Corpus of Electronic Texts Edition
Annals of Tigernach (Author: [unknown])

Annal T1070

T1070.0

K. ui.

T1070.1

Murchadh mac Diarmuta maic Mail na m-Bó, rí Laigen & Gall, mortuus est i n-Ath Cliath.

T1070.2

Conchobar mac in Cleirig h-Úi Conchobair rígdamna Connacht, do marbad do Uib Fallomuin.

T1070.3

Glun Iaraind h-úa Mail na m-Bó do marbadh do Feraib Midhi.

T1070.4

Murchadh Liathanach h-Úa Concobair, rígdamna Connacht, do marbad do Chonmaicnib a fell.

T1070.5

Cond mac meic Cuind, rí Teftha, occissus est o Feraib Brefne, cum aliis multís.

T1070.6

Muirchertach h-Úa Concobair, rí h-Úa Failghe, do dallad la derbrathair fén.

Annal T1071

T1071.0

Kl. Enair for Satharnn & .xx.ui.fuirri.

K. uii Enair for Satharnn & .xx.ui.fuirri.

T1071.1

Ruaidhrí h-Úa Canandan, rí Thiri Conaill, do marbadh.

T1071.2

O Mael Ruanaid, rí Ulad, do marbad.


p.410

T1071.3

Mac Rigbardan maic Con Corne, rí Elí, & mac Gilla Brighdi h-Úi Mail Muaidh, rí Fer Cell, occisus est.

Annal T1072

T1072.0

Kl. Enair for domnach & .uii fuirri.

T1072.1

Diarmuit mac Mail na m-Bo, rí Breatan & Índsi Gall & Atha Cliath & Leithi Mogha Nuadhad, do marbadh la Concobur h-Úa MaelSechlainn a cath Odba, & ár diairimthe do Gallaib & do Laignib uime.

T1072.2

h-Ua Flaithri, rí Ulad, & a mac Aisidh, rí h-úa n-Gabla, da loscad a tigh tenedh & sochaidhe olchena.

Annal T1073

T1073.0

Kl. Enair for Mairt & .xuííí. fuirri.

T1073.1

Concobur h-Úa Mael Sechlainn, rí Temrach, do marbadh do mac a derbrathar fein .i. do Murchertach h-Úu Mael Sechlainn tre mebail. A chenn do breith ar eicin asa adhnacal o Cluain Maic Nois co Cend Coradh la Toirrdelbach h-Úa m-Briain dia h-aíne Chasc mór. Rucadh in cend cétna fo thuaidh dia domnaigh


p.411

arís co n-dib failgib oír immaille friss tria firt & mirbuilib Dia & Ciarain.

Annal T1074

T1074.0

Kl. Enair for cétain & xxix fuirri.

T1074.1

Dunan aird-espoc Atha Cliath in pace quieuit.

T1074.2

Dunchadh h-Úa Cellaig, aird-ri h-Úa Maine occisus est a fratre suo per dolum.

Annal T1075

T1075.0

Kl. for dardaín & .x. fuirre.

T1075.1

h-Úa Canandan, rí Ceneoil Conaill mortuus est.

T1075.2

Gofraidh rí Gall do éc.

T1075.3

Sluaigedh la Tairrdelbach h-úa m-Briain co h-Ath Fir Dhiadh, co forgla fer n-Erenn uime, do chuindcidh giall for Oirgiallaib & for Ulltaib, acht ro impa cen giallo, cen etire, iar marbadh dreme dia muntir.


p.412

Annal T1076

T1076.0

Kl. enair for aenditen & .xxí fuirri.

T1076.1

Murchadh mac Flaind h-Úi Mael Sechlainn do marbad la h-Amlaim mac Maelan, ríg Gaileng, i cloictheach Cenandsa a mebuil, & a marbad fen fo chétoir, tre firt Coluim Chille, la Mael Sechlainn mac Conchobair.

Annal T1077

T1077.0

Kl. enair for domnach & .ii. fuirri.

