Kl. Ianair iii. f. l. xx.ui. Anno Domini m.xc. .i. bliadain deiridh ogdata & ind nochadmadh bliadain ar mili o gein Crist.
Mael Duin H. Rebacan comarba Mo Chutu, Cian H. Buachalla comarba Cainnigh i Ciannacht in Christo pausauerunt.
Mael Ruanaigh H. Cairellan muire Cloinni Diarmata, Gilla Crist H. Lunig muire Ceniuil Maién do marbadh i n-aen-lo per dolum o Domnall H. Lochlainn.
Damh liac na Ferta do loscadh co cet taighi ime.
Comdal eter Domnall m. m. Lochlainn & Muircertach H. Briain ri Caisil & m. Flainn H. Mael Sechlainn ri Temhrach co tartsat a n-giallu uile do righ Ailigh.
Taitlech H. h-Eghra do ergabhail.