Kal. Ian. ii. f., l. xx. uii., Anno Domini M.c.xc.ui.
Reicles Poil & Petair cona themplaibh & co m-bloidh moir don Rathaidh do loscadh.
Sluaghadh la Ruaidhri Mac Duinn Shleibe, co n-Gallaibh & co macaibh righ Connacht docum Ceneoil Eogain & Airrter. Tangatur dono Cenel n-Eogain Telcha Óac & Errter co Machaire Aird Macha, co tucsat cath doibh & cur mebaidh ar Mac Duinn Sleibhe & ro marbadh derg-ár a muinnteri ann, .i., da mac righ déc do Connachtaibh.
Muircertach, mac Muircertaigh h-Ui Lochlainn, rí Ceneoil Eogain & ridomna Erenn uile,{folio & column MS2 57a} .i., tuir gaiscidh & egnoma Leithi Cuinn, discailiudh Gall & caistel, tercbail cell & cadhus, do marbadh do Donnchadh, mac Bloscaidh h-Ui Cathan, a comairli Ceneoil Eogain uile: .i., iar tabairt na tri Scríne & Canoine Patraic fris i tempall
Mac Bloscaidh h-Ua Cuirin do arcain Termainn Da Beócc & ro marbadh é féin inn co n-derg-ár a muinntere re sulbud cenn mís, tria mirbuil Da Beóc.
Isin bliadhain-sin dono do bris Domnall, mac Diarmata Mec Carrthaigh, cath ar Gallaibh Muman & Luimnich in ro marbh a n-derg-ar & in ro dichuir a Luimniuch iat iar séin & ro bris dá maidhm aile béos.