Kal. Ian. f. ui., l. i., Anno Domini M.cc.xc.1294
Aedh mac Eogain, do dhenum crech mor ar Clainn Muircertaigh.
Muircertach mac Maghnusa h-Ui Concobuir, adhbur coicedhaigh is ferr do bi d'a chiniudh fein, do marbadh le Domnall mac Taidhg & le Tadhg.
{MS folio/column 64vb}Domnall h-Ua h-Eghra, ri Luighne, quieuit in Christo.
Mael Sechlainn h-Ua Flannagan, taisech Clainni Cathail, do marbadh la Cathal mac Taidhg Mic Diarmata, ar sraid Sligigh.
Donnchadh Mac ConShnama, taisech Muinnteri Cinaetha, quieuit in Christo.
Duarcan Mac Tigernain, taisech Teallaigh Dunchadha, quieuit in Christo .
Cathal mac Taidhg Mic Diarmata, rí Muighe Luírg, quieuit in Christo.
Carrach in Cairn Mag Thigernain, taisech Thellaigh Dunchadha, quieuit in Christo.
Caislen Sligigh do leagadh le h-Aedh mac Eogain h-Ui Conchobuir.
Derbail ingen Taidhg mic (Cathail Mic) Diarmata, quieuit in Christo.
Maelruanaigh mac Gilla Crisd Mic Diarmata, do ghabhail righi Maighi Luirg.
In t-Iarla (idon, Ricard a Burc, idon, an t-Iarla Ruadh) do ghabail do Mac Gerailt & buaidhredh Erenn uile do thecht trid an gabhail sin.
Crecha mora mebla do dhenum do Mac Gerailt & do
Daibith Mac Gille Arraith do marbadh la macaibh Domnaill Duibh h-Ui Eghra.
(Gilla Adomhnain Magraith, comarba Termuinn Dabeóig, quieuit decimo tertio Kalendas Nouembris hoc anno.)
Kal. Ian. f. uii., l. x.ii., Anno Domini M.cc.xc.i.1295
In t-Iarla cetna do légun as do Mac Gerailt tre nert righ Saxan ar braighdibh maithibh d'a chinedh fein.
Brian mac Aedha Buidhe h-Ui Neill, ri Ceniuil Eogain, do marbadh la Domnall (mac Briain) h-Ua Neill & ar mor do Ghallaibh & do Ghaidhelaibh 'maille fris (Maidm na Craibhe).
Domnall h-Ua Cellaigh, ri h-Ua Maine, in t-aen Ghaidhel is glicu & is línaighiu & is ferr comuirle dobí i n-a dhuthaidh fhein a n-Erinn, a ég i n-aibit manaigh & a adhnucal i Cnoc Muaidhe.
Conn Mac Branan, taisech Corca Achland, occisus est. Tomaltach Mac Branain, in taisech dorighnedh 'n-a ínadh, do marbadh do mhuínnter Chonallan a n-dighailt a n-athur do marbadh dósum.
Cogadh mór i Tir Conaill isin bliadhain sin.
Cagadh mór eter rí Saxan & rí Frangc.
Caislen Muighe Duma & caislen in Baile Nua & caislen Muighi Brecraidhe do leagadh la Seaffraigh h-Ua Ferghail.
{MS folio/column 65ra}Kal. Ian. f. i., l. xx.iii., Anno Domini M.cc.xc.ii.1296
Aedh mac Eogain h-Ui Conchobuir, d'athrigadh d'a oirecht fein & Clann Muircertaigh do thabairt astir i n-a inadh & cennus & braighdi do thabairt do Choncobur Ruadh mac Cathail & in tír uile, eter cill & tuaith, do mílliudh tresan athrighadh sin. Crich Cairpri uile do loscadh & do milliudh la Clainn Muircertaigh & dul fa themplaibh in tíre doibh. Ocus dodhighail Dia & Colum Cille & Muire baintigherna, isa tempuill doshairghedur.
Sluagh mór do tinol don Aedh cetna sin do Ghallaibh & do Ghaidhelaibh fa Uilliam Búrc & fa Teboid a Búrc, co rabadur ceithri h-oidhce istir & romhilleadur arbanna & imenna in tire uile & tangadur taisich in tire 'n-a tech annsin. Rugadur leó iad co tech in Iarla, do dhenum shitha Aedha. Ocus ge roghellsat, nir' chomaillset in sidh & do aentaighedur aris ar techt d'a tigh lesin clainn cetna sin. In t-Aedh cetna sin do toidhecht isna Tuathaibh. O Ferghail & Mag Raghnaill co n-a n-imircibh do thahairt dó leis. Ocus techta do chur cum Mac Diarmata & O Flannagan & inntodh doibh istir tresan techtairecht sin & Concobur Ruadh do lenmhain & crech do dhenum dó fhorro. Impodh doibh forro, idon, ar in creich & Concobur Ruadh mac Cathail, do marbadh le Mac Diarmada ar toraidhecht na creiche. Ocus Lochlainn mac Concobuir, do ghabail & Maghnus mac Tomaltaigh, do ghabail & becan do dhainibh eile do marbadh ann. Ocus is ann dorinnedh sin, i Cinn Ceidi Thire Tuathail. Aedh h-Ua Concobuir & Mac Diarmata & O Ferghail & na h-oirechta archeana do
In Lachlann cetna sin, mac Conchobuir, do dhalladh & a ég a n-uthur a dhallta.
