.
Mor ingen Ruaidhri mortua est.
Sil Muiredhaigh do dul í n-Aidhniu do chaithem a feoír & a h-arba.
Cath re mac Murchadha maic Dhiarmuda maic Mail na m-Bo for Mael Mordha h-Úa n-Domnaill, ríg h-Úa Cendsilaig, uibi multí occisi sunt.
Crech la Tairrdelbach h-Úa Concobair a n-Íarthar Midhi, cor' airg uile.
Donncadh h-Úa h-Eochada, rí Ulad, do dalladh d' Ú Mathgamna, & rigi do gabail do fen.
Boár mor oband & gallra imarcrádacha isin bliadain-sin.
Kl. enair for aíne & ii fuirri. Tertius annus bisextilis.
Diarmuit h-Úa Briáin, rí Muman, do gabail do Gallaib Luimnigh i fill, da brathair .i. do Muirchertach.
Tairrdelbach O Concobair do gabail giall Tuathmuman & do tabairt a righi do mac Taidhg h-Úi Briain. An mac Taidhg cétna do impodh fair-sium isin bliadain cétna, co tanic-sin i Tuadhmumaín, cor' marbad les mac Taidhg.
Bualadh Tairrdelbaig h-Úi Choncobair a n-Ath Bó do drem dia muíndtir fen .i. do macaib Mael Sechlainn maic Aeda, maic Rúaidhrí, acht cena terno-som ass iarom.
Cath le Domnall mac Muirchertaig h-Úi Briain for Laigniu, du a torchair Donnchadh mac Murcadha, rí Laigen .i. cath
Órlaith ingen Murcadha h-Úi Mael Sechlainn, ben Tairrdelbaig h-Úi Conchobair, mortua est.
Dub Essa fech so ingen maic Aedha maic Ruaidhrí, quieuit.
Coblach la Tairrdelbach Ua Concobair, ríg Connacht, cor' airg Domnall mac Con Slebe h-Úi Ferghail{folio 20b2} & co tanic Murchadh h-Úa Mael Sechlainn ina theach, & cor' daingned les Buindi an Beithe, & cor' idhbair tri seodu do Chiaran i Cluain .i. corn co n-ór & bledhe co n-ór & mullóc uma co n-ór.
Mide do roind etir da mac Domnaill h-Úi Mael Sechlainn. Mael Sechlainn do toitim fo chétóir la Murchadh.
Kl. enair .uíí. feria luna xiii. bisextilis annus.
Creach la Tairrdelbach h-Úa Concobair a Mumain, cor' loisc & cor' mur Boroma & Cend Coradh, & cor' marb sochaidhe, co tard buár & bruid imdha lais, noco tard in m-bruid do Dia & do Flandan.
Diarmuid h-Ua Briain a righe Muman & Muirchertach d' aithrighadh.
Gorta & cocadh mór a Leith Mogha.
Ár muintiri Cille Dara ó Uib Bairrche.
Ár muntire Achaidh Bó imon secnab Ua Scolaigi o Éilib.
Sluaighed la Diarmuid h-Úa m-Briain & la Feraib Muman a Condachtaib, cor' ladh ár fer Muman isin Ruaidhbeithigh, co facsad a lón & a n-eich & a n-airm & a n-édedh.
Fassughudh Laigen uile acht bec, & a scailedh fo Erinn.
Kl. enair for luan & xxiiii. fuirre.
Diarmuid h-Úa Briain & Fir Muman do índrudh Thire Fiachrach
Mael Muire Ua Dunain, aird-espoc Erenn, quieuit i Clúain Iraird.
Geill Murchadha h-Úi Mail Sechlainn la Tairrdelbach h-Úa Conchobair.
Diarmuid mac Enda maic Murchada, rí Gall & Laigen, quieuit a n-Ath Clíath.
Kl. enair for Mairt & .u. fuirre.
