Kl. Ianair i. f. l. xx. Anno Domini m.c.xx.ii.
Aedh H. Ruairc ri Conmaicne do thuitim la feru Midhe ic breith creiche uaithibh.
Scrin Cholmain m Luachain d'fhoghbhail i n-ailaidh Lainne ferchubat i talmhain dia Cetain in Braith.
Sluaigedh la Tairrdelbach H. Concobuir co Loch Sailech i Midhe co tainig m. Murchadha ri Laigen & Gall ina tech.
Mor ingen Domnaill H. Lochlainn ben Tarrdhealbaigh H. Concobuir do éc.
Crech mór la Conchobur H. Lochlainn & la Cenel n-Eogain co rangadur Cill Ruaidh i n-Ulltaibh co tucsadur boroma diairmhidhe.
Mael Coluim H. Brolchan espoc Aird Macha do éc ina ailithri{folio & column MS2 49va} i n- disiurt Daire fo buaidh martra & athrighi.
Aed H. Duib Dirma toisech Na Bredcha & cenn einigh Tuaiscirt Erenn & Domnall a brathair mortui sunt.