T1077.1

Cluain Maic Nóis do loscadh cenmotha tempull Bernáin Chíaráin.

T1077.2

Murchadh mac Conchobair h-Úi MaelSechlainn do marbadh do Feraib Teftha per dolum.

T1077.3

INghen h-Úi Fhócartaig, ben Tairrdelbaig h-Úi Briain, do éc, & cradh diairme do facbail cona cellaib di.


p.413

Annal T1078

T1078.0

Kl. enair for luan & .xiii. fuirre.

T1078.1

Lethlobur O Laidhgnén, rí Airgiall, do ég, & Concobar h-Úa Briain, ri Ceneoil Eogain & Domnall mac Tigernain h-Úi Ruairc, rí Conmaicne, omnes occisi sunt.

T1078.2

Cend Faeladh mac Dungalaig, rí Muscraighi Thire, ordan Muman, mortuus est.

Annal T1079

T1079.0

Kl. enair for mairt & xx.iiii. fuirre.

T1079.1

Cellach h-Úa Ruanadha, ollam Erenn quieuit.

T1079.2

Aedh h-Úa Flaithbertaig, rí Iarthair Connacht, do marbadh la Ruaidhri h-Úa Conchobair.

T1079.3

Argain na Cruaiche{folio 19a1} la Tairdelbach h-úa mBriain & argaín Lacha Bendchair lasin ríg cétna.

T1079.4

Sluagad la Tairrdelbach h-úa mBriain co h-Ath Cliath & co


p.414

Firu Midi, co tainic Mael Sechlainn mac Conchobair ína theach la comurba Padraic & la Bachaill Íssa.

Annal T1080

T1080.0

Kl. enair for cétaín & coicid dec fuirri.

T1080.2

Fir Teftha & Mundter Geradhan & Cairpri h-Úi Ciardha do thecht ar creich a n-Uib Failge, co riachtatar co termund Chilli Achaid, cor' brisedh maidm forro, cor' marbadh and h-Úa Ciardha & mac Meic Finnbairr, taissech Munteri Geradhan, & sochaide mor.

Annal T1081

T1081.0

Kl. enair for aine & .xui. fuirri.

T1081.1

Mac Amalghada h-Úi Flaind, taisech Callraighi, do marbadh do Mael Sechlainn mac Conchobair.

T1081.2

Ára na naem d'argain do Gallaib.


p.415

Annal T1082

T1082.0

Kl. enair for satharnn & .xxuii. fuirri.

T1082.1

Domnall mac Taidhg h-Úi Choncobair, rígdamna Connacht, do marbadh do Cathal mac Aedha h-Úi Choncobair a fill.

T1082.2

Cathal h-Úa Concobair do thecht la Ruaidhrí mac Aedha in Ga Bernaigh h-Úi Choncobair, co sochraiti moir uime.

Annal T1083

T1083.0

K. i.

T1083.1

Aedh h-úa MaelSechlainn, rí Ailig mortuus est.

T1083.2

IN Meranach h-Úa h-Eochadha, rí Ulad, do bathad a Luimnech.

T1083.3

Tadhg h-Úa Taidhg, comurba Flandáin Cilli Da Lua, quieuit.

Annal T1084

T1084.0

Kl. enair for luan & .xx. fuirri.

T1084.1

Cell Da Lua & Tuaim n-Gréne & Mag n-Éo a n-Orbraighe do loscud do Chonmaicnib.


p.416

T1084.2

Concobar h-Ua Cétfadha, ordan Muman, mortuus est.

T1084.3

Donnchad mac Airt .i. in Cailech, maic Shen-Fergail h-Úi Ruairc, rí Brefne, co n-Airrther Chondacht & Cairpri & Gailenga, do theacht i l-Laignib, co tarraidh Murchertach

Written man. rec. over Murchad

h-úa Briain, rí Muman, co Feraib Muman & Gaill & Laigin & Osraige, co tardsat cath Mona Cruinneoíge, & cor' marbad and Dondchadh h-Úa Ruaircc, rí Airrthir Condacht, & Cendédigh Ua Briain, rígdamna Erenn, & Congalach mac Murchadha h-Úi Conchobair Failghi. et alíí .íííí. mile testa and. Rucad cend meic Cailig, righ Brefne, co Luímnech.