Diarmuit h-Úa Briain, rí Lethe Mogha mortuus est.
Brían mac Murchada, rí Tuadhmuman occisus est.
Sluaiged la Tairrdelbach h-Úa Concobair & la Murchadh h-Úa Mael Sechlainn a Mumain do gabail a n-gíall, co tucsat a n-gialla leo, im Cormac mac Mec Carrtaigh a Desmumain.
Sluaighedh aile lasin lucht cétna, co tucsat gialla Laighen, & tucsat Domnall mac Murchadha h-Úi Mael Sechlainn ar éicin o Ath Clíath.
Geill Leithe Cuind do tabairt a h-Ath Cliath ar éicin tria forbais la Tairrdelbach h-Úa Concobair, & righe Gall do gabail dó, iar n-dichar Domnaill Gerrlamaigh h-Úi Briaín.
Domnall mac Ruaidhrí h-Uí Concobair do ég.
Ruaidhri h-Úa Conchobair, aird-rí Condacht & fer indsaighe Erenn, ina prim-shenoir uasal aithrigeach do éc a Clúain Maic Noís.
Mor-sluaighedh Connacht am Thairrdelbach O Conchobair co Ceand Coradh, cor' chuirset h-e isin Sinainn etir cloich & crand.
O Baigellain, ollam Erenn, do marbadh ón Spaillech O Flandacan ar n-gabail tighe fair.
Kl. enair for cétain & .xuí. fuirre.
Murchertach h-Úa Briain rí Erenn do éc isin sesedh bliadain a threblaidi íar n-aithrighe moir, & a adhnacol a tempall Cille Da Lua.
Aed h-Úa Con Cenaind, rí h-Úa n-Diarmuda, mortuus est.
Aed h-Úa Braenan, rí Airrthir Laigen mortuus est.
h-Úa Tuathail, rí h-Úa Muiredhaigh, occisus est.
Mor-coblach la Tairrdelbach h-Úa Concobair, la ríg Erenn rí Erenn, ria rédiughudh Sinna lais, co righ Laigen .i. Enda mac Murchadha, & co ríg n-Osraige .i. Dondchadh Mac Gilla Padraic, & co mathaibh Gall Atha Cliath ume, co Cill Da Lua, do caithem bidh fer Muman.
Kl. enair for dardaín & .uíí. fichet fuirre.
Niall mac Domnaill, rígdamna Ailig mortuus est.
Aenach Taillten do denom la Tairrdelbach cétna isin bliadain-sin.
Tri prim-drochaid dono do denom la Tairrdelbach cétna a Condachtaib .i. drochad Atha Luain & drochad Atha Crocha for Sinainn, & drochad Duin {folio 21a1} Leoda for Succa.
Crech drochaid Atha Luain la Connachtaib a Mide la Tairrdelbach h-Úa Concobair a Midhi, cor' índarb Murchadh h-Úa Mael Sechlainn isin tuaiscert, & geill do tabairt leis ar fáesam comurba Padraic & na Bachla Issa.
Domnall h-Úa Mael Sechlainn & Tuaiscert Erenn do taidheacht dia furithin a Midhi dorisi, & do-ronsad Connachta & Tairrdelbach sidh ceilgi friu.
Kl. enair for satharn & .ix. dec fuirre.
Domnall mac Mec Lochlainn, rí Thuasceirt Erenn & fer gabala giall n-Erenn, mortuus est.
Rigbardan mac Con Coirne, rí Eile, mortuus est.
Mac Deoradha h-Úi Flaind, rí Tuaisceirt Erenn, do bathadh
Samuel espoc Atha Cliath in penitentia quieuit.
Muiredach h-Úa Flaithbertaigh, rí Iarthair Connacht mortuus est.
Mor-sluaighedh la Tairrdelbach h-Úa Concobair, la ríg n-Erenn, i Muigh Birra, oc caithem Urmuman & do thendad giall for Desmumain. Fri re tri mis in gemridh dó and, & do raind Mumain etir Clainn Carrtaigh & Sil m-Briain.
