The texts of these documents are substantially the same, but 3E 12204 is fuller than 3E 12208. The latter may have been a preliminary draft of the final contract represented by the former. As in the case of No. 2 above, both texts are given here for purposes of comparison.
En nom de Dieu amen. Personnellement estably Pierre Hacquet maistre etc. de la Michelle de Harfleur en Normandie lequel a confessé que Jacmes Barre [James Barry], tant pour luy que pour Edmond Goul16 son frère, marchant de Corc [Cork] au pays d'Irlande ad ce présent etc. a mis etc. oudict navire au port de Bourdeaulx le nombre de cincquante et neuf tonneaulx barricque et deux tiers de vin plus une pipe de myel pour lesdicts vins et myel menner etc. au port etc. au port et havre dudict Corc pour toutes devises pour les priz de frect après déclairés scavoir pour quarante tonneaulx au priz de cincq escuz et demy monnoye d'Angleterre, à compter dix gros pour escu, pour chescun tonneau de frect plus pour vingt tonneaulx pour le priz de demy frect pour chescun [tonneau] etc. que compté tonneau pour tonneau, lequel frect sera paié en la manière que s'ensuyt scavoir est, la moytié dudict frect en deniers comptans monnaie courant dudict pays, l'aultre moytié en cuyrs bons, loyaulx et marchans au priz de quatre escuz la tracque monnaie susdicte, et ce dedans xxi jours premièrement venant après l'arrivée dudict navire à droicte descharge. Et serront paiés thonaiges, petitz lomenaiges et autres avaries en la manière acoustumée. Et au cas etc. Plus luy a baillé ung tonneau et demy quicte de frect sur toute ladicte charge. Plus est tenu ledict marchant paier audict maistre pour ses chausses douze escuz monnaie susdicte en deniers comptans ainsi que ledict frect. Obligent etc., submettent etc. renoncent etc. Jehan Leuret et Jehan Mabire marchantz et bourgeois de Bourdeaulx.
En nom de Dieu soit amen. Sachent tous ceulx qui ces présentes chartres parties par A.B.C. verront et ourront que au jour duy dessoutz escript par davant moy Jacques Turpaud clerc, notaire royal en Guienne, et ès presens des tesmoings cy aprez nommez a esté personnellement estably Pierre Hacquet, maistre aprez Dieu du navire nommé la Michelle de Harfleur en Normandie, lequel de son bon gré a cogneu et confesse que Jacmes Barré ad ce présent tant pour luy que comme commis et depputé quant ad ce, commis il a dict de Edmond Goul son frère, absent, marchans demourans en la ville de Corcq [Cork] au pays d'Irlande a commis et chargé oudict navire au présent estant au port et havre de ceste ville et cité de Bourdeaulx le nombre et quantité de cincquante et neuf tonneaulx barricque et deux tiers de vin et une pipe de myel pour le tout menner et conduyre, à l'aide de Dieu, dudict port de Bourdeaulx au port et havre dudict Corcq à droicte descharge pour toutes devises: et ce [...] pour les priz et sommes de frect cy aprez declairés, scavoir est pour quarante tonneaulx tant dessusdicts vins que d'autres marchandises que ledict maistre a amenées et conduytes en sa dicte [boutique] au port de cestedicte ville de Bourdeaulx pour lesdicts marchans pour le priz de cincq escuz et demy à compter dix gros monnoye d'Angleterre pour escu pour chescun desdicts quarante tonneaulx de frect et pour le nombre de vingt tonneaulx pour le priz et somme de la moytié du susdict frect dessus déclairé pour chescun desdicts xx tonneaulx de frect, à compter tonneau pour tonneau, lequel frect sera paié audict maistre ou à son commis de pardella en la manière que s'ensuyt, scavoir est la moytié dudict frect en deniers comptants monnoie courant audict pays et l'autre moytié en cuyrs bons, loyaulx et merchans au priz de quatre escuz monnoie susdicte pour chescune tracque desdicts cuyrs, et ce dedans vingt et ung jours premièrement venant après l'arrivée dudict navire audict port de Corcq à sa droicte descharge: et serront paiez tonaiges, petits lomenaiges et toutes aultres avaries en la manière acoustumée: et au cas que lesdicts vins fuessent percez gastez ou affulez par deffault dudict navire, ou gens estans oudict navire, en ce cas ledict maistre les doibt réparer à cognaissance de marchans gens de bien sans aulcun contredit: plus l'avandict maistre de navire a donné et quicté du ledict marchant le frect de ung tonneau et demy sur toute ladicte charge et aussi commis promis et est tenu ledict marchant paier audict maistre pour ses chausses douze escuz monnoie susdicte en denièrs comptantz comme ledict frect dessus declairé: pour lesquelles chouses susdictes tenir et complir en la manière que dict est et devisé lesdites parties de leur bon gré ont obligé et obligent l'une partie à l'aultre, scavoir est ledict marchant lesdits vins et ledit maistre ondict navire frect et appareilhz d'icelluy, soubzmectant lesdits biens ès juridictions et rigueurs de tous et chascun seigneurs et judges séculiers et d'église [...].
Et ce fut fait et passé en la ville et cité de Bourdeaulx és présences de Jehan Leuret, marchant, et de Jehan Mabire courretier, demourans audict Bourdeaulx, le vingtiesme jour du moys de décembre l'an mil cincq cens et deux.