Kl. Ianair iii f. l. xx.uii. Anno Domini m.c.i.
Donnchadh mc. Aedha H. Ruairc do marbadh do Feraibh Manach.
Riagan espoc Droma Moir & coicidh Uladh in pace quiéuit.
Inis Cathaigh do orcain do Ghallaibh.
Slogadh la Muircertach H. m-Briain & la Leth Mogha i Conachtaibh dar Es Ruaidh i Tir n-Eogain coro scailset Aileach & co ro loiscset & co ro sharaigset ill-cella archena im Fathain Mura & im Ard Sratha. Do-llotur iar sin for Fertais Chamsa coro loiscset Cuil Rathain & co n-dernaisit duinebadh ann. Gabais giallu Uladh iar sin. Do-luidh tar Slighidh Midluacra dia thigh.
Crech la Donnchadh H. Mael Sechlainn i Fernmuigh conus-taraidh H. Cerbhaill & co ro marb da c. dibh uel paulo plus.
Ferdomnach episcopus Cille Dara in pace quiéuit.
Cathal H. Muirican ri Tethfa decollatus est.
Donnchadh H. Eochadha ri Uladh do fuaslucudh a cuibrich la Domnall m. m. Lochlainn la righ n-Ailigh tar cenn a mic & a comaltai .i. i n-dom liac Arda Macha tre impidhe comarba Patraic & samhtha Patraic archena iar comlugha fo bachaill Isa & fo minnaibh archena in .xi. Kl. Ianair.[...]