Kl. Ianair uii. f. l. xiii. Anno Domini m.c.x.ui.
Ceallach comarba Patraic for cuairt Conacht don dara cur co tuc a lan-chuairt.
Ceall Da Lua cona tempoll do loscadh.
Corcach Mor Muman & Imlech Ibhair, dairtech Mael Isu Ui Brolchan & blodh do Lis Mhor, Achadh m-Bo Cainnigh, Cluain Iraird cremata est.
Tech n-abbadh mor Arda Macha co fichit taighi ime do loscadh i tosuch Corghais na bliadhna-sa.
Maghna pestilentia; famis adhuc ardet{folio & column MS2 48va} i l-Leith Mogha eter Laighnichu & Muimnechu coro fhasaigh cealla & duine & tuatha & co ro esraigh fo Erinn & dar muir & co ro la ár inna mete machthata.
Ladhmunn m. Domnaill h. righ Alban do mharbadh do feraibh Moriab.
Derbail ingen Toirrdelbaigh H. Briain mortua est.