Corpus of Electronic Texts Edition
Annala Uladh: Annals of Ulster otherwise Annala Senait, Annals of Senat (Author: [unknown])

Year U1340

U1340.0

Kal. Ian. iiii. f., l. ii., Anno Domini M.ccc.xl.1343

U1340.1

Slaine ingen Ui Briain ben Toirrdelbaigh Ui Concobuir & derbshiur a mathar fein fos, mortua est.

U1340.2

Derbail ingen Ui Domnaill, in aen bean rob' ferr tainic d'a cinedh fein riam, do thecht ar cuairt cum Conchobuir Mic Diarmata co h-Inis Doighri & galar a h-ega d'a gabail & a h-adnucal í Mainistir na Búille.

U1340.3

Dubchablach ingen Concobuir Mic Diarmata, ben Ui Birn, saí mna gan ímresain, mortua est.

U1340.4

Tómas Mag Samradhan, aen raghu taisech Erenn, mortuus est.

U1340.5

Muircertach O Briain, rí Tuadh Muman, d'eg & Diarmait h-Ua Briain do righadh i n-a inadh & a indarbadh sen le Brian O m-Briain & maithi Tuadh Muman do creidium do.

U1340.6

Uillíug mac Ricaird mic Uilliam Leith, macamh Gall Erenn ar einech & ar egnum, mortuus est.

U1340.7

Cathal O Madughan do marbadh le


p.476

Clainn Ricaird & ro bo do maithibh Erenn dó.

U1340.8

Donnchadh Cleirech O Mail Brenaind, canonach coradh i n-Oil Finn, a marbadh d'aen urchur soighdi le muínntir Hoibert mic Daibith Duinn Mic Uilliam.

U1340.9

Cathal Mac in Liathanaigh, ab na Trinoide, mortuus est.

U1340.10

Maidm mor le Clainn Fheorais & le Clainn Ricaird ar Uib Maine, du inar'marbadh en mac righ deg do Clainn Cellaigh, fa Concobur Cerrbach h-Ua Ceallaigh.

U1340.11

Aengus h-Ua Domnaill do righadh leis h-Ua n-Dochartaigh & le Domnall Dub h-Ua m-Baighill & le nert Aedha Reamhair Ui Neill & Níall h-Ua Domnaill d'athrighadh leó. Gairit as a aithle sin co tucsat {MS folio/column 72ra}imresain d'a ceile & do marbadh le h-Aengus & le Clainn Muircertaigh Aindiles O Baighill, taisech Tiri h-Ainmirech & a mac & Eogan mac Airt Ui Domnaill & daine imda aili eturru, leth ar leth.

U1340.12

Iohannes O l-Laitim, espuc Cille Aladh, in Christo quieuit.

U1340.13

Seoan Mac Eoaigh, macam suibespuc Erenn, idon, espuc Conmaicne, quieuit in Christo .

U1340.14

Concobur Mac Diarmata, rí Muighi Luirg, & Airtigh & Tiri h-Oilella & Tiri Tuathail & na Renn & secht m-baile do Clainn Cathail & in fer ris nar'gabadh gan urraim do buain do gach aen d'a tegmadh ris —oir do derbadur ughdair no h-aimsiri si gur'b'e sin aen ragha urrigh na h-Erenn, ar cruth & ar cheill, ar blad & ar buantidhlucadh, ar einech & ar egnum, ar agh & ar fhíruaisli , co nar' b'ínimarbagha nech ris don fine Gaidhelaigh i n-a aimsir fein. Co 'n-a derbadh sin adubert in file an duain d'a dan fein:


p.478

Rann—
    1. Da n-dernainn imuirbaigh as,
      Mac Diarmata, 's ni dernus,
      Cennus Temhra & Clainni Cuínn,
      Do barr Berbha do beraind.
    2. Ni fhaicim a n-Inis Fail
      Fer coimesa a g-cleith imdhain ;
      Ní fhuil co tech Cinn Choradh
      Nech ar nar'cinn Concobur.
    3. Imurbaigh ni denta dam
      Re feraibh Erenn assan,
      Gan imarbaid fhuair an geall
      Sluaigh fhinnurlair na h-Erenn.
a ég in urrigh sin i taigh mhór na Cairrgi, ar m-breith buadha o doman & o dhemhon, sechtmain re Samain, Dia Sathairn do shonnrudh & a adhnacali Maínistir na Buille. Ocus Fergal Mac Diarmata, a derbrathair séin, do righadh 'n-a ínadh.

