Kal, Ian. uii. f., l., ii., Anno Domini M.c.lxx.ii.
Ri Saxan .i., Henricc, mac na Perisi do dhul a h-Erinn Dia Domnaigh Casc, iar ceilebradh Aiffrinn.
Tigernan h-Ua Ruairc, ri Breifne & Conmaicne, fer cumachta more fhri ré fhota, do marbadh do Shaxanaibh cetna & do Domnall, mac Annaidh, dia ceniul féin imaille friu. A dichennadh dono doibh & a cenn & a corp do breith co docraidh co h-Ath Cliath. In cenn{folio & column MS2 54a} do thogbail for dorus in Duine i n-a sgath derg truagh do Ghaidhelaibh. In corp dono do crochadh i n-inud aile & a cossa súas.
Tigernach h-Ua Mael Eoin, comarba Ciarain Cluana Mac Nois, quieuit in Christo.
Inis Eogain do fhasughudh la Cenel Conaill & ar do chor for a doenibh.
Maidm for Cenel n-Eoghain la Flaithbertach h-Ua Mael Doraidh & la Cenel Conaill & ár lan-mor do chor forru. Mirbuil tra do noemhaibh in Coimdedh in ní-sin, .i., do Patraic & do Colum Cille & do na naemaibh archena, isa cella ro millset.
Mael Muire Mac Murchadha, toisech Muinnteri Birn & toisech & ri h-Ua n-Echach, do marbadh la h-Aedh Mac Oenghusa & la Clainn Aedha h-Ua n-Echdach Uladh.
Lan-cuairt Coicidh Connacht in cethramadh fecht la Gilla Mac Liac, comarba Patraic, .i., la primaith Erenn, co h-Ard Macha.
Domnall h-Ua Ferghail, ard-toisech Conmaicne, do marbadh la muinnter righ Saxan.
Gilla Aedha, espuc Corcaighi, fer lan do rath Dé, in bona senectute quieuit.
{§LATE} Murchadh Mac Murchadha & Murchadh h-Ua Brian occisi sunt.
Gilla Crist, mac comarba Ciarain Cluana Mac Nois, quieuit.
Diarmoid h-Ua Caellaidhe occisus est. §