Kl. Ianair ii. f. l. xx. Anno Domini m.lxxx.iiii.
Donnchadh H. Mael Ruanaidh persecutor eclesiarum do marbadh eter corp & anmain o Feraibh Luirg.
Glenn Da Locha cum suis templis do loscadh.
Muiredhach H. Cethnen airchinnech Cluana Eois do ecc.
Slogadh la Donn Sleibhe ri Uladh co Drochat n-Atha co tarat tuarustal do mc Cailigh H. Ruairc. Crech la Domnall H. Lochlainn tar a eis i n-Ulltaibh co tucsat boroma mor.
Slogadh la feru Muman i Midhe & is for an sluagad-sin ad-bath Concobur H. Cetfatha. Do-cuatur Conmaicne i Tuathmumain tar a n-eisi co ro loiscet duine & cella & co rucsat creich.
Maidm Mona Cruineoce ria Leth Mogha for Donnchadh H. Ruairc i torcair H. Ruairc .i. Dondchadh mc. Cailig H. Ruairc & Cennetigh H. Briain et alii plurimi h-i .x.iii. Kl. Nouimbris.
Domnall H. Gailmredhaigh do marbadh do Domnall H. Lochlainn.
Gilla Patraic espoc Atha Cliath do bathadh.
Hoc anno ecclesia sancte Fuinche de Ros Oirrchir fundata est.