Corpus of Electronic Texts Edition
The Annals of Ulster (Author: [unknown])

Year U1170

U1170.0

Kal. Ian. u. f., l. x., Anno Domini M.c.lxx.

U1170.1

Concobhar, mac Muircertaigh h-Ui Lochlainn, ri Ceneoil Eogain & ridomna Erenn uile, do marbadh do Aedh Bic Mac Canae & do Uib Caracain, Dia Sathairn Casc, ar lar Trin Moir i n-Ard Macha.

{folio & column MS1 51c}

U1170.2

Donnchadh Ceinnsealach h-Ua Ceallaigh do marbadh do Laighnibh. {§LATE}

U1170.3

Sluaighedh la Ruaidhri h-Ua Conchobair & la Mail Seachlainn & la Tigernan h-Ua Ruairc &; la Murchadh h-Ua Cerbhuill cu h-Ath Cliath i n-airis catha do Mac Murchadha & dondh Iarla. In tan tra ro bhadar ar i n-aighthi ic irnaidhi in chatha, nuchur rathreigset nu cu fhaccadar in dun tre theinidh, .i., teni dhi aitt. Ro shoi dono iar sen h-Ua Conchubair, iar femiud chatha do tabairt dho. Ro chuaidh iar séin Mac Murchadha i nn-Ath Cliath, iar tabhairt breithri do Ghallaibh Atha Cliath dho. Ocus ro fheall for a bhreithir & ro marbadh daine imdha ann & ro innarb na Galla.

U1170.4

Braighde Mic Murchadha, .i., a mac fein & mac a mic, .i., mac Domhnaill Chaemhanaigh & mac a

p.164

comaltha, .i., mac h-Ui Chaellaidhe, do mharbhadh la Ruaidhri h-Ua Conchubhair, tre aslach Tighernain h-Ui Ruairc. §

U1170.5

Ath Cliath do milledh do Dhiarmait Mac Murchadha & do Allmurchaibh tuc leis anair do mílliudh na h-Erenn i n-dighail a innarba dar muir as a ferunn fein & a mhic do marbadh. Tucsat dono ar for Gallaibh Atha Cliath & Puirt Lairgi & tuctha tra áir ímda forru-sum. Do mílltea dono Laigin & Fir Mídhe, eter cella & tuatha, leó & ro gabsat At Cliath & Purt Lairgi.

U1170.6

Gnim mór aínfial do dhenum don manach, .i., do Amlaímh, mac comarba Finnéin Muighi Bile & do Maghnus Mac Duinn Sleibhe, do righ Uladh, co toisighibh Uladh & co n-Ultaibh archena, cenmothá Mael Isu, espuc & Gilla Domanghairt Mac Cormaic, comarba Comgaill & Mael Martain, comarba Finnéin co n-a muinnteraibh: .i., Coimtinol Canonach Riagulla cona n-abaidh, ro ordaigh Mael M'Oedoic h-Ua Morgair, leghait comarba Petair, i Saball Patraic, do innarba asin mainistir ro cumdaigsetar féin & do arcain co leir, eter libru & aidhmí, bu & dainiu, eochu & cairchiu & na h-uile ro tinólsat ann o aímsir in legait{folio & column MS2 53b} remraiti

p.166

conice-séin, cenmothat na inair & na capai ro batar ímpu isind uair-sein, tria format & baidh collaidhe & saint onóiri dó féin. Uair ro díchuirsetar manaigh Drochait Atha é asan abdaine, tria chuisibh dlightechaibh. Uch ! Uch! Uch ! tra. Mairg do-róne & mairg thir i n-dernadh in gnim. Acht ní dechaidh cen innechadh on Coimdigh; uair ro marbait i n-oín-fhecht o uaitibh namhat na toisigh do-rone & ro gonadh in rí & ro marbadh gar bic iartain co h-aínfechtnach isin baile i n-dernadh in comhairle aínfiren-sin, .i., i n-Dun. Dia Mairt tra ro díchuiredh in coimtinol. Dia Mairt tra, i cinn bliadhna, ro marbait maithi Uladh & ro gonadh a righ. Dia Mairt, gairit iartain, ro marbadh é fein o derbrathair i n-Dun.

U1170.7

Diarmait h-Ua Ainbfheith, rí h-Ua Meith & toisech marc-sluaighi righ Ailigh, do marbadh do longais táinic a h-Innsibh Orcc isin innsi ro cumtaighedh aca féin for Loch Ruidhe, .i., for Inis Lacain.