T1084.4

Teidm mor isin bliadain-sin, cor' marb cethraime fer n-Erenn. Is and ro gab ar tús tes, & ro sir fo chethri h-airdib Erenn. IS se fath fodera fochainn an tedma-sin .i. deamna thancatar a h-índsib tuaiscertachaib an domain .i. trichath & .x. cét ar fichit cét cach catha, amal ro índis Áenghus Occ mac an Daghda do Gilla Lughan ro tathaigedh an sith gach bliadain aidhchi shamna, & ad-chonnairc-sin fein aen-chath a Maistin dib .i. cath ro bai ac milliud Laigen. IS amlaidh do-ces do mac Gilla Lughan íat, & gach leth da roichedh a tesbach & a m-bruth as and ro gabadh a nem. Ar ro bái claidim tenedh a braighid gach fir dib, & airdithir neolla nime gach fer dib. Conidh esin fochond an tedma-sin.


p.417

Annal T1085

T1085.0

Kl. enair for cétain, & aen déc fuirri & is i-sin M.lxxx.u. bliadan o gein Crist.

T1085.1

Mac Domnaill h-Úi Ruaircc, rí h-Úa m-Bríuin Brefne, occisus est per dolum.

T1085.2

Treblaid mor galair for Thoirrdelbach h-ua m-Briain, corb e a méd cor' benadh a folt de.

Annal T1086

T1086.0

Kl. enair .u. luna. xii. secundus annus bisextilis.

T1086.1

Mael Issu h-Úa Brolchan, sruith-senóir Erenn & ard-shai na h-ecna, conidh e a med co n-derna fen liubra & eladhna lan-mora do amaíndse & do índleacht, & fuair bass a n-gradsaib De.


p.418

T1086.2

Tairrdelbach h-úa Briain, rí urmóir Erenn, mortuus est lxx.uii. anno aetatis suae, reighni autem xxii .i. isin dara bliadain fichit a flaithiusa, cor' crichnaig a betha, co n-dechaidh iar n-aithrighi. Tadhg a mac do éc in uno mense.

T1086.3

Maidm na Crincha ria n-Gallaib & Laignib for Mael Sechlainn mac Concobair, uibí cecidit Mael Ciaran h-Úa Cathasaigh & Mael Muaidh rí Fer Ceall, et alíí.

T1086.4

IN Sindach Find .i. Cínaeth h-Ua Catharnaigh, rí Teftha, & a mac, & h-Úa Muiredhaigh, taissech Muntire Tlaman, do marbadh a fill o Mael Sechlainn mac Conchobair ic Loch Muige Luatha.

T1086.5

h-Úa Baigellan, rí Airgiall, occisus est o Conaillib.

Annal T1087

T1087.0

Kl. enair. sexta feria xx .ííí. luna.

T1087.1

Mael Sechlainn mac Concobair rí Temrach, do marbad tre thangnacht.


p.419

T1087.2

Cath Conachla a Corand iter Ruaidhri na Saighe Buidhe, mac Aedha in Ga Bernaigh, h-Úi Concobair & Aedh mac Airt Uallaig h-Úi Ruairc, rí Connacht{folio 19a2} co torchair and Aedh h-Ua Ruairc & Muiredhach h-Úa h-Eolais & Sitriuc mac Con Sleibe h-Úi Fergail, & mac Gofraidh h-Úi Siriden, et ailii multi. Ruaidri h-Úa Concobair as leis tucadh.

T1087.3

Cath Ratha Edair iter Laighniu & Firu Muman, cor' maidh for Laignib. Muirchertach h-Úa Briain uictor fuit.

Annal T1088

T1088.0

Kl. enair for satharn & .íííí. fuirri.