Gilla Isa Mac in Liathanaigh, espuc Oil Finn quieuit in Christo .
Mael Peduir O Duibhgennan, archideochan na Breifne, o Druím Cliabh co Cenannus, quieuit in Christo.
Morsluagh le righ Saxan i n-Albain, gur'gabh nert Alban uile & gur'mhill tuatha & gur'sgris oirechta & eglusa & gu sonnradhach maíníster Brathar, co nar'fhag cloch ar ait dí & gur'marbh firu graidh & mná imdha. Ocus dobadur maithi fer n-Erenn ar in sluagh sin, idon, Ricard a Burc, Iarla Uladh & Mac Gerailt, idon, Seón Fitz Tomus.
{MS folio/column 65rb}Kal. Ian. f. iii., l. iiii., Anno Domini M.cc.xc.iii.1297
Concobur, mac Taichligh mic Diarmata, mic Conchobuir (mic Taidhg) Mic Diarmata, ri Muighi Luirg & Airtigh, sinserbrathair & tigherna Muinnteri Maelruanaigh uile, fer rob' fer troid & tachur, gal & gaiscedh, innsaighidh & anadh, din & termonn, firinne & flaithemnus i n-a comaímsir, quieuit in Christo (& a adhlucudh im Mainisdir na Buille).
Maghnus O h-Ainli, taisech Ceniuil Dobtha, quieuit in Christo.
Henri Mag Oirechtaigh, espuc Connire, manach liath, quieuit in Christo (& a adhlucudh i Mainistir Drochaidh Atha).
Uilliam O Dubthaigh, espuc Cluana mac Nois, do marbadh d'escur ar toitim dó d'a eoch fein.
Morsluaighedh le h-Edubard, le righ Saxan, isin Fraíngc go moirmenmnach & tainic gan tren, gan treisi eisti.
Mael Shechlainn Mac Briain, ab na Buille, do thogadh cum espocoide Oil Finn & Marian O Dondobuir, brathair Precíur, do thoghadh reimhe & a dul don Roim i n-imcosnum na h-espocoide cetna & a ég don turus sin.
Cu Uladh O h-Anluain, rí Oirrther & a derbrathair & Aengus Mhag Mathgamna & moran do maithibh a mhuínnteri do marbadh la Gallaibh Duin Delgan, ag impodh d'a tighibh o'n Iarla.
Derbhfhorgaill, ingen hUí Floind Esa -Ui Floind, quieuit in Christo.
Kal. Ian. f. iiii., l. x.u., Anno Domini M.cc.xc.iiii.1298
Tomas Fitz Muiris, barun mór do Clainn Gerailt, fhrisi n-abairthea in t-eighri cam, quieuit in Christo .
Tomas O h-Oirechtaigh, ab Easa Ruaidh, quieuit in Christo.
Sadhbh ingen Aeda Buidhe h-Ui Neill, ben Taidhg mic Anrias h-Ui Concobuir, quieuit in Christo.
Brian Breghach Mág Shamradhain, taisech Thellaigh Eathach, do marbadh la h-Aedh m-Breifnech h-Ua Concobuir & la Clainn Muircertaigh aircena.
Donnchadh mac Domnaill h-Ui Eaghra, in t-aen mach sigh is ferr eineach & rob' ferr dobí a cosnum a thire, do marbadh la Brian Carrach O n-Eghra, d'a brathair fein, i mebhail.
(Escoboid Chluana mac Nois do ghabail d'Uilliam h-Ua n-Fínnan, d'abbaidh Chille Beagain.)
Kal. Ian. f. u., l. xx.ui., Anno Domini M.cc.xc.u.1299
Alaxandair Mac Domnaill, in duine rob' ferr einech & maithius dobi i n-Erinn & i n-{MS folio/column 65va}Albain, a mharbadh le h-Alaxandair Mac Dubghaill maille re h-ár diairmhidhe d'a muinnter fein uime.
Ferghal h-Ua Fírghil, espuc Ratha Both, in t-aen espuc Gaidhelach rob'ferr einech & dérc & daenacht & crabadh dobí i n-Erinn, quieuit in Christo.
Cath do thabairt do righ Tairtri & do righ Fermenía (im fheil Muire moir in fhoghmhuir),
(Muiris h-Ua h-Ógan, epscop Chille dha Lua, quieuit.)
Kal. Ian. f. ui., l. uii., Anno Domini M.cc.xc.ui.1300
Teboit Buitiller, barun mór, úasal, mortuus est.
h-Eoan Prinndregas do marbadh le mac Fiachra h-Ui Fhloínn.