U1340.15

(No, gumadh ar in Kallainn si budh coir Nícol Mag Raith.)

Year U1341

U1341.0

Kal. Ian. u. f., l. x.iii., Anno Domini M.ccc.xl.i.1344

U1341.1

espuc Luighne d'eg.

U1341.2

Murchadh mac Mailmuadh Uí Eaghra, ab na Buille & adbur espuic Luighne, quieuit in Christo.

U1341.3

Matha, mac Gilla Crist cleirigh Mic Diarmata, do marbadh le Muinntir nEilidhe ar in Coirr Sliabh.

U1341.4

Uilliam mac Matgamna Meg Raghnaill, do marbadh le macaibh Catail Meg Raghnaill.


p.480

U1341.5

Aedh mac Rooilb Meg Mathgamna, ri Oirgiall, d'eg & Murchadh Óg Mhag Mathgamna do thoghadh i n-a inadh & a eg i cinn shechtmaine. Maghnus mac Eachadha mac Rooilbh do ghabhail righi n-Oirgiall.

U1341.6

Art h-Ua Mail Shechlainn, ri Mídhe, do marbadh le Cormac m-Ballach O Mail Shechlainn & e fein do ríghadh i n-a inadh.

U1341.7

(Brian mac Ruaighri Mheg Uidhir, 15 Kalendas Februarii quieuit.)

U1341.8

(Nicol Magraith, comarba Termuinn Dabeog, mortuus est Nonis Septimbris.)

Year U1342

U1342.0

{MS folio/column 72rb}Kal. Ian. uii. f., l. xx.iiii, Anno Domini M.ccc.xl.ii.1345

U1342.1

Tomas mac Cathail Riabaigh Ui Ruairc, do marbadh le Clainn Muircertaigh is t-shamhradh.

U1342.2

Toirrdelbach h-Ua Concobuir, ri Connacht, & adbur rig Erenn, nech ro bo mó & rob' uaisli & rob' fherr einech & egnum do bí i n-Erinn i n-aen aímsir ris, do dul do cungnum le Tadhg Mag Raghnaill, la taisech Muinnteri h-Eoluis, co Loch Oirind a n-aighaidh Clainni Muircertaigh. Ocut Clann Muircertaigh d'a innsaighidh & blodh do Muinntir Eoluis leó & a lenmain doibh co Fidh Dorudha & aen urchur soighdi d'a marbadh ann & ní fes cia tuc. Ocus airmít ugdair na h-aimsiri si gurab' é sin gnim is mó do rinned le soigid a n-Erinn riam. Ocus bennacht na h-eigsi & na h-eladhna ar a anmain in airdrigh sin ; oír ní h-ímda aici fer a h-imcair na a h-altruma ar a eis. Et in Aptumno est occisus.


p.482

U1342.3

Brian h-Ua Fergail, adbur ardtaisigh Conmaicne & aen raghu mac taisech Erenn i n-a aimsir fein, ar m-breith buada o domon & o demhon d'eg. Ocus rainic gan aen guth achmosain o eigsibh & o ollamnaibh Erenn.

U1342.4

(Nualaith ingen Meg Mathgamna, mortua est 6 Kalendas Iuini.)

U1342.5

(Maighister Tomas Mac Gilla Coisgle do chur A.D. 1342.)

Year U1343

U1343.0

Kal. Ian. i. f., l. u., Anno Domini M.ccc.xl.iii.1346

U1343.1 (col.1)

Cagadh mor eter Mac n-Diarmata & Maghnus Mac Diarmata Gall in bliadhain sin & fell do dhenamh do clainn Bailltrin Mic Goisdelb 'n-a tigh fein ar Maghnus Mac Diarmata Gall & a marbadh ann & Cormac Caech Mac Fingin do marbadh ann.

