Kl. Ianair .ui. f., l. u. Anno Domini M.xl.ii.
Fearna Mor M' Oedhoc do loscadh la Donnchad m. m-Briain. Glenn Uissen do loscadh do m. Mail na m-Bó & in dairrtech do brisiudh & .c. duine do marbad & .iiii. c. do breith eisti i n-dighail Ferna More.
Loingsech .i. H. Flaithen, comarba Ciarain & Cronain, quieuit.
Aedh m. ind abad, .i. m. Mail Muire & Setaige ingine H. Lorcain, do ec i Corcaig Moir Muman.
Murchad m. Dunlaing, ri Laigen, & Domnall m. Aedha, ri H. m-Bairche, do thuitim la Gilla Patraicc mc. n-Donnchada, ri Osraighi, & la Mc. Raith m. Donnchada ri Eoghanachta.
Flann m. Mail Sechlainn, ridomna Erenn, do marbad tria mheabhail.
Mael Petair H. h-Ailecan, fer leighinn & toisech m. leighinn Aird Macha do marbad do feraibh Fernmhuighi.
Ailill Mucnoma, cenn mhanach na n-Goeidhel in Colonia, quiéuit.