Sluaiged la Tairrdelbach h-Úa Concobair a Mumain, co ro laised grithghair mor forro, & cor' airgset Ard Finaín. Tancus tria deiridh in t-sluaigh ac dul fo deas, cor' marbadh and Aed h-Úa hEdhin, rí h-Úa Fiachrach Aidne, & Muiredhach h-Úa Flaithbertaigh, rí Iarthair Connacht, & Muirghius h-Úa Lorcan, et ailíí.
Concobar h-Úa Focarta, rí Desceirt Eli, occisus est.
Kl. enair for domnach & .xx. fuirri.
Aedh mac Domnaill h-Úi Ruaircc, rí Airthir Condacht, do marbadh do Midheachaib.
Mac Mec Carrthaigh do taidhecht a tech Tairrdelbaigh h-Úi Chonchobair ríg Erenn, & Tairrdelbach h-Úa Briaín do gabail lais, & rigi Tuadhmuman do Tadhg h-Úu Briain .i. mac a athar & a máthar fen.
Aed mac Duinn Sleibe h-Úi Eochada, rí Ulad, do marbadh d'U Mathgamna i cath.
Mael Mordha h-Úa Domnaill, rí h-Úa Cendsilaig, & a cleircecht fuair bass.
Mael Sechlainn O Donnacan, rí Aradh Tíre, occisus est.
Creach la Tairrdelbach h-Úa Concobair co Loch n-Erne, co tuc broid & bu imda.
Kl. enair for luan & prim fuirre.
Croch Crist a n-Erinn isin bliadain-sin, co tucadh mor-chuairt di la ríg n-Erenn .i. la Tairrdelbach h-Úa Concobair, & cor' chuindigh ni di d' fhastadh a n-Erinn, & ro leced do, & do cumdaighedh laís h-í a Ros Coman.
Domnall mac maic Donnchadha, rígdamna Midhi, do marbad do Gailengaib.
Donnchadh mac Taidhg Maic Carrthaigh, rí Desmuman, mortuus est, & Cormac a brathair do righadh.
Maidm ar Conmaicnib re muntir Rosa Cre & o Eilib, uibi cecidit Dub Dara mac Duib, et alíí multí.
Tadhg h-Úa Maille, rí Umaill, do bádhudh cona luíng a n-Áraínd.
Dondchadh h-úa Gilla Padraic, rí Osraige, do marbad.
Mor-sluaighedh la Tairrdelbach h-Úa Concobair for Mumain. cor' airg Ciarraige, co riacht fen Corcach, co tancatar maithe Desmuman ina theach, im Dondchadh Mac Carrthaigh & im Cellach h-Úa mBric & im h-Úa Faelan & im Ua Conchobuir Ciarraighe.
Kl. enair for mairt & .xíí. fuirre.
Tadhg mac Maic Carrthaigh, rí Desmuman, do éc iar mor-aithrighe a Caisel.
Sluaiged la Tairrdelbach h-Úa Conchobair for Loch Dergderc,
Tri caisdeoil la Connachtaib .i. caistél Gaillme & Caistél Cul Maile & Castél Duín Leódha.
