Kl. Ianair iii. f. l. x.uiii. Anno Domini m.lxx.iii.
Be Binn ingen Briain in perigrinatione i n-Ard Macha mortua est.
Concobhar H. Mael Sechlainn ri Temhrach do marbadh do mc. Flaind H. Mail Sechlainn dar airthech bachlu Isu baculo presente.
Domnall m. m. Ualgairg toisech H. n-Duib Innracht, Cu Chaille H. Finn ri Fer Rois, Cormac H. Clothagan moer Muman in penitentia mortui sunt.
Slogadh la Tairrdelbach i l-Leith Cuinn co n-derna creich n-diairmidhe for Gailengaibh & co ro marb Mael Mordha H. Cathusaigh ri Breagh.
Sitriuc m. Amhlaim & da H. Briain do marbadh i Manainn.