U1343.1 (col.2)

Maghnus Mac Diarmata Gall do marbadh a fell do clainn Bailltrin Mic Goistelb 'n-a tigh fein & Corbmac Caec Mac Finghin do mharbadh ann beos.

U1343.2

Cagadh mor d'eirghi eter Ualgharc O Ruairc & Ruaidhri mac Cathail Ui Conchobuir & troid do thabairt doib d'a cheile & maidm do thabairt ar h-Ua Ruairc do Ruaidhri mac Cathail & gallóglacha h-Ui Ruairc uile do marbadh , idon Mag Buirrce & mac Neill Caim & a muinnter uile d'forgla. Ocus O Ruairc fein do lenmuin & a marbadh do Maelruanaig Mac Donnchaidh.


p.484

Ocus is é sin gnim as mo do rinned o bas Cormaic, mic Cuilennain, anuas i n-Erinn.

U1343.3

Ceithri meic Cathail, mic in Chaich Meg Raghnaill, do ghabail ar Loch in Sguir do Concobur Mag Raghnaill & Tomaltach Mag Raghnaill d'a m-breith leís co Caisel Coscraigh & a marbadh ann, —sgel is truaighi do rinnedh 'san aimsir sin.

U1343.4

{MS folio/column 72va}Comarba Padraig, idon, Daibid Mag Oirechtaigh, mortuus est.

U1343.5

Cu Uladh Mac Cathmhail, ardtaisech Ceneoil Feradaigh, do marbadh do Domnall Mac Cathmail.

U1343.6

Maidm la Brian Mag Mhathgamna ar Ghallaibh, d'a rainic tri cet cenn co lathair.

U1343.7

Niall O Domnaill & Clann Muircertaigh & mac Feidhlimthe & Maghnus Mac Diarmata do lenmhuin Ruaidhri mic Cathail, i Culmhail & maidm imircech do thabairt fair & ar Clainn Donnchaidh & ár adbal do thabairt forro, eter bathadh & lethradh & fhoillech & do crechaibh moraibh leis.

Year U1344

U1344.0

Kal. Ian. ii. f., l. x.ui., Anno Domini M.ccc.xl.iiii.1347

U1344.1

Gilla na Naem h-Ua Fergail, taisech Muinntiri h-Angaili, an duine is mó do rinne do


p.486

gnimarthaibh maithibh do Dia & do duine, d'eg, ar m- breith buadha o doman & o deman do. Cathal mac Murchadha Ui Fergail, do ghabail a ínaidh.

U1344.2

Muirghis Mac Diarmata, aen ragha mic urrigh Erenn 'n-a aimsir fein, do marbadh la Seoan Ruadh Mac Daibitha Burc.

U1344.3

Tadhg Mag Raghnaill taisech Muinntire h-Eoluis, do gabail do Clainn Muircertaigh in bliadhain sin.

U1344.4

Uilliam Mac Daibith Bimilis, do marbadh do Thadhg Ruadh mac Diarmata Gall, a m-Baile in Tobair in bliadhain sin.

U1344.5

Fergal Mac Cormaic do marbadh & ni fes cia do marbh.

U1344.6

Tempall Cille Ronain do denum la Fergal h-Ua n-Duibgennan in bliadhain sin.

U1344.7

Finnguala ingen Mic Fhingin ben Fhergail Ui Duibgennain, in ben rob' ferr re a cerd fein do mnai duine eladhna do bi i n-Erinn, d'eg in bliadhain sin.

U1344.8

Tomas Mac Artan, (no Mag Cartain) rí O n-Eathach Uladh, do crochadh do Ghallaibh. Ocus nir' crochadh o Dhia anuas gnim budh mó (do sgel).

U1344.9

Finnghuala ingen Mail Shechlainn Ui Raighillaigh, d'eg.

U1344.10

In Gilla Dubh Mac Gilla Cua d'eg.

Year U1345

U1345.0

Kal. Ian. iii. f., l. xx.uii., Anno Domini M.ccc.xl.u.1348

U1345.1

Cathal h-Ua Fergail, taisech Muinntir h-Anghaile, d'eg.