T1088.1

Maidm Indsi Adarcaige la Ruadhrí h-Úa Concobair for Muirchertach h-Ua m-Briain, dú n-ar' cuiredh ár Muman connar' leígedh a coblach secha-sin, & do-rad beous ár for choblach an fir chétna. Tanic timchell tiar for in fairrge do indradh Connacht.


p.420

T1088.2

INdradh Corco Mruadh fo thri la Ruaidhri h-Úa Conchobair & la Condachtaib, & in tres fecht a-torcratar and triar maith do Condachtaib .i. Mac Cathail h-Úi Mugroin, taissech Claindi Cathail, & Cu Sinna mac Muirchertaigh, taissech Clainde Tomaltaigh, & Mac Gilla Crist maic Echtigirnn, taissech Corco Achland. 1

{folio 19a2}

p.9

T1088.3

Domnall mac Lochlainn & Conaill & Eogan do tiachtain do índradh Condacht fo comghelladh Muirchertaigh h-Úi Bríain, ríg Muman, & nir' comaill, co torachtatar son .i. Domnall cona shochraidi, co Raith Cruachan, co tarraidh Ruaidhri h-Úa Concobair, & cor' gab nert forro co tuc condmedh caicthigise doib uile, co n-deachatar dib linaib a Mumain, co ro millset co Imleach Iubair & co Loch n-Gair & Brug Righ & co Drumain h-Úi Cleirchén, & do mursat Lumnech, & tucsat cend maic Cailigh h-Úi Ruairc o Chnoccanaib Saíngil, & cor' toghailseat Cend Coradh, & ro gabsad .u. fichit laech etir Gallu & Gaedelo, & ro gabsad a n-giallu, co rucsat leo mac Mathgamna h-Úi Cennedigh esti, co tucadh bai imda & ór airged & cuirnn tara chenn & tar cend meic Congalaig h-Úi Óccan, & meic Eachach Loingsigh do bí 'sa broit cetna etcc.


p.10

T1088.2

Dubchoblaith, ingen Aeda h-Úi Concobair mortua est.

T1088.3

Mor ingen Tairrddelbaig h-úi Briain, ben Ruaidri h-Úi Choncobair, mortua est.

T1088.4

O Mail Girig, ollam Ulad mortuus est.

Annal T1089

T1089.0

Kl. enair for luan & .xu. fuirre. Cétbliadan for bisex.

T1089.1

Coblach mor la Muirchertach h-Úa mBriain ríg Muman for Sinaind & for Loch Ri, co ro aírgset Inis Bo Finde & Inis Clothrann, & cor' gabad Sinann friu la Ruaídri h-Úa Conchobair & la Connachtaib .i. Rechraith & Buindi in Beithe, co nach ro leged tairis-sin sís gerb' ailig léo. Tánic mac Flaind h-Úi MailSechlainn tara n-éssi co h-Ath Luain conár' leicedh siss na suas iat tre rath Ciarain cona naemaib, co n-dechatar uile for comairce


p.11

h-Úi Mail Sechlainn, co tardsat a longa do, co n-deachatar uile .i. Mael Sechlainn & O Conchobair a longaib & a n-eathraib, co ro indairset Mumain .i. Irmumain, co Cluain Cain Mo Dhimócc, conidh anbecht ma do fhacsat mil na duíne in aired-sin uile.

T1089.2

Gilla Caindigh h-Úa Flaitile do marbadh do mac Maic Cochláin, da brathair.

T1089.3

Dondcadh mac Domnaill Remuir maic Mail na m-Bó, rí Laigen & Gall, láech as amra ro bái 'na aimsir & cend cathaigthe as chalma ro bai do Leith Mogha, do marbadh do Ua Choncobair co n-Uib Failge, co n-Iarthur Laigen immaille fris tri baeghal.

T1089.4

Donncadh mac Gilla Padraic, rí Osraige occisus est.

T1089.5

h-Úi Maelsechlainn do dul a n-Uaithne Thire & a n-Uaithne


p.12

Fidbuidhe, co tucsat bu imdha leo.