Mor-longport lasin ríg cétna ic Ath Caille, co tucadh a oighreir o Desmumaín dó, & cor' cumaiscet Gaill Luimnigh fris and sin, & is and ro bai im chaisc & o samuin co beltaine do isin longport-sin. Ro imposat didiu Conmaicnigh & Midhigh & Leth Mogha fair-siun and sin. Do-rindi-sin díu crech for Conmaicnib & for Airther Midi. Crech aile lais arnamarach ar in lucht cétna. Do thinoilsed didiu Conmaicne & h-Úi Briuin & Midhigh a n-oiris catha do Thairrdelbach immon creich sin, conidh andsin ro brisedh cath{folio 21a2} Craibe for Conmaicnib & for Mideachaib, cor' cuiredh a n-ár & cor' h-airgeadh íat. Tancatar didiu Desmuma & Laigin & Midigh & Conmaicne iarna n-grisadh doib a h-aithle an madhma-sin a n-Íarthur Mide do tíachtain a Condachtaib, noco cualatar in rí do beith mor-tinol ic Ath luain & co ro h-índisedh doib geill Desmuman do marbadh im Cormac mac Maic Carrthaigh. Scáilidh didiu cách o chele dib dia tigib, & soáidh Mac Carrtaigh co bronach dia taigh ar marbadh a maic. Tucad cairdi do etirib in luchta aile.
Creach la Tairrdelbach a Midhe, co tuc broid diairme laiss.
Mael Sechlainn mac Taidhg h-Úi MaelSechlainn do marbadh do Midheachaibh.
Muiredhach mac maic Aeda, rí Clainde Coscraigh do ec a crabadh.
Kl. enair for dardain & .xx.iii. fuirre.
Aedh mac Domnaill h-Úi Concobair do gabail dia brathair.
Flann & and Gilla Riabach, da mac Aineislis h-Úi Eidhin, do marbad do Choncobur h-Úu Flaithbertaigh.
Gilla Bruide h-Úa Ruairc occisus est.
Sluaigedh mor la Tairrdhelbach mac Ruaidhri la rig n-Erenn, co hAchadh Bó a n-Osraigi, co tardsat a lan-riár dó isin impodh do-ronsad fair rome.
Sluaiged aile didiu lasin righ cétna a Midhe co tanic Tigernan h-Úa Ruairc, rí h-Úa m-Briuin & Conmaicne ina tech, & co n-derna comluighe ris ima reir, & co n-dernsad indarba Murcadha h-Úi Mael Sechlainn, ríg Midhi a Mumain, & co ro roind Midhi a cethair etir tri Ua Mael Sechlainn & Tigernan. Do-chuaidh didiu Tairrdelbach co h-Ath Cliath co raibe aidche and, co tard righi Gall Atha Clíath do rig Laigen.
Mac Donncadha h-Úi Mael Sechlainn do marbadh la Murchadh h-Úa Mael Sechlainn.
h-Úa Cerbaill, rí Fernmaighe, do marbad.
Kl. enair for aine & .iiii. dec fuirre.
Enna mac Dondchadha maic Murchadha, rí Laigen d'éc.
Sluaiged la Tairrdelbach h-Úa Concobair, la ríg n-Erenn do denom ríg a l-Laignib iarsin. Tanic didiu Cormac mac Carrthaigh, rí Desmuman, do cosnum Laigen fris, co Sliab in Caithligh, & ro grendaig im cath h-é. Tanic Tairrdelbach ina fhritheng anair da saigidh, co rice an longport i raibe, cor' facaib-sium an longport, & ro cuirset Connachta ár Desmuman & ro loiscset an longport.
Mor-longport la Tairrdelbach mac Ruaidhrí a n-Urmumain o Lughnusad co feil Brigde, cor' chros Erinn ass ria ré aen-mís amal nár' cross rí roime riam, & ni falmuighthi an longport en-fecht dib. Feacht lais co h-Ath cliath, co n-dernsat Gaill a oigreir & cor' fhacaib a mac a righe and .i. Concobur. Do-luid didiu o Ath Cliath, & Fir Midhi & Conmaicne immaille fris, cor' airg Tir Conaill. Fecht aile leis asin longport cétna cor' airg co Monaidh Moír & co Glend Maghair, & tuc bai imda & bruid moir lais. Fecht aile lais cor' airg Descert Osraige uile & cor' marb h-Úa Caeróc andsen. Tancatar didiu Osraige uile ina teach, & tucsad giallu do. Do-chuaidh as-sidhe co Belach Mughna; cor' aithrigestair mac Maic Murchadha, & cor' ordaigh righe da mac fen forro .i. do Conchobar mac Tairrdelbaig.