U1345.2

Cagadh d'eirghi eter Fergal Mac n-Diarmata & Ruaidhri mac Cathail {MS folio/column 72vb}mic Annrias & longport Mic Diarmata do loscadh do mac Cathail.


p.488

Mac Diarmata do tinol Connacht & gluassadh doib a n-diaigh mic Cathail & nir' lamhadh cenn do togbail doibh co rangadur longport mic Cathail, idon, Baile in Muta. Ocus do luathloiscedh eter cloich & tech & tucadur i raibe do braighdibh ann leó, fa mac Ui Ruairc & do cuadur fein slan d'a tighibh.

U1345.3

Niall h-Ua Domnaill do marbadh la Maghnus h-Ua n-Domnaill.

U1345.4

Mail Shechlainn Mag Oirechtaigh, taisech Muinntire Radhuibh, imper in einigh & feithmeoir na feile & didneoir na daennachta, quieuit in Christo. Ocus dabris craidhi na h-eigsi & na h-eladhna do cumaidh in caemtaisigh sin, co nach insibail, idon, d'a eis.

U1345.5

Donnchadh Mag Bradaigh, taisech Cuile Brighdin, d'eg.

U1345.6

Gilla na Naem h-Ua Cianan, ab Leasa Gabhail, mortuus est i Prid id August.

Year U1346

U1346.0

Kal. Ian. u. f., l. ix., Anno Domini M.ccc.xl.ui.1349

U1346.1

Eoin Dubh Mac Domnaill do marbadh la Maghnus mac Echadha Meg Mhathgamna.

U1346.2

Gilla na Naem h-Ua h-Uigind, in file gribdha, glanfhoclach is coitchinne do bi i cerdibh na filidhechta i n-Erinn, a eg caicidhis re Caisc, ar m-breith buadha o doman & o demhon.

U1346.3

Maidm do tabairt la Aedh h-Ua Ruairc ar Flaithberthach h-Ua Ruairc & ar Donnchadh h-Ua n-Domnaill & ar Dartraighibh & Aedh Mag Fhlannchadha, taisech Dartraighe, do marbadh ar aen ris & Gilla Crist Mag Fhlannchadha & Lachlainn mac Aindilis Ui Baighill,


p.490

do marbadh ann fos & daine imda aili nach airmither.

U1346.4

Mac mic in Iarla do thechti Connachtaibh & crech do ghabail do & Mac Uilliam & Mac Fheorais do breith air & maidm adbhal do thabairt air & mac mic an Iarla do ghabail ann & moran do Clainn Ricaird do ghabail & do marbadh ann fos.

U1346.5

Cagadh mor d'eirghi eter Ruaidhri mac Cathail & Ferghal Mac Diarmata, gur'thinoil Mac Diarmata Goill & Gaidhil Connacht uile & Cenel Conaill & Clann Muircertaigh, gur'curedh mac Cathail i Clainn Fermhuighe. Ocus nir'fhetsat Goill na Gaidhil ni do, gur'inntodur uile uadha gan giall, gan eidere, gur'loisc siun & gur'mill & gur'airg urmor Maighi Luirg d'a eisi.

U1346.6

In plaidh mor in galair coitcenn do bi ar fud Erenn a Muigh Luirg in bliadhain sin, co tucadh ar mor daine innti. Matha mac Cathail Ui Ruairc, d'eg de.

U1346.7

Donnchadh Riabach Mac Diarmata do gabail do Cormac Bodhor Mac Diarmata & a breith do leis a n-Airtech & a marbadh i dunathaith do lucht Airtigh.

U1346.8

Risderd h-Ua Raighilligh, ri Breifne, d'eg in bliadhain si.

U1346.9

Gillebert h-Ua Flannagan, taisech Tuaithi Ratha, do marbadh do macaibh Briain Ui Flannagan.

U1346.10

{MS folio/column 73ra}Muircertach Riaganach Mag Aenghusa do marbadh d'a braithribh fein in bliadhain si.

U1346.11

Donn h-Ua Daimín, taisech Tire Cennfota, mortuus est.

Year U1347

U1347.0

Kal. Ian. ui. f., l. xx., Anno Domini M.ccc.xl.uii.1350

U1347.1

Ferghal mac Ualghairc Ui Ruairc, do marbadh do mac Cathail Cleirigh Mic Donnchaidh.

