Corpus of Electronic Texts Edition
The Annals of Ulster (Author: [unknown])

Year U1201

U1201.0

U. cccc.u.Kal. Ian. ii. f., l. xx. iii., Anno Domini M.cc.i.

U1201.1

Ruaidhri Mac Duinn Sleibhe, ri Uladh & cainnel gaiscidh na h-Erenn uile, do marbadh do Ghallaibh, .i., tria mírbuilibh Poil & Petair & Patraic ro sharaigh.

U1201.2

Tomaltach h-Ua Conchobair, comarba Patraic & ard-primaith Erenn uile do ecna & do crabadh, in pace quieuit.

U1201.3

Innarba Cathail Croibhderg h-Ui Conchobuir & righadh Cathail Carraigh i n-a inadh No comadh ar in Kalaind-si tuas tic innarba Cathail Croibdeirg.

U1201.4

Sloghadh la h-Aedh h-Ua Neill i foirithin Cathail Croibdeirg co Feraibh Muighi h-Itha & co n-Airghiallaibh co rangatar co Tech Baithin Airtigh, co ro shoisetur ann, co tangadur co h-Es Dara & co ruc orra Cathal Carrach co maithibh Connacht & Uilliam Burc co n-Gallaibh Luimnigh imaille fris & co ro mhuidh ar Thuaiscert n-Erenn & co fargbadh and h-Ua h-Eicnigh, airdrigh Airgiall et alii multi.

U1201.5

Sloghadh la Sheoan do Chuirt co n-Gallaibh Uladh & mac Ugo de Laci co n-Gallaibh Midhe i foirithin Cathail


p.236

Croibderg, co rangadur Cill Mic n-Duoch. Annsein táinig Cathal Carrach co Connachtaibh imaille fris & co ro cuirset cath & co ro muidh ar Ghallaibh Uladh & Midhe. I bail i r-rabadur na coic catha, ní tainíg as acht da chath dibh.

U1201.6

Aedh h-Ua Neill do athrighadh la Cenel n-Eogain{folio & column MS1 56b} & righadh Conchobuir Meg Lachlainn doibh & co n-derna creich h-i Tir n-Ennai, co tuc bú{folio & column MS2 58a} diairmidhe & co ro marb daine. Annsein táiníg Eicnechan h-Ua Domnaill co longais Ceniuil Conaill & cona slogh ar tír, co ro gabsat longport ic Gaeth in Cairrgin. Iarsin tangatur Clann Diarmata co Port Rois don leth aile do gabail frisin loingis. Iarsin ro leicthea orra na tri longa déc lan do sluagh, co ro maidh ar Clainn Diarmata. Iarsin tainig Mac Lachlainn .i., Conchubhar Beacc i n-a foirithin, co ro gonadh a ech & co torcair don escar-sin la Cenel Conaill i n-einech Coluim Cille & a comarba & a scrine ro dhomíadhaigh. Ocus triasan mirbail cetna ro marbh Conchobur Murchadh h-Ua Crichan, ri h-Ua Fiachrach.

U1201.7

{§LATE} Conchubhar na Glaisfheine h-U Ruairc do badhudh.§