Domnall Find h-Úa Dubda, rí O n-Amalgaidh & O Fiachrach & Cera, do bathadh ac tabairt creche a Tir Conaill .i. an duíne nach tuc éra ar neach riam.
Kl. enair .uii. feria luna .xu. fuirre.
Sluaiged la Tairrdelbach la ríg n-Erenn co riacht Corcach, & se fén ar tir & a coblach ar muir timchell co Corcaig, ac indrudh Muman do muir & do thir, cor' cuirset Cormac mac maic Carrthaigh i l-Les mór a n-oilithri, & co ro roind Mumain ar dó .i. in leath descertach do Dondchadh mac maic Carrthaig & an leth tuaiscertach do Choncobur h-Úu Briain, & tuc tricha n-giall leis dia thigh.
Cormac mac mec Carrtaigh do taidecht o ailithre & comluighe do denom re Conchobar O m-Briain & re Feraib Muman uile cenmotha Tuadmuma. Tanic Donnchadh mac maic Carrthaigh .xx.c. uaídhib, ar ni raibe issin comluighe, im h-Úa Caím & im Úa Muirchertaigh & im mathaib imdhaib aile.
Mor-choblach la ríg Erenn, la Tairrdelbach h-Úa Conchobair, nócha ar cét long a lín, do índrudh & do fassughudh Muman. Ro fassaigh didiu Machaire na Muman co Sliab Cáin & co h-Ard Padraic & co h-Uib Conaill, co tard iltaíntiu, & cor' marbad daíne imdha and.
Comrac da choblach for fairrge .i. coblach Connacht & coblach Muman; cor' muidh ar Muimnechaib, cor' cuiredh a n-ar.
Tairrdelbach h-Úa Conchobair, aird-rí Erenn, & comurba Íarlaithe timchill coitchend Tuama Da Gualand ota cend descertach Cluidh in Renda co Finnmagh. Tuc didiu in rí idhbairt ferainn uadha fen don eclais do ghres ota Ath m-Bó co Caill Clumaín .i. in leath descertach íartharach d' Iarthar Cluana do cach cleireach maith do biadh do Sil Muiredaigh a Tuaím, & an leath aile di ac teach n-aighedh Tuama i l-laim in t-secnabadh.
Murchadh h-Úa Mael Sechlainn do athrighadh & a mac 'na inadh .i. Domnall. Domnall didiu d' aithrighadh a cínd raithe & Diarmuit h-Úa Mael Sechlainn 'na ínadh.
Cath etir da righ Ulad, du a torchair Aedh Ua Mathgamna & Niall mac Duind Sleibe h-Úi Eochada, rí Ulad.
Kl. enair for domnach & a .xx.ui. fuirre.
Sluaiged la Tairrdelbach h-Úa Conchobair, la ríg Erenn a n-Uib Cendselaig. cor' loisc uile co tainic timchell o Loch Garman & a lam re fairrge co h-Ath Cliath.
Maghnus mac Maic Lochlaind, rí Ceneoil Eogain & an Tuaisceirt, do marbad do Chenél Chonaill & do Chenél Muain.
Kl. enair for mairt & .uíí. fuirri.
Cellach comurba Padraic, uasal-easpoc Erenn & an mac oighe pausauit.
Altoir mor daim líac Cluana Maic Nois d' oslacadh & seoíd do breth esti .i. cairrecan Tempuill Solman tucadh o Mael Sechlainn mac Domnaill, & cuidin Dondchada maic Flaind, & na tri seoíd tuc Tairrdelbach Ua Concobair .i. bledhi argid & copan airgid & cros oir tairis, & corn co n-ór, & corn h-Úi Rianda ríg Aradh, & cailech airgid & niam oír fair, co n-deisc, & copan Cellaig comurba Padraic.