Adam Sdondun, barun mor aile, quieuit in Christo.
Caislen Atha Cliath in Choraínn do thinnsgedal lesin Iarla.
Seoinín Óg Mac Muiris do marbadh (la Conchubur mac Fiachra h-Ui Fhloinn).
Feidlimidh Mag Carrthaig, adbur righ Des Muman, quieuit in Christo.
Congalach h-Ua Lochlainn, espuc Corcumruadh, saí n-eínigh & crabaidh, quieuit in Christo .
Gairm coitchenn do thecht o Roim i n-aimser Bonafais Papa fa'n Cristaidhecht uile & gacha cetmadh bliadhain tic in gairm sin & Bliadhain Ratha a h-aínm sin. Ocus sluaigh diairmhidhe a h-uilibh thiribh na Crisdaidhachta do dhul fa'n gairm sin d'a n-oilithri co Roim & logadh a pecadh uile d'fhaghbhail doibh.
(Muircheartach, mac Imhuir h-Ui Bhirnn, d'h-ec ar slighigh na h-oilithri cetna sin.)
Kal Ian. f. i., l. x.uiii., Anno Domini M.cc.xc.uii.1301
Finnguala ingen Fheidhlimthe h-Ui Conchobuir, banab Cille Craebhnada, quieuit in Christo.
Uilliam Mag Fhlannchada, taisech Dartraighe, do marbadh la h-Ualgharg mac Domhnaill mic Airt h-Ui Ruairc.
Cairpri mac Cormaic h-Ui Mail Shechlainn, do marbadh tre fhorgall a brathar fein, idon, mac Airt h-Ui Mail Shechlainn.
Creach mór do dhenum d'Aedh mac Cathail h-Ui Conchobuir & do Clainn Muircertaigh ar Tadhg mac Annrias, a Muigh Cetne.
Sluaighedh la righ Saxan i n-Albain & Mac Gerailt & Mac Fheorais & maithi Bharun Erenn uile, a n-ingnais Iarla Uladh, leis ar in sluaighed sin & beith doibh a n-Albain o caeicidhis re Lughnusadh co Samuin & gan {MS folio/column 65vb}a lornert do ghabail doibh th-shoir.
Kal. Ian. f. ii., l. xxix., Anno Domini M.cc.xc.uiii.1302
Domnall Ruadh Mag Carrthaigh, rí
Miles, espuc Luimnígh, mac mic eisein don Iarla Laighnech, quieuit in Christo.
Espuc Corcaighe, manach liath, quieuit in Christo.
Ruaidhri mac Domnaill h-Ui h-Eaghra, adhbur righ Luighne, quieuit in Christo.
Bódith mór in bliadhain sin ar cethra.
Crech mor do dhenum d'Aedh, mac Cathail, ar Tadhg mac Annrias & ar Shitriug mac in Cairnígh Meg Lachlainn, i Magh Cetne.
Donn Mag Uidher, rí Fer Manach, idon, cetna ri Fer Manach do macaibh Meg Uidhir, quieuit in Christo.
Maighister Sdiamna O Bragain, airdespuc Caisil, quieuit in Christo.
Kal. Ian. f. iii., l. x., Anno Domini M.cc.xc.ix.1303
Nicol Mac Mail Isu, airdespuc Arda Macha, in t-aen cleirech is diagha & is crabhtighiu dobi i n-Erinn i n-a aimser fein, quieuit in Christo.
Mael Shechlainn Mac Briain, espuc Oil Finn, quieuit in Christo . Donnchadh h-Ua Flannagan, abb na Buille, do ghabhail na h-espocoide cetna d'a eisi.
Diarmait h-Ua Flannagan, taisech Tuaithi Ratha & a dha mac & moran aile do marbadh do droing do lucht tighe Domnaill mic Taidhg h-Ui Concobuir, i m-Bun Duibhe, a toraidhecht creiche ruc se leis a Muigh Cetne.
Toirrdhelbach
Niall Mac Gilla Fhinnen quieuit in Christo .
Crech mór do dhenum la Clainn Muirchertaigh a Muínnter Cinaetha & Muircertach Mac Con Shnama, adbur taisigh Muínnteri Cinaetha, do marbadh doibh ar in creich sin.
Sluagh mór le righ Saxan i n-Albain & cathracha imdha do ghabail {MS folio/column 66ra}doibh & in t-Iarla & Goill & Gaeidhil do dhul a h-Erinn, cablach mor & nert do gabhail ar Albanchaibh doibh. Teboid a Burc, derbrathair in Iarla, d'eg ar toidhecht dó don t-sluaghedh sin i Carraig Ferghusa, adhaigh Notlaic.
Domnall Og (alias, Ruadh) Mag Carrthaigh, rí Des Muman, quieuit in Christo.
Maghnus Mag Shamhradhan, taisech Tellaigh Eathach, mortuus est.
(Ghearoid Fithomas, oighri Cloinne Gerailt, mortuus est.)