Kl. Ianair
[...]
. Anno Domini .dcccc.x.ui., alias .dcccc.xuii.
Sneachta & h-uacht dimhar & aig anaicenta isin bliadain-se comtar suirse prim-locha & primh-abainn Erenn coro la ar di cethraibh & enaibh & eicnibh. Airdi graindi olchena. Cometis celum ardere uisum est. Dlum theinedh do arthrugud co torainn iar n-Eirinn aniar co n-dechaidh dar muir sair.
Sitriuc h. Imair cona chobluch do ghabail oc Cinn Fhuait i n-airiur Laigen. Ragnall h. h-Imair cona chobluch ailiu co Gallu Locha Da Chaech. Ár n-Gall oc Neimlid la Mumain. Ár n-aile la Eoganacht & Ciaraidhe.
Slogad H. Neill in Deiscirt & In Tuaiscirt la Niall m. n-Aedha rig n-Erenn, co firu Muman do chocud fri gennti. Scorais ala laithiu fichet mis Augaist oc Topor Glethrach i Maigh Fheimhin. Do-l-lotar in genti issin tir isind lau chetnai. Fus-ruapartadur in Goidil eter teirth & medhoin laei & cathaighset co espartain co torchair amail chet fer eturru, acht is lia do-cher di Ghallaibh. Do-llotar teorcobraid asin longport na n-gennti fri toir a m-muintire. Imo-rroiset in Goidil for culu dochum a n-dunaidh resin toir dedenaigh, .i. re Raghnall, ri Dubghall, co slogh di Gallaib uime. Luidh Niall m. Aedha co n-uatib i n-agaidh na n-genti co tarmasc Dia triit a nn-diguin. Anais Niall iar sin fhichet n-aidhce {folio & column H46[bis]vb} a n-dunadh frisna gennti. As-breth uadh fri Laigniu ara n-gabtis cacht di cein frisin longport. Roinis cath (Cinn) Fhuait foraib re Sitriuc h-u Imair du i torchradur .u. .c. l^ paulo plus, condid ann do-cer Augaire m. Ailello, ri Laigen, & Mael Mordha m. Muirecain, ri Airthir Liphi, Mael M' Oedhoc m. Diarmata, sui & episcopus Laigen, Augran m. Cennetigh, ri Laichse, & ceteri duces atque nobiles.
Sitriuc h. Imair do tuidecht i n-Ath Cliath.
Eithne ingin Aedha in uera poenitencia & in feria Martini defuncta est.