U1347.2

Brian Mac Diarmata, adbur righ Muighi Luirg, do marbadh a


p.492

m-baile Rosa Comain leisin espuc h-Ua Fínachta d'aen urchur soighde. Ocus in t-é ar ar'cuiredh in t-urchur do cirrbadh & do marbadh ann, idon, Ruaidrí in t-Sheomra h-Ua Donnchadha.

U1347.3

Brian h-Ua Briain do marbadh a feall do machaibh Mec Ceothach.

U1347.4

Aedh mac Aedha Breifnígh h-Ui Concobuir, ri Connacht, do marbadh la h-Aedh h-Ua Ruairc ar Muigh Enghaide.

U1347.5

Aenghus h-Ua h-Eoghusa, sai coitchenn, coimdhes a cerdaibh na filidhachta, d'eg.

U1347.6

Aengus Ruadh h-Ua Dalaigh (idon, mac Donnchadha mic Aengusa mic Donnchadha Moir), sai gan uiresbaidh, mortuus est.

U1347.7

Ruaidhri mac Cathail mic Domnaill Ui Concobuir, do marbadh do macaib Ferghail Mic Donnchaidh.

U1347.8

Aedh mac Amhlaim Meg Uidhir, mortuus est.

Year U1348

U1348.0

Kal. Ian. uii. f., l. i., Anno Domini M.ccc.xl.uiii.1351

U1348.1

Pilib Mag Uidhir (idon, taisech Muinntiri Peódachan) mortuus est.

U1348.2

Enna h-Ua Flannagan, taisech eile, mortuus est.

U1348.3

Eoghan Mac Suibhne do marbadh la Maghnus h-Ua n-Domnaill.

U1348.4

Aedh O Ruairc do gabail ic techt o Cruaich Patraic do mac Pilbin Mic Uilliam & Fergal Mac Diarmata d'eirghi tríd & cagadh coitcenn i Connachtaibh & Magh Luirg uile do lomargain tríd.

U1348.5

Mathgamain Mac Con Shnama do marbadh do clainn Donnchadha Mic Con Shnama.

U1348.6

Fuagra coitcenn o Uilliam h-Ua Cellaigh ar damaibh


p.494

Erenn, & tangadur co m-buidhech uadha.

U1348.7

Cristinus h-Ua Leannan, ab Lesa Gabail, mortuus est...Idus Aprilis.

U1348.8

(Iohannes Andree, excellentissimus doctor, qui propria Sexti, Clementis, atque Nouellas, Hieronymi Laudes, Speculique iura peregit, obiit hoc anno, die 7mo mensis Iulii, perdirae pestis fato, et sepultus est in ecclesia Sancti Dominici in ciuitate Bononiensi.)

Year U1349

U1349.0

Kal. Ian. i. f., l. x. ii., Anno Domini M.ccc.xl.ix.1352

U1349.1

Aedh mac Toirrdealbaigh, do ghabail righe Connacht ar eigin tar Gallaibh & tar Ghaidhelaibh.

U1349.2

Nualaith ingen Mic Diarmata, d'eg.

U1349.3

Aedh O Mael Brenainn & a dha mac do marbadh d'Aedh mac Fheidhlimidh h-Ui Conchobuir.

U1349.4

Tadhg mac Secusa h-Ui Cellaigh, d'eg.

U1349.5

Aedh h-Ua Ruairc do marbadh la Clainn Muircertaigh.


p.496

U1349.6

Aenghus h-Ua Domnaill do marbadh la Maghnus h-Ua n- Domnaill.

U1349.7

Tomas Mag Ragnaill mortuus est.

U1349.8

Commach Baile in Duin la h-Aedh mac {MS folio/column 73rb}Toirrdhelbaigh h-Ui Conchobuir & dith bó & caerach ann.

U1349.9

Concobur mac Muirghisa Mic Donnchaidh, sai coitchenn im ellach & im biadh, d'ég.

U1349.10

Dabug Dilmain mac Uillíug Umaill, cenn ceithern & Dilmainech Connacht, mortuus est.

U1349.11

Daibith h-Ua h-Eogain, aircinnech Innsi Cain for Loch h-Erne, mortuus est 12 Kalendas Iuini.