Kl. Ianair .u. f. l. xiii. Anno Domini m.xc.uii.
Lerghus H. Cruimthir comarba Comghaill post penitenciam obtimam obiit.
Tadhg m. Ruaidri H. Concobair ridomna Conacht a suis occisus est.
Flannacan Ruadh airchinnech Ruis Comain in pace quieuit.
Cloicthech Mainistrech cona lebraibh & taiscedhaibh imdhaibh do loscadh.
Mael Brigte m. in t-Sair H. Brolcan uasal-espoc Cille Dara & Coicidh Laigen post penitenciam optimam quiéuit.
Slogadh la Muircertach H. m-Briain & la Leth Mogha co Magh Muirtemhne. Slogadh dano la Domnall H. Lochlainn co Tuaiscert Erenn co Fidh Conaille do thabairt catha doibh co rus-tairmesc Domnall comarba Patraic fo gné sith.
Lochlann H. Duibh Dara ri Fernmuighi do marbadh do Uib Briuin Breifne.
Cno-mhes mor isin bliadhain-si: xxx. bliadhan on chnó-mhes aile gusan cno mhes-sa .i. bliadhain na cnó finn .i. co fogaibthi sesedach cno ar aen-pinginn.