Kl. Ianair Anno Domini .dccc.lx.iii.
Lorcan m. Cathail, ri Midhe, do dhalladh la Aedh m. Neill righ Temhro.
Concobur m. Donncadha, leith-ri Mide, do marbad i n-uisciu oc Cluain Irairdd la Amlaiph, ri Gall.
Roiniudh {folio & column H43ra} mór re n-Aedh m. Neill & re Flaunn m. Conaing for Anfidh m. n-Aedho co n-Ultaib i tír Conailli Cerd.
Muiredach m. Neill, abbas Lughmaidh & ala n-aile cell, moritur.
Aedgen Britt, episcopus Cille Daro, & scriba & anchorita & senex fere .cxui. annorum, pausauit.