Corpus of Electronic Texts Edition
The Annals of Ulster (Author: [unknown])

Year U1161

U1161.0

Kal. Ian. i. f., l. i., Anno Domini M.c.lx.i.

U1161.1

Ua h-Oisséin, ard-epscop Connacht, ad Christum migrauit.

U1161.2

Cuairt Osraighi do dhenam la comarba Coluim Cille, .i., la Flaithbertach h-Ua Brolchan : .i., secht fichit damh; acht as e a fiach ro taidhbedh ann, .i., fiche & cethri cet uinge d'argut gil : .i., tri h-uinge i n-gach dam.

U1161.3

Goffraigh h-Ua Raghallaigh do marbadh.

U1161.4

Sluaghadh la Muircertach h-Ua Lochlainn hi Tir m-Briuin : issed do-cuadur dar Comur Cluana Eois, ar fut an tire, co fargaib Tigernan a longport doibh. As sein co Tiprait Messan. Airgiallu & Ulaidh conice-sein cucai, & Mac Murchadha co Laighnibh & cath do Ghallaibh, co n-deochadar uile i Maigh Tethbha. Tainig dano h-Ua Concobuir tar Sinaind aníar & do-rat braigde d' U Lochlainn & dano tuc h-Ua Lochlainn a choiged comhlan dó-somh.

U1161.5

Tech do gabail do Chathal h-Ua Raghallaigh for Mael Sechlainn h-Ua Ruairc for lar Sláine, co ro marbadh ann Muircertach h-Ua Ceallaigh, ri Bregh, co n-dreim do mhaithibh ime.{folio & column MS2 52a} Ternai imorro Mael Sechlainn ass.

U1161.6

Imhar h-Ua h-Innrechtaigh, aircinnech Mucnoma & ri h-Ua Meith fri ré, do éc.

U1161.7

Sluaghadh aile la h-Ua Lochlainn hi Midhe, i comdail


p.140

fer n-Erenn eter loechu & cleirchiu, co h-Ath na Dairbrighe, co rogabh a m-braighde uili. Is don chur-sin ro saerait cealla Coluim Cille i Midhe & i Laighniu la comarba Coluim Cille, .i., la Flaithbertach h-Ua Brolchan & tucadh dó a cain & a smacht, uair robdar doera reime-sin.