Corpus of Electronic Texts Edition
The Annals of Ulster (Author: [unknown])

Year U1103

U1103.0

Kl. Ianair u. f. l. xx. Anno Domini m.c.iii.

U1103.1

Scanner crodha eter Feru Luirg & Tuaith Ratha i torchair ár cechtarde.

U1103.2

Ua Canannan do innarba a righi Thire Conaill la Domnall H. Lochlainn.

U1103.3

Murcad Donn .i. Ua Ruadacan do marbadh si uerum est for creich i Maigh Cobha & in chrech h-isin do marbadh in Gilla Guit H. Cormaic isind ló cetna.

U1103.4

Raghnall H. Ócan rechtaire Telcha Óg do marbadh do Feraibh Maighi Itha.

U1103.5

Cocadh mór eter Cenel n-Eogain & Ulltu co tainig Muircertach H. Briain co feraib Muman & Laigen & Osraighi & co maithibh Connacht & co feraibh Midhe ima righaibh co Magh Cobha i foirithin Uladh. Do l-lotur dibhlinaibh co machaire Aird Macha .i. co Cill na Conraire co m-batar sechtmain a forbhaisi for Ard Macha; Domnall H. Lochlainn co Tuaiscert Erenn frisin re sin i n-Uib Bresail Macha aghaid it aghaidh friú. O ro batur toirrsigh imorro fir Muman do luidh Muircertach co h-Aenach Macha & co h-Emhuin & timceall do Ard Macha co fargaibh ocht n-unga oir forsin altoir & co ro gheall ocht .xx. bó & impais i Magh Cobha doriise .i. non impetrator & facbais coiced Laigen and & sochaidi do feraibh Muman. Atn-aigh fein imorro for creachadh i n-Dal Araide co farcaibh Donnchadh m Toirrdelbaigh ann & mc H. Concobuir ri Ciaraidhe & H. Beoain & alii optimi. Do-lluidh Domnall H. Lochlainn co Tuaiscert Erenn i Magh Cobha for amus Laigen; tecait imorro Laigin & Osraighi & fir Muman & Gaill amal ro batur ina

p.542

n-aghaidh & ferait cath .i. i n-Noin August & i Cetain & i ix.xx. & isin uiii. lo iar techt do Machai. Maidhis tra for Leth Mogha & later a n-ár edhon ár Laigen im Muircertach m. Gilla Mo Cholmoc & im da ua Lorcan & im Muircertach m. m. Gorman & alii; ár H. Ceinnsealaigh im da mc. Mael Mhordha & im h-U Rian .i. ri H. n-Drona & alii; ár Osraighi im Gilla Patraic Ruadh .i. ri Osraighi & im rigraidh Osraighi archeana; ár Gall Atha Cliath im Thórstain mc. Eric & im Pol mc. Ámaind & im Beollan Armuun & alii; ár fer Muman im da H. Bric .i. da ridomna na n-Desse & im H. Failbhe .i. ridomna Corco Duibhne & erri Laigen .i. im H. Muiredaigh ri Ciaraidhe cona mac & alii{folio & column MS2 46vb} multi optimi quos causa breuitatis scribi pretermisimus. Ternatur Cenel n-Eogain co Tuaiscert Erenn co coscar mór & co setaibh imdhaibh imon pupoll righda & im chamlinne & im shetaibh imdaibh archena.

U1103.6

Maghnus ri Lochlainni do marbadh for creich i n-Ulltaibh.

U1103.7

Cathalan m. Senan do marbadh do Chairpribh.

U1103.8

Murchadh H. Flaithecan airchinnech Arda Bó sui ecnai & enaigh & fhairchituil in perigrinatione suam .i. in Ard Macha feliciter obiit.